អតីតនាយករដ្ឋមន្ត្រីថៃ លោក Suchinda Kra prayoon ទទួលមរណភាពក្នុងវ័យ៩១ឆ្នាំ
ទីក្រុងបាងកក ៖ តាមប្រភពពីកាសែតបាងកកប៉ុស្តិ៍ និងសារព័ត៌មានថៃ The Nation នៅព្រឹកថ្ងៃទី១០ ខែមិថុនា ឆ្នាំ២០២៥ បានរាយការណ៍ឱ្យដឹថថា…
ទីក្រុងបាងកក ៖ តាមប្រភពពីកាសែតបាងកកប៉ុស្តិ៍ និងសារព័ត៌មានថៃ The Nation នៅព្រឹកថ្ងៃទី១០ ខែមិថុនា ឆ្នាំ២០២៥ បានរាយការណ៍ឱ្យដឹថថា លោក Suchinda Kraprayoon អតីតនាយករដ្ឋមន្ត្រីថៃ បានទទួលមរណភាពក្នុងជន្មាយុ៩១ឆ្នាំ ដោយជរាពាធ នៅវេលាម៉ោង១:៥៧នាទីរំលងអាធ្រាត្រឈានចូលថ្ងៃទី១០ ខែមិថុនា ឆ្នាំ២០២៥ នៅមន្ទីរពេទ្យ Phramongkutklao នៅទីក្រុងបាងកក។
កើតនៅថ្ងៃទី៦ ខែសីហា ឆ្នាំ១៩៣៣ លោក Suchinda គឺជាឥស្សរជនដ៏សំខាន់មួយរូបនៅក្នុងប្រវត្តិសាស្ត្រថៃ ជាពិសេសក្នុងនាមជាអគ្គមេបញ្ជាការកងទ័ពភូមិន្ទថៃ លោកបានដឹកនាំការធ្វើរដ្ឋប្រហារទម្លាក់នាយករដ្ឋមន្ត្រី លោក Chatichai Choonhavan ក្នុងខែកុម្ភៈ ឆ្នាំ១៩៩១ ហើយក្រោយមកលោកបានក្លាយជានាយករដ្ឋមន្ត្រីថៃទី១៩ នៅថ្ងៃទី៧ ខែមេសា ឆ្នាំ១៩៩២។ លោកក៏ជាសមាជិកនៃក្រុមប្រឹក្សារក្សាសន្តិភាពជាតិ ដែលរបបយោធាបានបង្កើត បន្ទាប់ពីរដ្ឋប្រហារ។
លោក Suchinda ត្រូវបានគ្រប់គ្នាចងចាំបំផុត សម្រាប់តួនាទីរបស់លោកអំឡុងពេលការបះបោរខែឧសភា ឆ្នាំ១៩៩២ នៅពេលដែលការតវ៉ាប្រឆាំងនឹងរដ្ឋាភិបាលរបស់លោកបានបណ្តាលឱ្យសិស្សជាង៥០នាក់ស្លាប់ ព្រមទាំងរបួស និងបាត់ខ្លួនរាប់រយនាក់ផងដែរ។ ព្រឹត្តិការណ៍នោះ ត្រូវបានហៅថា ការបះបោរ «Black May« ដែលនៅទីបំផុតនាំទៅដល់ការលាលែងពីតំណែង នៅថ្ងៃទី២៤ ខែឧសភា ឆ្នាំ១៩៩២ ដែលមានន័យថា លោកកាន់តំណែងបានត្រឹមតែ៤៨ថ្ងៃប៉ុណ្ណោះ មុនពេលលាលែង។
បន្ទាប់ពីចុះចេញពីតំណែង លោក Suchinda មិនសូវបង្ហាញវត្តមានជាសាធារណៈនោះទេ បើទោះបីជាលោកនៅតែជាអ្នកចាស់ទុំទទួលបានការគោរពក្នុងរង្វង់យោធាយ៉ាងណាក៏ដោយ។ នៅក្នុងអាជីពការងាររបស់លោក Suchinda Kraprayoon លោកក៏ធ្លាប់កាន់តំណែងជារដ្ឋមន្ត្រីក្រសួងការពារជាតិផងដែរ៕
ចែករំលែកព័តមាននេះ