អភិបាលខេត្តកណ្ដាល សំណូមពរដល់បងប្អូនរស់នៅក្រុងតាខ្មៅ ចូលរួមសម្អាតគម្របលូ ចៀសវាងកកស្ទះដោយសំរាម
ខេត្តកណ្ដាល ៖ ដើម្បីកាត់បន្ថយការជន់លិច ដោយជំនន់ទឹកភ្លៀង នៅក្រុងតាខ្មៅ នៅពេលមានភ្លៀងធ្លាក់ម្ដងៗ នារដូវវស្សានេះ លោក គួច ចំរើន…
ខេត្តកណ្ដាល ៖ ដើម្បីកាត់បន្ថយការជន់លិច ដោយជំនន់ទឹកភ្លៀង នៅក្រុងតាខ្មៅ នៅពេលមានភ្លៀងធ្លាក់ម្ដងៗ នារដូវវស្សានេះ លោក គួច ចំរើន អភិបាល នៃគណៈអភិបាលខេត្តកណ្ដាល បានស្នើដល់បងប្អូនប្រជាពលរដ្ឋទាំងអស់ ដែលរស់នៅតាមបណ្ដាផ្លូវនានា ក្នុងក្រុងតាខ្មៅ សូមចូលរួមសម្អាតនៅតាមគម្របលូទាំងអស់ ឱ្យបានស្រឡះល្អ ចៀសវាងកកស្ទះដោយសំរាម ឬបិទគម្របលូទាំងនោះ ។
លោក គួច ចំរើន អភិបាល នៃគណៈអភិបាលខេត្តកណ្ដាល បានធ្វើការសំណូមពរបែបនេះ ក្នុងឱកាសដែលលោកអញ្ជើញដឹកនាំមន្ត្រីជំនាញ មន្ទីរសាធារណការ និងអាជ្ញាធរក្រុងតាខ្មៅ ចុះពិនិត្យការដាក់ប្រព័ន្ធលូ តាមស្ទឹងព្រែកត្នោត ក្នុងសង្កាត់ដើមមៀន និងការស្ដារប្រឡាយនានា ក្នុងភូមិសាស្ត្រក្រុងតាខ្មៅ ដើម្បីរំដោះទឹកភ្លៀងបញ្ចៀសការជន់លិចនៅក្នុងក្រុងតាខ្មៅ រសៀលថ្ងៃទី១១ ខែមិថុនា ឆ្នាំ២០២៥។
លោកអភិបាលខេត្ត បន្តថា ៖ ប្រព័ន្ធលូ មានទំហំធំ ប្រឡាយបានស្ដារបើកមុខទឹក ដែលអាចរំដោះទឹកភ្លៀងបាននៅពេលមានភ្លៀងធ្លាក់ម្ដងៗ ប៉ុន្តែនៅតំបន់ខ្លះ តាមគម្របលូមានលក្ខណៈតូចចង្អៀត ខ្លះទៀតកកស្ទះដោយសារសំរាម ឬមានការបិទគម្របលូដែលបណ្ដាលឱ្យស្ទះចរន្តទឹក ហូរមិនបានល្អ ទើបធ្វើឱ្យតំបន់ខ្លះនៅក្រុងតាខ្មៅ រងការជន់លិចដោយជំនន់ទឹកភ្លៀង ។
ក្នុងឱកាសនោះដែរ លោកអភិបាលខេត្ត បានធ្វើការណែនាំ ឱ្យមន្ត្រីជំនាញពន្លឿនការសាងសង់ ដើម្បីចូលរួមលើកកម្ពស់សោភណភាព សណ្តាប់ធ្នាប់ របៀបរៀបរយ អនាម័យ បរិស្ថាន និងបើកផ្លូវទឹកឱ្យហូរលឿន ចៀសវាងផលប៉ះពាល់ ដោយការស្ទះទឹកបណ្តាលឱ្យលិចផ្លូវ ក្នុងក្រុងតាខ្មៅ និងស្នើដល់បងប្អូនប្រជាពលរដ្ឋទាំងអស់ សូមចូលរួមសហការជាមួយអាជ្ញាធរមូលដ្ឋាន កុំបោះចោលសំរាម ឬកាកសំណល់ផ្សេងៗចូលទៅក្នុងអូរប្រឡាយ ដែលបង្កឱ្យមានការកកស្ទះ ដែលមិនអាចធ្វើឱ្យទឹកភ្លៀងហូរបានលឿនល្អ និងធ្វើឱ្យជន់លិចនៅតំបន់មួយចំនួនក្នុងក្រុងតាខ្មៅ ៕
ចែករំលែកព័តមាននេះ