រាជធានីភ្នំពេញ ៖ ការជ្រើសរើសគ្រូបង្រៀន ផ្អែកលើកិច្ចព្រមព្រៀងការងារ ជំនួសគ្រូបង្រៀនជាប់កិច្ចសន្យា គ្រូបង្រៀនថ្នាក់ពីរវេន និងគ្រូបង្រៀនថ្នាក់គួប មិនមានផលប៉ះពាល់លើបន្ទុកថវិកានោះទេ ប៉ុន្តែនឹងជួយពង្រឹងគុណភាពគ្រូបង្រៀន ការបង្រៀន…
រាជធានីភ្នំពេញ ៖ ការជ្រើសរើសគ្រូបង្រៀន ផ្អែកលើកិច្ចព្រមព្រៀងការងារ ជំនួសគ្រូបង្រៀនជាប់កិច្ចសន្យា គ្រូបង្រៀនថ្នាក់ពីរវេន និងគ្រូបង្រៀនថ្នាក់គួប មិនមានផលប៉ះពាល់លើបន្ទុកថវិកានោះទេ ប៉ុន្តែនឹងជួយពង្រឹងគុណភាពគ្រូបង្រៀន ការបង្រៀន និងជាការផ្តល់ឱកាសការងារថ្មីដល់យុវជន ជាង១ម៉ឺនកន្លែងថែមទៀត នេះបើតាមក្រសួងអប់រំយុវជន និងកីឡា ។
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីពេលថ្មីៗកន្លងមកនេះបានដឹកនាំកិច្ចប្រជុំស្តីពី ការពិនិត្យ និងសម្រេចចំពោះវិធានការ ដើម្បីរៀបចំគុណវុឌ្ឍិនៃគ្រូបង្រៀន នៅគ្រឹះស្ថានសិក្សាសាធារណៈ ។
យោងតាមការចេញផ្សាយតាមបណ្តាញសង្គមរបស់ក្រសួងអប់រំ បានលើកឡើងថា កិច្ចប្រជុំដើម្បីលើកកម្ពស់សមត្ថភាពគ្រូបង្រៀន និងគុណភាព នៃការបង្រៀននៅតាមគ្រឹះស្ថានបឋមសិក្សា និងមធ្យមសិក្សាសាធារណៈ ការរៀបចំ និងកំណត់គុណវុឌ្ឍិគ្រូបង្រៀនឱ្យបានសមស្រប ពិតជាចាំបាច់ ប្រព័ន្ធទទួលស្គាល់គុណវុឌ្ឍិជាគ្រូបង្រៀនចំណេះដឹងទូទៅ (Accreditation) គឺជាមូលដ្ឋានដ៏សំខាន់សម្រាប់ការអភិវឌ្ឍអាជីពជាគ្រូបង្រៀន (ទាំងជាគ្រូបង្រៀនក្របខ័ណ្ឌ និងមិនមែនក្របខ័ណ្ឌ) ចាប់ពីដំណាក់កាល នៃការជ្រើសរើស និងការអភិវឌ្ឍសមត្ថភាពជាប្រចាំ ដោយផ្អែកលើគោលការណ៍ នៃការរៀបចំនិងកំណត់គុណវុឌ្ឍិគ្រូបង្រៀនចំណេះដឹងទូទៅ ខណៈបច្ចុប្បន្ន ក្រសួងអប់រំ យុវជន និងកីឡា បាននិងកំពុងសហការជាមួយ ក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ ដើម្បីរៀបចំសេចក្តីព្រាងអនុក្រឹត្យអំពីការកំណត់គុណវុឌ្ឍិគ្រូបង្រៀនចំណេះដឹងទូទៅ ដើម្បីដាក់ជូនរាជរដ្ឋាភិបាលពិនិត្យ និងសម្រេច ។
ក្រសួងថា ការកែទម្រង់វិធីសាស្ត្រ នៃការជ្រើសរើសនិងបណ្តុះបណ្តាលសិស្ស និស្សិត នៅតាមសាលាគរុកោសល្យ ដើម្បីឱ្យសិស្ស និស្សិត បានបំពេញគុណវុឌ្ឍិជាជាគ្រូបង្រៀនពេញលក្ខណៈ ក្នុងការជ្រើសរើសឱ្យចូលបង្រៀន ជាវិធីសាស្ត្រកសាងជាមុននូវធនធានមនុស្សមានលក្ខណៈសម្បត្តិជាគ្រូបង្រៀន ដែលអាចឆ្លើយតបយ៉ាងប្រសើរចំពោះតម្រូវការ នៃការជ្រើសរើសគ្រូបង្រៀន។ ទន្ទឹមនេះ ការប្រើប្រាស់ថវិកាសម្រាប់គាំទ្រការជ្រើសរើសនិងការបណ្តុះបណ្តាល ក៏នឹងមានប្រសិទ្ធភាពប្រសើរជាងមុន ។
យោងតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី នាយករដ្ឋមន្ត្រី ក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា២០២៣-២០២៤ និងទិសដៅការងារឆ្នាំសិក្សា២០២៤-២០២៥ បានណែនាំឱ្យ ដោះស្រាយករណីគ្រូបង្រៀនជាប់កិច្ចសន្យា ដូចជា ៖ ការកំណត់សុពលភាពកិច្ចសន្យាសម្រាប់រយៈពេល ២ ឆ្នាំ ,ពិនិត្យលទ្ធភាព លើការផ្តល់ក្របខ័ណ្ឌដល់គ្រូបង្រៀនជាប់កិច្ចសន្យាចំណេះដឹងទូទៅ, ការកែលម្អប្រព័ន្ធជ្រើសរើស និងបណ្តុះបណ្តាលគ្រូបង្រៀន និងការផ្តល់ក្របខ័ណ្ឌមន្ត្រីរាជការដល់គ្រូបង្រៀនជាប់កិច្ចសន្យានៅបឋមសិក្សា គួរអនុវត្តផ្អែកលើគោលការណ៍ តម្រូវការគ្រូបង្រៀន អតីតភាពការងារបង្រៀន និងមានឥរិយាបថល្អ និងមិនប្រព្រឹត្តខុសនឹងក្រមសីលធម៌ វិជ្ជាជីវៈ ព្រមទាំងបានបំពេញល័ក្ខខ័ណ្ឌ គរុកោសល្យស្របតាមគោលការណ៍កំណត់របស់ក្រសួងអប់រំ យុវជន និងកីឡា ៕
ចែករំលែកព័តមាននេះ