រាជធានីភ្នំពេញ ៖ ផ្លូវរថភ្លើងនៅចំកណ្ដាលផ្លូវលេខ១០៥K ហៅផ្លូវចូលវត្តតាំងកសាង ដែលសាងសង់ឡើងដោយក្រុមហ៊ុនរ៉ូយ៉ាល់រេលវ៉េ កាលពីប៉ុន្មានឆ្នាំមុន ហើយតែងបង្កគ្រោះថ្នាក់ចរាចរណ៍ ជាច្រើនលើកមកហើយ។ ចំណែកចុងក្រោយកាលពី៤ថ្ងៃមុន បានធ្វើឲ្យនិស្សិតស្រីម្នាក់…
រាជធានីភ្នំពេញ ៖ ផ្លូវរថភ្លើងនៅចំកណ្ដាលផ្លូវលេខ១០៥K ហៅផ្លូវចូលវត្តតាំងកសាង ដែលសាងសង់ឡើងដោយក្រុមហ៊ុនរ៉ូយ៉ាល់រេលវ៉េ កាលពីប៉ុន្មានឆ្នាំមុន ហើយតែងបង្កគ្រោះថ្នាក់ចរាចរណ៍ ជាច្រើនលើកមកហើយ។ ចំណែកចុងក្រោយកាលពី៤ថ្ងៃមុន បានធ្វើឲ្យនិស្សិតស្រីម្នាក់ ជិះម៉ូតូរអិលដួល ហើយត្រូវរថយន្តដឹកទឹកកកកិនស្លា.ប់នោះ កំពុងត្រូវបានក្រុមហ៊ុនខាងលើ រួមជាមួយក្រសួង និងមន្ទីរពាក់ព័ន្ធដាក់គ្រឿងចក្រ និងកម្លាំងមនុស្សគាស់យកចេញចេញពីផ្លូវនោះវិញហើយ ។
បើតាមប្រជាពលរដ្ឋបាននិយាយថា កម្លាំងក្រុមហ៊ុនរ៉ូយ៉ាល់រេលវ៉េ បានសហការជាមួយក្រសួងសាធារណការ និងដឹកជញ្ជូន រួមជាមួយមន្ទីរសាធារណការនិងដឹកជញ្ជូនរាជធានីភ្នំពេញ បានចាប់ផ្ដើមគាស់យកផ្លូវរថភ្លើងនេះចេញពីផ្លូវលេខ១០៥K វិញ រយៈពេល៣ថ្ងៃមកហើយ គឺចាប់ផ្ដើមកាលពីថ្ងៃទី០៥ ខែកក្កដា ឆ្នាំ២០២៥មកម្ល៉េះ ក្រោយពីការអ៊ុតកៅស៊ូលុបបាន១ថ្ងៃ។ ដោយចាប់ផ្ដើមគាស់ចេញពីចំណុចវត្តតាំងសាងខាងត្បូង ភូមិចំការឪឡឹក សង្កាត់កាកាបទី២មុន និងដេញទៅកាន់អាកាសយានដ្ឋានអន្តរជាតិភ្នំពេញ ភូមិក្បាលដំរី២ សង្កាត់កាកាបទី២ដដែលនោះ ។
ប្រជាពលរដ្ឋបាននិយាយបន្តទៀតថា ផ្លូវរថភ្លើងនេះ ត្រូវបានក្រុមហ៊ុនរ៉ូយ៉ាល់វរលវ៉េ សាងសង់នៅចំផ្លូវលេខ១០៥K ហៅផ្លូវចូលវត្តតាំងកសាងនេះតែម្ដង មានប្រែងជាង១,៣០០ម៉ែត្រ ដោយតភ្ជាប់ពីចំណុចផ្លូវដែកជិតវត្តតាំងកសាងខាងត្បូងចូលទៅកាន់អាកាសយានដ្ឋានអន្តរជាតិភ្នំពេញ ។ រយៈពេល៣ថ្ងៃកន្លងមកនេះ ក្រុមការងារខាងលើគាស់ផ្លូវនោះ បានប្រវែងប្រមាណជាង២០០ម៉ែត្រហើយ និងបានដឹកដែក ដែលគាស់រួចយកចេញបណ្ដើរៗ ហើយក៏កំពុងបន្តគាស់ទៀត ដែលតាមពួកគាត់ដឹងគឺគាស់រហូតដល់អស់ទាំងស្រុង ។
