ទីក្រុងវ៉ាស៊ីនតោន៖ លោកត្រាំចេញមកបដិសេធព័ត៌មានដែលផ្សាយថារដ្ឋាភិបាលរបស់លោកចង់ប្រើវិធីដោះដូរមិនឱ្យអ៊ីរ៉ង់ផលិតអាវុធនុយក្លេអ៊ែរទេ ដូច្នេះអាមេរិកសុខចិត្តចំណាយលុយ៣០ពាន់លានដុល្លារជួយសាងសង់រោងចក្រនុយក្លេអ៊ែរ (សម្រាប់ផលិតអគ្គិសនី) ឱ្យអ៊ីរ៉ង់។ ត្រាំសូមបញ្ជាក់ឡើងវិញថាព័ត៌មាននេះមិនពិតទេ។
ការថ្លែងដូច្នេះបន្ទាប់ពីទូរទស្សន៍ស៊ីអឹនអឹន (CNN) ផ្សាយមុនគេកាលពីថ្ងៃព្រហស្បតិ៍ និងក្រោយមកទៀតទូរទស្សន៍អឹនប៊ីស៊ី (NBC) ផ្សាយកាលពីថ្ងៃសុក្រថា «ប៉ុន្មានថ្ងៃចុងក្រោយនេះរដ្ឋាភិបាលរបស់លោកត្រាំពិគ្រោះគ្នាថាគួរជួយសាងសង់រោងចក្រអគ្គិសនីឱ្យអ៊ីរ៉ង់ដើម្បីឱ្យអ៊ីរ៉ង់ឈប់ចម្រាញ់សារធាតុអ៊ុយរ៉ាញ៉ូម»។ ស៊ីអឹនអឹនដកស្រង់ប្រភពពីមន្ត្រីរដ្ឋាភិបាលអាមេរិកមកផ្សាយថាពួកគេបានដាក់ចេញសំណើមួយចំនួន។
លោកត្រាំដែលមិនសូវត្រូវធាតុគ្នាជាមួយស៊ីអឹនអឹនស្រាប់ផងនោះបានបង្ហោះសារនៅលើបណ្ដាញសង្គមថាតើនរណាចេះនិយាយប្រាប់សារព័ត៌មានក្លែងក្លាយទៅកើតថាលោកចង់ជួយសាងសង់រោងចក្រនុយក្លេអ៊ែរស៊ីវិលតម្លៃ៣០ពាន់លានដុល្លារ? លោកពុំដែលឮទាល់តែសោះនូវភាសាដ៏គួរឱ្យខ្មាសអៀនបែបនេះ។ លោកចាត់ទុកថានោះជាការប្រឌិតព័ត៌មានសុទ្ធសាធ។
នៅដើមសប្ដាហ៍នេះ លោកត្រាំប្រកាសបទឈប់បាញ់រវាងអ៊ីរ៉ង់ និងអ៊ីស្រាអែល។ សង្គ្រាមមួយចម្អិនកំពឹសនេះមិនសាមញ្ញពេកទេ។ គេបារម្ភថាបើមិនបញ្ចប់ឱ្យបានឆាប់ និងជាស្ថាពរទេអាចនឹងរុញច្រានតំបន់មជ្ឈិមបូព៌ាទៅរកមាត់ជ្រោះមរណៈ។ សូម្បីតែឥឡូវនេះក៏ដោយក៏ស្ថានភាពមិនទាន់ស្រួលបួលនៅឡើយទេព្រោះគ្រាន់តែជាបទឈប់បាញ់ប៉ុណ្ណោះ។ អ៊ីរ៉ង់ព្រមានថាខ្លួននឹងវាយបកវិញភ្លាមបើរងការវាយប្រហារពីអ៊ីស្រាអែល ឬអាមេរិក៕
ចែករំលែកព័តមាននេះ