ទីក្រុងញូដេលី៖ នៅទីបំផុត អាជ្ញាធរឥណ្ឌារកឃើញហើយប្រអប់ខ្មៅរបស់យន្តហោះដែលបានធ្លាក់ និងផ្ទុះឆេះនៅក្នុងអណ្ដាតភ្លើងយ៉ាងសន្ធោសន្ធៅកាលពីម្សិលមិញ។ ហេតុការណ៍នោះបណ្ដាលឱ្យស្លាប់មនុស្សស្ទើរតែទាំងអស់ នៅរស់តែម្នាក់ប៉ុណ្ណោះ។ នគរបាលប្រាប់ថាប្រអប់ខ្មៅនោះស្ថិតនៅមិនឆ្ងាយប៉ុន្មានពីកន្លែងកើតហេតុនោះទេ។
ហេតុការណ៍នេះបើមើលតាមកាមេរ៉ាសុវត្ថិភាពពិតជារន្ធត់ណាស់។ យន្តហោះទើបតែហើបកង់ផុតពីដីបានប្រហែល៤០វិនាទីក៏សំយុងក្បាលចុះវិញ និងឆេះតែម្ដងបណ្ដាលឱ្យស្លាប់មនុស្ស២៤១នាក់គិតទាំងអ្នកដំណើរ និងបុគ្គលិករបស់ក្រុមហ៊ុន។ ស្លាប់ប៉ុណ្ណឹងមិនទាន់អស់ទេ។ យន្តហោះជ្រុលទៅធ្លាក់លើអគារស្នាក់នៅរបស់និស្សិតពេទ្យស្លាប់អស់៥នាក់ថែមទៀត។
ឧបទ្ទវហេតុនេះកើតឡើងនៅរដ្ឋគជ់ចារ៉ាត (Gujarat) ដែលជាស្រុកកំណើតរបស់នាយករដ្ឋមន្ត្រីឥណ្ឌា។ ក្រុមកោសល្យវិច័យចាប់ផ្ដើមផ្ទៀងផ្ទាត់ឌីអឹនអេជាបណ្ដើរៗហើយដើម្បីកំណត់អត្តសញ្ញាណរបស់ជនរងគ្រោះ។ រហូតមកដល់ពេលនេះ គេមិនទាន់ដឹងច្បាស់ថាតើ យន្តហោះនេះធ្លាក់ដោយសារមូលហេតុអ្វីពិតប្រាកដទេ។ អាកាសចរណ៍ស៊ីវិលឥណ្ឌាចាប់ផ្ដើមបើកការស៊ើបអង្កេតជាផ្លូវការហើយ។
ថ្ងៃនេះលោកម៉ូឌីចុះសួរសុខអ្នកដំណើរតែម្នាក់គត់ឈ្មោះវិស្វកុមារដែលអាចរួចផុតពីសេចក្ដីស្លាប់។ លោកវិស្វកុមារប្រាប់ថាមកទល់នឹងពេលនេះ សូម្បីតែរូបគាត់ផ្ទាល់ក៏រកនឹកមិនយល់ថាហេតុអ្វីបានជាគាត់នៅរស់ខណៈដែលមនុស្សមួយយន្តហោះស្លាប់អស់រលីង? គាត់ប្រាប់ថាគ្រាន់តែចាប់ចេញដំណើរភ្លាម យន្តហោះក៏គាំងម៉ាស៊ីននៅកណ្ដាលអាកាសតែម្ដង។
ដោយសារមិនអាចហោះឡើងទៅលើបាន យន្តហោះក៏ដាំក្បាលចុះមកក្រោមវិញ និងធ្លាក់ទៅលើអគារនៅក្បែរនោះ។ លោកវិស្វកុមារអង្គុយនៅចំទីតាំងដែលយន្តហោះបុកទង្គិចនឹងអគារ។ ហេតុនេះ ការប៉ះមួយទំហឹងនោះធ្វើឱ្យគាត់ប៉ើងចេញពីកៅអីបន្ទាប់ពីតួយន្តហោះរបេះចេញពីគ្នា។ ដូច្នេះបង្កើតជាចន្លោះសម្រាប់បើកផ្លូវឱ្យគាត់ធ្លាក់ចុះមកក្រោម។ គាត់ថាពេលនោះ ទ្វារយន្តហោះក៏របើកចេញពីគ្នា។ គាត់មិនរង់ចាំយូរទេក៏ប្រឡេះទម្ពក់ខ្សែក្រវាត់ដើម្បីជម្លៀសខ្លួនចេញជាបន្ទាន់។
នាយករដ្ឋមន្ត្រីឥណ្ឌា លោកម៉ូឌី បានបង្ហោះសារនៅលើបណ្ដាញអ៊ិចថាយើងទាំងអស់គ្នាសោកស្ដាយបំផុតចំពោះសោកនាដកម្មនេះ។ ការបាត់បង់ជីវិតរបស់មនុស្សដ៏ច្រើនសន្ធឹកសន្ធាប់ត្រឹមតែមួយប៉ប្រិចភ្នែកបែបនេះជាទិដ្ឋដ៏សោកសៅដែលហួសពីការពិពណ៌នា។ ប្រភពខ្លះថាក្រុមហ៊ុនអាកាសចរណ៍ដឹកអ្នកដំណើរនេះរ៉ាប់រងផ្ដល់ប្រាក់សំណងជាង១១ម៉ឺនដុល្លារទៅឱ្យក្រុមគ្រួសារជនរងគ្រោះម្នាក់ៗ៕
ចែករំលែកព័តមាននេះ