ខេត្តកំពង់ចាម ៖ មនុស្សម្នាក្មេងចាស់ប្រុសស្រី បាននាំគ្នាភ្ញាក់ផ្អើលដោយឃើញឃ្លាំងស្តុកស្រាបៀររបស់លោក ញ៉ វេង មួយកន្លែងនៅភូមិជ្រោយថ្ម សង្កាត់បឹងកុក ក្រុងកំពង់ចាម ត្រូវបានអគ្គិភ័យឆាបឆេះចេញជាអណ្ដាតភ្លើងក្មួលខ្មាញ់…
ខេត្តកំពង់ចាម ៖ មនុស្សម្នាក្មេងចាស់ប្រុសស្រី បាននាំគ្នាភ្ញាក់ផ្អើលដោយឃើញឃ្លាំងស្តុកស្រាបៀររបស់លោក ញ៉ វេង មួយកន្លែងនៅភូមិជ្រោយថ្ម សង្កាត់បឹងកុក ក្រុងកំពង់ចាម ត្រូវបានអគ្គិភ័យឆាបឆេះចេញជាអណ្ដាតភ្លើងក្មួលខ្មាញ់ ។
ហេតុការណ៍នេះបានកើតឡើង នៅវេលាម៉ោង៧និង២៥នាទីយប់ ថ្ងៃទី១១ មិថុនា ឆ្នាំ២០២៥ ហើយត្រូវបានលោកឧត្តមសេនីយ៍ស្នងការនគរបាលខេត្តបញ្ជាឲ្យរថយន្តពន្លត់អគ្គិភ័យចេញអន្តរាគមន៍បាញ់ទឹកពន្លត់ភ្លាមៗ។
សមត្ថកិច្ចមូលដ្ឋានបានប្រាប់ឲ្យដឹងថា ដោយទទួលបានព័ត៌មានពីប្រជាពលរដ្ឋរាយការណ៍មានករណីអគ្គិភ័យឆេះឃ្លាំងស្រាបៀរ ស្ថិតនៅចំណុចភូមិជ្រោយថ្មមកកាន់លោកវីរៈសេនីយ៍ឯកអ៊ឹង ប៊ុន អធិការនគរបាលក្រុងកំពង់ចាម ភ្លាមៗនោះក៏បានដឹកនាំកម្លាំងរបស់អធិការដ្ឋាននគរបាលក្រុងកំពង់ចាម សហការណ៍ជាមួយកម្លាំងការិយាល័យបង្កាពន្លត់អគ្គិភ័យ និងសង្គ្រោះខេត្តដឹកនាំដោយលោកឧត្តមសេនីយ៌ត្រី មិន សុគន្ធវិបុល ស្នងការរងនគរបាលខេត្តលោកលី សុវណ្ណ អភិបាលក្រុងកំពង់ចាម បញ្ជាឱ្យរថយន្តពន្លត់អគ្គិភ័យនៃអធិការដ្ឋាននគរបាលក្រុង ដែលប្រចាំការ២៤ម៉ោងលើ២៤ម៉ោង រួមទាំងរថយន្តពន្លត់អគ្គីភ័យនៃស្នងការដ្ឋាននគរបាលខេត្តចំនួន២គ្រឿងចេញទៅបាញ់ទឹកពន្លត់ជាបន្ទាន់ ។
សមត្ថកិច្ចមូលដ្ឋានបានបន្តឲ្យដឹងទៀតថា នៅក្នុងប្រតិបត្តិការអន្តរាគមន៍ពន្លត់អគ្គិភ័យនេះ ដោយទទួលបញ្ជាពីរឧត្តមសេនីយ៍ទោហេង វុទ្ធី ស្នងការនគរបាលខេត្តក៏បានបញ្ជាឱ្យរថយន្តពន្លត់អគ្គិភ័យនៃអធិការដ្ឋាននគរបាលស្រុកកំពង់សៀម មួយគ្រឿងទៀត ចេញមកជួយបាញ់ទឹកពន្លត់ ។
ក្រោមការយកចិត្តទុកដាក់ពីសំណាក់កម្លាំងចម្រុះក្នុងស្មារតីសាមគ្គីភាព ដោយបានបាញ់ទឹកពន្លត់លើភ្លើងដែលកំពុងឆាបឆេះនោះបានធ្វើឲ្យរលត់បន្តិចម្ដងៗ បានធ្វើឲ្យអគ្គិភ័យត្រូវបានរលត់១០០% នៅវេលាម៉ោង៨និង១០នាទីយប់ថ្ងៃដដែល ។
សូមបញ្ជាក់ថា នៅក្នុងប្រតិបត្តិការនេះ បានប្រើប្រាស់ឡានពន្លត់អគ្គិភ័យ០៤គ្រឿង គឺរថយន្តពន្លត់អគ្គិភ័យខេត្ត០២គ្រឿង, ស្រុកកំពង់សៀម០១គ្រឿង និងរថយន្តអធិការដ្ឋាននគរបាលក្រុងកំពង់ចាម០១គ្រឿង ។ ក្នុងកិច្ចប្រតិបត្តិការនេះប្រើប្រាស់ទឹកជួយពន្លត់អស់ចំនួន ០៧រថយន្ត ចំពោះមូលហេតុ គឺបណ្តាលមកពីឆ្លងចរន្តអំពូលអគ្គិសនី ។
នៅក្នុងហេតុការណ៍គ្រោះអគ្គិភ័យនេះ មិនបណ្ដាលឲ្យភ្លើងឆេះឆ្លងទៅលើផ្ទះប្រជាពលរដ្ឋណាមួយនោះទេ ។ នេះដោយសារកិច្ចអន្តរាគមន៍ទាន់ពេលវេលា ធ្វើឲ្យពលរដ្ឋនៅតំបន់នោះក៏ដូចជា ម្ចាស់ដេប៉ូចែកចាយស្រាបៀររីករាយក្នុងចិត្ត ទោះជាយ៉ាងណាក៏ដោយកម្លាំងពន្លត់អគ្គិភ័យបាននៅកន្លែងកើតហេតុ រហូតដល់វេលាម៉ោងជាង៩យប់ទើបត្រឡប់ទៅកាន់អង្គភាពវិញ ៕
ចែករំលែកព័តមាននេះ