ទីក្រុងវ៉ាស៊ីនតោន៖ លោកត្រាំបញ្ចេញប្រតិកម្មតបទៅនឹងដំណឹងថារុស្ស៊ីបានចល័តទ័ព៥ម៉ឺននាក់ទៅដាក់ពង្រាយនៅតាមបណ្ដោយព្រំដែនអ៊ុយក្រែនដើម្បីត្រៀមចេញប្រតិបត្តិការសឹក។ កងទ័ពទាំងនោះកំពុងប្រមូលផ្ដុំគ្នាក្បែរតំបន់ស៊ូមី (Sumy) របស់អ៊ុយក្រែន។ គេបារម្ភថារុស្ស៊ីអាចនឹងបើកយុទ្ធនាការវាយលុករដូវក្ដៅ។ បើដូច្នេះមែន វាផ្ទុយពីបំណងប្រាថ្នារបស់លោកត្រាំដែលចង់បិទបញ្ចប់សង្គ្រាមឱ្យបានឆាប់។
លោកត្រាំថ្លែងថាយើងកំពុងរង់ចាំមើលតើនឹងមានអ្វីកើតឡើង។ លោកកំពុងតាមដានបញ្ហានេះដោយយកចិត្តទុកដាក់ជាទីបំផុត។ បន្ទាប់ពីឡើងកាន់អំណាចកាលពីខែមករា លោកត្រាំតែងតែខិតខំធ្វើឱ្យមានបទឈប់បាញ់ និងចង់បញ្ចប់សង្គ្រាមឱ្យបានឆាប់។ ប៉ុន្តែភាគីទាំង២ជួបមុខគ្នា២ដងគ្មានសម្រេចបានសាច់ការអ្វីទេក្រៅពីយល់ព្រមដូរឈ្លើយសឹកគ្នាទៅវិញទៅមកដែលគេគិតថាមិនមែនជារឿងទេ។ រឿងដែលសំខាន់គឺបទឈប់បាញ់ដ៏ពេញលេញដើម្បីឈានទៅរកការចរចាសន្តិភាព។
ឥឡូវនេះនៅលើសមរភូមិយោធា រុស្ស៊ីកំពុងមានប្រៀប។ ពួកគេបន្តវាយសម្រុកទៅមុខទោះបីដោយសន្សឹមៗយ៉ាងណាក្ដីដើម្បីកាន់កាប់ទឹកដីអ៊ុយក្រែនឱ្យបានច្រើន។ នេះនិយាយអំពីយុទ្ធនាការជើងគោក។ ចំណែកនៅក្នុងយុទ្ធនាការជើងអាកាសវិញ រុស្ស៊ីបញ្ជូនដ្រូន និងមីស៊ីលវាយប្រហារទីក្រុងតូចធំរបស់អ៊ុយក្រែនជារៀងរាល់ថ្ងៃ។
ក្រុមសម្ព័ន្ធមិត្តនៅអឺរ៉ុបបន្តផ្ដល់ជំនួយយោធាទៅឱ្យអ៊ុយក្រែនជាហូរហែ។ ប៉ុន្តែជំនួយដែលសំខាន់គឺអាមេរិក។ តើអាមេរិកនឹងបន្តផ្ដល់ជំនួយដូចជំនាន់លោកបៃដិនដែរឬទេ? នេះជាចំណោទសួរដ៏ធំមួយខណៈដែលលោកត្រាំកំពុងខិតខំឱ្យមានកិច្ចព្រមព្រៀងសន្តិភាព។ លោកធ្លាប់ព្រមានដកខ្លួនថយទាំងស្រុងបើសិនភាគីទាំង២មិនខិតខំចរចាឱ្យមានបទឈប់បាញ់៕
ចែករំលែកព័តមាននេះ