ទីក្រុងម៉ូស្គូ៖ រុស្ស៊ីចាប់ផ្ដើមបញ្ចេញប្រតិកម្មតបទៅលោកត្រាំដែលបានធ្វើអត្ថាធិប្បាយករណីរុស្ស៊ី និងអ៊ុយក្រែនបន្តធ្វើសង្គ្រាមដ៏បង្ហូរឈាមនោះប្រៀបបាននឹងនឹងកូនក្មេងវាយគ្នានៅក្នុងសួនច្បារ។ វិមានក្រឹមឡាំងថ្លែងថានេះមិនមែនជាល្បែងកូនក្មេងទេ ប៉ុន្តែជាសង្គ្រាមស្លាប់-រស់ដើម្បីជោគវាសនា-អនាគតរបស់រុស្ស៊ី ឬហៅម៉្យាងទៀតថាជាការតស៊ូដើម្បីភាពរស់រានមានជីវិតរបស់ប្រទេសជាតិខ្លួន។
លោកត្រាំបានប្រើប្រាស់ឧបមានវិធី (analogy) ដូចខាងលើនេះនៅពេលលោកទទួលជួបអធិការបតីអាល្លឺម៉ង់នៅវិមានពងក្រពើ (នៃសេតវិមាន)។ លោកយល់ថានៅពេលពួកគេវក់នឹងការប្រឡែងគ្នាលេង យើងកុំទាន់ឃាត់ឃាំងពួកគេ។ សុខចិត្តបណ្ដោយឱ្យពួកគេលេងមួយឆ្អែតមួយឆ្អន់សិនចុះ។ ដល់ពេលពួកគេលេងអស់ចិត្តអស់ចង់ហើយចាំយើងទៅឃាត់ពួកគេ។
បន្ទាប់ពីសន្យាថាប្រើពេល២៤ម៉ោងត្រូវតែបញ្ចប់សង្គ្រាមអ៊ុយក្រែនឱ្យបាន ឥឡូវនេះ ត្រាំចាប់ផ្ដើមញ៉ាក និងចង់រាថយដូចឆ្មាខ្លាចទឹកក្ដៅ។ ភាគីទាំង២និយាយស្ដាប់គ្នាលែងបានហើយ ប្រៀបដូច «ចាប់ក្ដាមដាក់ចង្អេរ»។ អ៊ុយក្រែនបានរៀបចំផែនការជាង១ឆ្នាំកន្លះដើម្បីវាយប្រហារមូលដ្ឋានទ័ពអាកាសជាច្រើនកន្លែងនៅរុស្ស៊ីបណ្ដាលឱ្យឆេះយន្តហោះជាង៤០គ្រឿង គិតជាទឹកប្រាក់៧ពាន់លានដុល្លារ។ អ៊ុយក្រែនមិនបានប្រាប់លោកត្រាំសូម្បីតែ១ម៉ាត់។ នៅក្នុងការសន្ទនាគ្នាតាមទូរស័ព្ទកាលពីយប់ថ្ងៃពុធ លោកត្រាំស្នើសុំឱ្យលោកពូទីនប្រើប្រាស់ការអត់ធ្មត់ និងឈប់សងសឹកគ្នាតទៅទៀត។ ប៉ុន្តែលោកពូទីនមិនស្ដាប់។
អ្នកនាំពាក្យវិមានក្រឹមឡាំង លោកប៉េស្កូស មិនបានបញ្ចេញប្រតិកម្មបែបវាយប្រហារទេ។ លោកយល់ថាលោកត្រាំគិតបែបណាជាទស្សនៈរបស់គាត់ទៅចុះ។ ប៉ុន្តែសម្រាប់រុស្ស៊ី សង្គ្រាមអ៊ុយក្រែនជារឿងដ៏ចាំបាច់ដើម្បីភាពរស់រានមានជីវិតនៃជាតិរបស់ខ្លួន។ បញ្ហានេះពាក់ព័ន្ធនឹងផលប្រយោជន៍ជាតិរបស់យើង, ពាក់ព័ន្ធនឹងសន្តិសុខជាតិរបស់យើង, ពាក់ព័ន្ធនឹងអនាគតរបស់យើង និងកូនចៅរបស់យើងតទៅជំនាន់ក្រោយៗទៀត។
