ទីក្រុងបាងកក៖ អតីតនាយករដ្ឋមន្ត្រី លោកស្រីផែថងថានដែលត្រូវតុលាការធម្មនុញ្ញបោះឆ្នោតព្យួរតំណែងដើម្បីបើកផ្លូវឱ្យតុលាការស៊ើបអង្កេតសំណុំរឿងជាច្រើនករណីនោះ លោកស្រីបានបដិសេធការអះអាងរបស់ប្រធានគណបក្សភូមិចៃថៃ (លោកអនុទីន) ដែលពីមុននេះរួមរស់នៅក្នុងសម្ព័ន្ធភាពនយោបាយជារដ្ឋាភិបាលចម្រុះជាមួយគ្នា ហើយឥឡូវនេះលោកបានទៅធ្វើជាគណបក្សប្រឆាំងវិញម្ដង។
ដូច្នេះ លោកអនុទីនក៏ដឹងរឿងផ្ទៃក្នុងរបស់រដ្ឋាភិបាលថៃមិនតិចនោះទេ ព្រោះគាត់ធ្លាប់ធ្វើជាឧបនាយករដ្ឋមន្ត្រី និងជារដ្ឋមន្ត្រីមហាផ្ទៃ។ អ្នកទេសចរចិនដែលធ្លាប់ធ្វើដំណើរទៅប្រទេសថៃយ៉ាងគគ្រឹកគគ្រេងដល់រាប់សិបលាននាក់ឥឡូវនេះថយចុះខ្លាំង។ លោកអនុទីនបកស្រាយថាបញ្ហានេះដោយសារប្រមុខដឹកនាំចិន លោកស៊ីជីនពីង បានណែនាំប្រជាជនចិនកុំធ្វើដំណើរទៅប្រទេសថៃព្រោះថៃមិនល្អទេ, ថៃត្រៀមអនុញ្ញាតឱ្យបើកកាស៊ីណូព្រោងព្រាតដោយស្របច្បាប់។
លោកអនុទីនថ្លែងថាមូលហេតុដែលអ្នកទេសចរចិនថយចុះព្រោះលោកស្រីផែថងថានកាលនៅកាន់តំណែងជានាយករដ្ឋមន្ត្រីមិនព្រមស្ដាប់សម្ដីរបស់លោកស៊ីជីនពីង។ យោងតាមលោកអនុទីន, ប្រមុខដឹកនាំចិនបានលើកឡើងម្ដងជាពីរដងថាការអនុញ្ញាតឱ្យបើកកាស៊ីណូដោយស្របច្បាប់នៅលើទឹកដីថៃមិនល្អទេ។ ជាកិច្ចឆ្លើយតបចំពោះការអះអាងរបស់លោកអនុទីន លោកស្រីផែថងថានយល់ថាការពិតមិនមែនដោយសារបញ្ហាហ្នឹងទេ។ លោកស្រីថាអ្វីដែលសំខាន់គឺបញ្ហាសុវត្ថិភាព។
លោកស្រីផែថងថានដែលបច្ចុប្បន្នជារដ្ឋមន្ត្រីវប្បធម៌ថ្លែងថាកាលលោកស្រីទៅបំពេញទស្សនកិច្ចនៅចិន លោកស៊ីជីនពីងបាននិយាយពាក់ព័ន្ធនឹងកម្មវិធីនយោបាយរបស់លោកស្រីដែលចង់អភិវឌ្ឍតំបន់កម្សាន្តមានកាស៊ីណូស្របច្បាប់នៅក្នុងនោះ។ លោកស្រីថាលោកស៊ីជីនពីងមិនចូលចិត្តកាស៊ីណូទេ (ទោះស្របច្បាប់ក្ដី ឬមិនស្របច្បាប់ក្ដី)។ កាលជួបគ្នានោះ លោកចង់ផ្ដោតសំខាន់ទៅលើជនជាតិចិនដែលធ្វើដំណើរកម្សាន្តនៅបណ្ដាប្រទេសដែលអនុញ្ញាតឱ្យបើកកាស៊ីណូស្របច្បាប់។
លោកស៊ីជីនពីងមិនបាននិយាយថាត្រូវកែសម្រួលកម្មវិធីនយោបាយស្ដីពីកាស៊ីណូនៅថៃបែបណាទេ ហើយលោកក៏មិនបានដាក់កំហិតជនជាតិចិនមិនឱ្យធ្វើដំណើរទៅថៃនោះដែរ។ លោកស្រីជម្រាបជូនថ្នាក់ដឹកនាំចិនថាកាស៊ីណូមានទំហំត្រឹមតែ១០%ប៉ុណ្ណោះនៃបរិវេណមជ្ឈមណ្ឌលកម្សាន្តដែលគ្រោងអភិវឌ្ឍនោះ។ ប្រភពខ្លះថារដ្ឋាភិបាលថៃកំពុងខ្វារកចង់ធ្វើដូចម៉ាកាវ និងសិង្ហបុរីដែលកំពុងកាក់កបខ្លាំងនឹងវិស័យលេងល្បែងនៅកាស៊ីណូ។ ដូច្នេះ ថៃក៏ដាក់បញ្ចូលវិស័យនេះនៅក្នុងកម្មវិធីនយោបាយរបស់ខ្លួន។
លោកស្រីផែថងថាននៅតែគិតថាអ្នកទេសចរចិនថយចុះមិនមែនដោយសារគម្រោងអនុញ្ញាតឱ្យបើកកាស៊ីណូស្របច្បាប់។ លោកស្រីយល់ថាគឺបញ្ហាសុវត្ថិភាពព្រោះកាលពីពេលកន្លងមកឧស្សាហ៍កើតមានករណីបាត់ខ្លួនតារាសម្ដែងជនជាតិចិន, នារីវ័យក្មេងជនជាតិចិនជាដើម។ ថ្មីៗនេះ គេទើបតែរកឃើញបុរសជនជាតិចិនម្នាក់ទៀតជាតារាសម្ដែងក៏បាត់ខ្លួនផងដែរ។
តាមមើលទៅ, ផែថងថានបែបចង់វាយបកទៅលោកអនុទីនវិញព្រោះកាលនោះគាត់ធ្វើជារដ្ឋមន្ត្រីមហាផ្ទៃ ហើយកាន់ផ្នែកសន្តិសុខជាតិ និងនគរបាលជាតិ។ ដូច្នេះ បញ្ហាសុវត្ថិភាពជាចំណុចដែលត្រូវវាយទៅលោកអនុទីនវិញដើម្បីចំណេញនយោបាយ។ ប្រទេសចិនជំរុញឱ្យជនជាតិរបស់ខ្លួនធ្វើដំណើរទេសចរណ៍ក្នុងស្រុកឱ្យបានច្រើន។ ម៉្យាងទៀត នៅអំឡុងពេលនេះមិនសូវមានភ្ញៀវទេសចរធ្វើដំណើរកម្សាន្តនៅប្រទេសថៃទេ។ នេះបើតាមការលើកឡើងរបស់លោកស្រីផែថងថាន៕
ចែករំលែកព័តមាននេះ