ទីក្រុងកៀវ៖ បន្ទាប់ពីលោកត្រាំ និងលោកពូទីនទើបតែសន្ទនាគ្នាតាមទូរស័ព្ទហើយមិនទាន់បានប៉ុន្មានផង រុស្ស៊ីវាយប្រហារអ៊ុយក្រែនមួយចាស់ដៃបណ្ដាលឱ្យស្លាប់មនុស្សយ៉ាងតិច៥នាក់។ នៅក្នុងចំណោមនោះ មានកុមារម្នាក់អាយុ១ឆ្នាំ ស្ត្រីជាម្ដាយ និងជីដូន។ ហេតុការណ៍នេះកើតឡើងនៅទីក្រុងប្រាយលូគី (Pryluky)នៅភាគខាងជើង។…
ទីក្រុងកៀវ៖ បន្ទាប់ពីលោកត្រាំ និងលោកពូទីនទើបតែសន្ទនាគ្នាតាមទូរស័ព្ទហើយមិនទាន់បានប៉ុន្មានផង រុស្ស៊ីវាយប្រហារអ៊ុយក្រែនមួយចាស់ដៃបណ្ដាលឱ្យស្លាប់មនុស្សយ៉ាងតិច៥នាក់។ នៅក្នុងចំណោមនោះ មានកុមារម្នាក់អាយុ១ឆ្នាំ ស្ត្រីជាម្ដាយ និងជីដូន។ ហេតុការណ៍នេះកើតឡើងនៅទីក្រុងប្រាយលូគី (Pryluky)នៅភាគខាងជើង។ រដ្ឋមន្ត្រីមហាផ្ទៃអ៊ុយក្រែន លោកអ៊ីហ័រ ឃ្លីមេនកូ (Ihor Klymenko) ថ្លែងថាដ្រូនរបស់រុស្ស៊ី៦គ្រឿងហោះទៅវាយប្រហារទីតាំងរបស់ជនស៊ីវិលរស់នៅទីក្រុងខាងលើនេះតាំងពីមុនព្រឹកព្រហាមថ្ងៃព្រហស្បតិ៍។ មនុស្សយ៉ាងតិច៩នាក់ក៏រងរបួសនៅក្នុងហេតុការណ៍នេះផងដែរ។
គេមិនដឹងថាតើនៅក្នុងការសន្ទនាគ្នានោះ លោកទាំង២បាននិយាយអ្វីខ្លះទេទើបបានជានិយាយរួចទើបតែបានប៉ុន្មានម៉ោងប៉ុណ្ណោះ រុស្ស៊ីវាយប្រហារដូច្នេះ។ លោកត្រាំថ្លែងថាលោកពូទីនបង្ហាញកំហឹងយ៉ាងក្រេវក្រោធចំពោះករណីដែលអ៊ុយក្រែនវាយប្រហារថ្មីៗនេះ។ លោកពូទីននិយាយដោយសម្ដីខ្លាំងៗប្រាប់លោកត្រាំថារុស្ស៊ីត្រូវតែសងសឹកករណីដែលអ៊ុយក្រែនបញ្ជូនដ្រូនជាងមួយរយគ្រឿងទៅវាយប្រហារមូលដ្ឋានទ័ពអាកាសជាច្រើនកន្លែងរបស់រុស្ស៊ីចម្ងាយជាង៤ពាន់គីឡូម៉ែត្រពីព្រំដែន។
គេនៅចាំបានថាកាលពីម្សិលមិញ លោកពូទីនធ្លាប់និយាយម្ដងហើយអំពីការវាយប្រហាររបស់អ៊ុយក្រែន។ លោកចាត់ទុកថាករណីដែលអ៊ុយក្រែនដាក់គ្រាប់បែកបំផ្ទុះស្ពានជាច្រើនកន្លែងនៅប្រ៊ីយ៉ង់ និងខឺស បណ្ដាលឱ្យស្លាប់មនុស្ស៧នាក់ និងរបួសជាង១០០នាក់ជាអំពើភេរវកម្ម។ លោកពូទីនចង់បង្ហាញថាមូលហេតុនេះហើយដែលលោកមិនទទួលយកបទឈប់បាញ់ជាដាច់ខាត។ លោកដាក់ជាសំណួរថាតើឱ្យរុស្ស៊ីចរចាជាមួយពួកភេរវកម្មដូចម្ដេចនឹងកើត? ហើយចរចាគ្នាបានការអ្វី?
ទីក្រុងប្រាយលូគីកាលពីមុនផ្ទុះសង្គ្រាមមានមនុស្សរស់នៅ៥ម៉ឺននាក់ ស្ថិតនៅចម្ងាយមួយរយគីឡូម៉ែត្រឆៀងខាងកើតទីក្រុងកៀវ។ ទីក្រុងនេះស្ថិតនៅឆ្ងាយពីសមរភូមិជើងគោក និងមិនមានមូលដ្ឋាន ឬបរិក្ខារយោធានៅទីនោះទេ។ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងថារុស្ស៊ីបញ្ជូនដ្រូន១០៣គ្រឿង និងមីស៊ីល១គ្រាប់វាយប្រហារទីតាំងជាច្រើនកន្លែងនៅវេលាយប់អធ្រាត្ររួមមានតំបន់ដូញ៉ែត (Donetsk), ខាគីវ (Kharkiv), អូដេសា (Odesa), ស៊ូមី (Sumy), ឆឺនីហ៊ីវ (Chernihiv), ឌីនីប្រូ (Dnipro) និងខឺសុន (Kherson)។
លោកហ្សេឡិនឆ្លៀតឱកាសនេះអំពាវនាវជាថ្មីម្ដងទៀតថាសហគមន៍អន្តរជាតិ ជាពិសេស មហាអំណាចលោកខាងលិតត្រូវចាត់វិធានការសរុបដោយដាក់ដាក់ទណ្ឌកម្ម និងសម្ពាធជាអតិបរមាទៅលើរុស្ស៊ី។ ទោះបីលោកស្នើសុំជួបគ្នាផ្ទាល់ជាមួយលោកពូទីនដើម្បីដោះស្រាយបញ្ហានេះ ប៉ុន្តែលោកពូទីនគ្មានអារម្មណ៍ចង់ជួបគ្នាទេ។ ម៉្យាងទៀត លោកពូទីនក៏មិនព្រមដកថយសូម្បីតែបន្តិចនៅក្នុងលក្ខខណ្ឌទាមទាររបស់គាត់៕
ចែករំលែកព័តមាននេះ