លោកត្រាំចង់ធ្វើជាអ្នកពន្លត់ភ្លើងសង្គ្រាមទូទាំងពិភពលោក។ លោកនៅតែបន្តសម្រុះសម្រួលគ្នានៅក្នុងបញ្ហាអ៊ុយក្រែន។ ប៉ុន្តែលោកចាប់ផ្ដើមបង្ហាញអារម្មណ៍តឹងតែងនៅក្នុងចិត្តយ៉ាងខ្លាំងនៅពេលបញ្ហានេះពិបាកដោះស្រាយ។ គាត់ទទួលអារម្មណ៍កិច្ចខិតខំប្រឹងប្រែងរបស់គាត់ហាក់ដូចជាទទួលបានផលតិចតួចស្ដួចស្ដើងបំផុត។ ត្រាំចង់ដោះស្រាយបញ្ហាអ៊ុយក្រែនឱ្យឆាប់ចប់នឹងអាលងាកទៅគិតគូរអំពីបញ្ហាអ្វីផ្សេង។ គាត់មានបញ្ហាច្រើនទៀតដែលត្រូវធ្វើ។ ប៉ុន្តែឥឡូវនេះធ្មេចបើកៗតាំងពីគាត់ឡើងកាន់អំណាចរហូតមកដល់ពេលនេះ៤ខែកន្លះទៅហើយមិនទាន់ដឹងកោះត្រើយនៅឯណានៅឡើយទេ។
ត្រាំថ្លែងប្រាប់លោកមើស (Merz) នៅចំពោះមុខអ្នកសារព័ត៌មានថាយើងចំណាំមើលចុះ, ពេលខ្លះក្មេងៗវាយតប់គ្នាយ៉ាងវីវក់បំផុត។ ពួកគេស្អប់គ្នា និងវាយគ្នានៅក្នុងសួនច្បារ។ ពេលឃើញដូច្នេះ យើងមានចិត្តចង់ទៅឃាត់ពួកគេ។ ពួកគេមិនឱ្យយើងឃាត់ទេ។ ពួកគេគិតតែពីវាយគ្នាជាបន្តទៀត។ ដូច្នេះ មិនចាំបាច់ឃាត់ពួកគេទេ។ យើងសុខចិត្តបណ្ដោយឱ្យពួកគេវាយតប់គ្នាឱ្យអស់ចិត្តសិនចុះ។ រួចហើយចាំឃាត់ពួកគេតាមក្រោយ។
បន្ទាប់ពីច្បាំងគ្នាជាងបីឆ្នាំ រុស្ស៊ី និងអ៊ុយក្រែនចាប់ផ្ដើមបោះដៃរកគ្នា និងជួបគ្នាបាន២ដងនៅតួកគី។ ប៉ុន្តែកិច្ចជំនួបនេះមិនសូវទទួលបានលទ្ធផលជាដុំកំភួនទេ។ ក្រឡេកទៅមើលស្ថានការណ៍សឹកវិញម្ដង រុស្ស៊ីបន្តវាយប្រហារអ៊ុយក្រែនដោយដ្រូន និងមីស៊ីលស្លាប់មនុស្ស៤នាក់នៅទីក្រុងកៀវកាលពីព្រឹកមិញ។ ក្រៅពីនេះ រុស្ស៊ីវាយប្រហារទីតាំង៦កន្លែងដោយប្រើប្រាស់ដ្រូនជាង៤រយគ្រឿង និងមីស៊ីលជាង៤០គ្រាប់។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