ទីក្រុងកៀវ៖ ថ្ងៃនេះ រុស្ស៊ីវាយប្រហារដ៏ខ្លាំងក្លាជាថ្មីទៅលើទីក្រុងអូដេសាបណ្ដាលឱ្យស្លាប់មនុស្ស២នាក់ និងរបួស១៤នាក់។ អាជ្ញាធរមូលដ្ឋាននិយាយថាដ្រូនបាញ់ចំអគារកម្ពស់២១ជាន់បណ្ដាលឱ្យឆេះយ៉ាងសន្ធោសន្ធៅ។ ការវាយប្រហារទៅលើទីក្រុងកំពង់ផែនៃសមុទ្រខ្មៅលើកនេះជាផ្នែកមួយនៃការវាយប្រហាររបស់រុស្ស៊ីទៅលើទីក្រុងតូចធំនានាទូទាំងប្រទេសអ៊ុយក្រែន។
ទីភ្នាក់ងារសង្គ្រោះបន្ទាន់បានចុះទៅកន្លែងកើតហេតុ និងរកឃើញ២នាក់ប្ដីប្រពន្ធស្លាប់នៅក្នុងថ្លុកឈាមបន្ទាប់ពីផ្ទះល្វែងរបស់ពួកគេរងការវាយប្រហារដោយផ្ទាល់ពីយន្តហោះដ្រូន។ យោងតាមរបាយការណ៍ផ្លូវការរបស់អ៊ុយក្រែនគិតតែនៅក្នុងសប្ដាហ៍នេះមួយប៉ុណ្ណោះ រុស្ស៊ីវាយប្រហារផ្គួបគ្នាដោយដ្រូន និងមីស៊ីលស្លាប់២១នាក់នៅទីក្រុងឌីនីប្រូ (Dnipro) និងស្លាប់៩នាក់នៅទីក្រុងកៀវសុទ្ធតែជាជនស៊ីវិល។ ឥឡូវនេះ រុស្ស៊ីងាកមកសម្រុកវាយប្រហារតំបន់ទីប្រជុំជនកាន់តែខ្លាំងឡើងៗ។
អាជ្ញាធរអ៊ុយក្រែនត្រូវតែជម្លៀសមនុស្សទៅរកទីកន្លែងសុវត្ថិភាព។ រូបវីឌីអូឃ្លីបដែលបង្ហោះដោយភ្នាក់ងារសង្គ្រោះបន្ទាន់បង្ហាញក្រុមអ្នកពន្លត់អគ្គិភ័យកំពុងបាញ់ទឹកពន្លត់ភ្លើង និងឃើញប្រជាជនសម្រុកចុះមកជាន់ក្រោមទាំងសភាពងងឹតសូន្យ។ នៅពេលកំពុងចរចាគ្នាដើម្បីបញ្ចប់សង្គ្រាមដោយសន្តិវិធី រុស្ស៊ីក៏សម្រុកវាយប្រហារកាន់តែខ្លាំងដើម្បីមានប្រៀបនៅលើសមរភូមិយោធា។
ប្រភពខ្លះអះអាងថានៅក្នុងចំណោមអ្នករបួសនៅអគារ២១ជាន់នោះក៏មានកុមារ៣នាក់ផងដែរ។ មន្ត្រីថ្នាក់មូលដ្ឋានប្រាប់ថារុស្ស៊ីបញ្ជូនយន្តហោះដ្រូនជាង២០គ្រឿងទៅវាយប្រហារ។ ក្រៅពីអគារនោះ ដ្រូនក៏បានវាយប្រហារដេប៉ូដាក់ឥវ៉ាន់របស់ក្រុមហ៊ុនឯកជន, ការ៉ាស់សាំងមួយកន្លែងដែលគេទុកចោល (បិទដំណើរការ) និងរថយន្តជាច្រើនគ្រឿង៕
ចែករំលែកព័តមាននេះ