ប្រជាពលរដ្ឋដដែល បានរម្លឹកថា ពីដើមរៀងមកគ្មានផ្លូវរថភ្លើងនៅផ្លូវលេខ១០៥Kនេះទេ គឺផ្លូវរថភ្លើងខាងលើទើបតែត្រូវបានក្រុមហ៊ុនរ៉ូយ៉ាល់រេលវ៉េ សាងសង់ប៉ុន្មានឆ្នាំចុងក្រោយនេះប៉ុណ្ណោះ ហើយនៅពេលចាប់ផ្ដើមសាងសង់ដំបូង មហាជនបានរិះគន់ខ្លាំងណាស់ព្រោះមិនសមទំនង និងគិតថារញ៉េរញ៉ៃ។ ប៉ុន្តែទីបំផុតក្រុមហ៊ុននោះ នៅតែសាងសង់រហូតដល់រួចរាល់ ហើយក្រោយមកបានបង្កឲ្យមានគ្រោះថ្នាក់ចរាចរណ៍កើតឡើង បណ្ដាលឲ្យមានអ្នកដួលម៉ូតូញឹកញាប់ និងមានគ្រោះថ្នាក់រវាងរថយន្ត និងភ្លើងថែមទៀតផង ។
ពួកគាត់បានបញ្ជាក់ប្រាប់ទៀតថា ក្រោយពីរថភ្លើងដំណើរការដឹកភ្លៀវ ចេញនិងចូលអាកាសយានដ្ឋានអន្តរាជាតិភ្នំពេញ បានមួយរយៈប៉ុណ្ណោះ ក៏លែងដំណើរការទៅវិញ ប៉ុន្តែផ្លូវដែកនោះ ត្រូវបានទុកចោលនៅកណ្ដាលផ្លូវលេខ១០៥Kនេះ រាប់ឆ្នាំ និងបានបង្កឲ្យមានគ្រោះថ្នាក់ដួលម៉ូតូជាបន្តបន្ទាប់រហូតមកដែរ។ ដោយឡែកចុងក្រោយ គឺនៅម៉ោង៤និង៤០នាទីល្ងាចថ្ងៃទី០៣ ខែកក្កដា ឆ្នាំ២០២៥ មាននិស្សិតស្រីម្នាក់ បានជិះម៉ូតូតាមផ្លូវនោះ ខណៈដែលមេឃកំពុងធ្លាក់ភ្លៀងខ្លាំង បណ្ដាលឲ្យរអិលក្រឡាច់ផ្លូវដែកនោះដួលម៉ូតូ ហើយត្រូវរថយន្តកិនបែកក្បាលស្លាប់ភ្លាមៗ នៅត្រង់ចំណុចមុខផ្សាតាំងកសាង ភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
ប្រភពខាងលើបានរៀបរាប់ប្រាប់ផងដែរថា ក្រោយពីកើតមានឧប្បត្តិហេតុនេះហើយ មហាជនបានធ្វើការរិះគន់កាន់តែខ្លាំងឡើងៗ ទើបនៅថ្ងៃបន្ទាប់គឺនៅវេលាព្រឹកថ្ងៃទី៤ ខែកក្កដា មន្ទីរសាធារណៈការ និងដឹកជញ្ជូនរាជធានីភ្នំពេញ និងក្រុមហ៊ុនរ៉ូយ៉ាល់រេលវ៉េ បានអ៊ុតកៅស៊ូលុបផ្លូវដែកនោះ ។ ប៉ុន្តែចំណាត់ការនេះ នៅតែទទួលការរិះគន់យ៉ាងខ្លាំងពីមហាជនដដែល ដោយពួកគាត់ស្នើរសុំឲ្យដកផ្លូវដែកនេះចេញតែម្ដង ទើប១ថ្ងៃបន្ទាប់ទៀត គឺនៅថ្ងៃទី០៥ ខែកក្កដា ក្រុមហ៊ុនរ៉ូយ៉ាល់រេលវ៉េ បានសហការជាមួយក្រសួងសាធារណការ និងដឹកជញ្ជូន ។ រួមជាមួយមន្ទីរសាធារណការ និងដឹកជញ្ជូនរាជធានីភ្នំពេញ បានគាស់យកផ្លូវរថភ្លើងចេញតែម្ដង ហើយនៅប៉ុន្មានថ្ងៃខាងមុខនិងគាស់យកចេញអស់ទាំងស្រុងហើយ ៕
ចែករំលែកព័តមាននេះ