ខេត្តកណ្តាល ៖ កម្មការិនីរោងចក្រម្នាក់ ចាក់សោទៅធ្វើការដោយបានទុកម៉ូតូ ១គ្រឿង នៅក្នុងផ្ទះ លុះពេលត្រលប់មកវិញ ត្រូវភ្លើងឆេះខ្ទេចអស់។ ហេតុការណ៍នេះ បានកើតឡើងកាលពីព្រឹកថ្ងៃទី៧…
ខេត្តកណ្តាល ៖ កម្មការិនីរោងចក្រម្នាក់ ចាក់សោទៅធ្វើការដោយបានទុកម៉ូតូ ១គ្រឿង នៅក្នុងផ្ទះ លុះពេលត្រលប់មកវិញ ត្រូវភ្លើងឆេះខ្ទេចអស់។ ហេតុការណ៍នេះ បានកើតឡើងកាលពីព្រឹកថ្ងៃទី៧ ខែមិថុនា ឆ្នាំ២០២៥ នៅចំណុចបន្ទប់ជួល ក្នុងភូមិបត្តាជី១ សង្កាត់ព្រែកហូរ ក្រុងតាខ្មៅ ខេត្តកណ្តាល ។
សមត្ថកិច្ចបានឲ្យដឹងថា ម្ចាស់បន្ទប់មានឈ្មោះ ទីញ សុខទួន ភេទស្រី អាយុ៣០ឆ្នាំ មុខរបរ កម្មការិនីរោងចក្រ រស់នៅភូមិបាក់ត្រគួន ឃុំលាចភ្នំក្រវ៉ាញ់ ខេត្តពោធិ៍សាត់ បច្នុប្បន្ន ជួលបន្ទប់កើតហេតុខាងលើ ។
បើយោងតាមប្រភពព័ត៌មានពីម្ចាស់បន្ទប់ជួល បានឲ្យដឹងថា មុនពេលកើតហេតុ រូបគាត់បានរៀបចំទៅធ្វើការដូចធម្មតា ដោយបានទុកម៉ូតូ ១គ្រឿង ក្នុងបន្ទប់ រួចចាក់ចេញទៅធ្វើការរោងចក្រក្បែរនោះបាត់ ស្រាប់តែមានបងប្អូនប្រជាពលរដ្ឋ ទាក់ទងប្រាប់ថា មានភ្លើងឆេះបន្ទប់ ភ្លាមៗគាត់ក៏ប្រញាប់មកពីកន្លែងធើ្វការវិញមកបន្ទប់ជួលវិញ ក៏បានឃើញបន្ទប់ត្រូវភ្លើងឆេះបណ្ដាលឲ្យខូចខាតសម្ភារអស់ ក្នុងបន្ទប់មានដូចជាម៉ូតូ Drem125 (០១៧) មួយគ្រឿង ទូរសព្ទ ១គ្រឿង សម្ភារប្រើប្រាស់មួយធំ ។
ក្នុងហេតុការណ៍អគ្គិភ័យខាងលើនេះ មិនបណ្ដាលឲ្យមាននរណាម្នាក់រងរបួស ឬប៉ះពាល់អាយុជីវិតនោះ គ្រាន់តែខូចខាតសម្ភារៈ ក្នុងបន្ទប់តែប៉ុណ្ណោះ ។ ប្រតិបត្តិការបាញ់ពន្លត់នេះ កម្លាំងសមត្ថកិច្ចប្រើប្រាស់រថយន្តពន្លត់អគ្គិភ័យ ១គ្រឿង គ្រប់គ្រងមិនអោយរាលបន្តឡើយ ៕
ចែករំលែកព័តមាននេះ