រាជធានីភ្នំពេញ ៖ ដើម្បីគ្រប់គ្រងទឹកឲ្យមានចីរភាព សម្ដេចវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានឱ្យដឹងថា រាជរដ្ឋាភិបាលកម្ពុជា…
រាជធានីភ្នំពេញ ៖ ដើម្បីគ្រប់គ្រងទឹកឲ្យមានចីរភាព សម្ដេចវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានឱ្យដឹងថា រាជរដ្ឋាភិបាលកម្ពុជា បានកំពុងធ្វើការងារជាមួយរដ្ឋាភិបាលកូរ៉េ តាមរយៈកយកា-KOICAក្នុងការ សិក្សាអំពីការធ្វើប្រឡាយដោយតភ្ជាប់ពីទន្លេមេង្គលើ ទៅទន្លេសាប។
ការលើកឡើងរបស់សម្ដេចបវរធិបតី ហ៊ុន ម៉ាណែត នាឱកាសអញ្ជើញចូលរួមកិច្ចប្រជុំសមាជរដ្ឋសភា និងព្រឹទ្ធសភា លើកទី១ នៅវិមានរដ្ឋសភា នាល្ងាចថ្ងៃទី៣ ខែមិថុនា ឆ្នាំ២០២៥ ។
ក្នុងកិច្ចប្រជុំសម្ដេចបវរធិបតី ហ៊ុន ម៉ាណែត បានគូសបញ្ជាក់ឲ្យដឹងថា ៖ «ខ្ញុំបានធ្វើការងារជាមួយរដ្ឋាភិបាលកូរ៉េ តាមរយៈកយកាសិក្សាអំពីការតភ្ជាប់ប្រឡាយតភ្ជាប់ពីទន្លេមេង្គលើ ទៅទន្លេសាប ដើម្បីភ្ជាប់ពីទន្លេមេង្គលើ ទៅស្ទឹងសែន ចាក់ទៅទន្លេសាប ដើម្បីធានាតុល្យភាពទឹក» ។
សម្ដេចបវរធិបតី បន្ដថា ហើយបើមានលទ្ធភាព ទៅថ្ងៃខាងមុខ នឹងតភ្ជាប់ពីទន្លេសាប ទៅប៉ោយប៉ែត ថែមទៀតផង ។
ទាក់ទងនឹងការគ្រប់គ្រងទឹក សម្ដេចបវរធិបតី គូសបញ្ជាក់ថា «ថ្ងៃខាងមុខ អាចមានលទ្ធភាពភ្ជាប់ពីបឹងទន្លេសាប ឆ្ពោះទៅកន្លែងមួយជិតប៉ោយប៉ែត ក្នុងការធានាដឹកជញ្ជូនរបស់យើង បើសិនព្រែកជីកហ្វូណនតេជោ ធ្វើហើយ ប្រព័ន្ធដឹកជញ្ជូនផ្លូវទឹកយើងកាត់តែសំខាន់» ។
សម្ដេចបវរធិបតី បន្ថែមថា «ប៉ុន្ដែពេលមួយជំហ៊ាននេះ គឺបានឱ្យសិក្សាមួយជំហ៊ានសិន អំពីបរិស្ថាន និងប្រព័ន្ធបច្ចេកទេស ធ្វើយ៉ាងអាចភ្ជាប់ទន្លេមេង្គលើ ពីខេត្តស្ទឹងត្រែង ចុះមកស្ទឹងសែន ប្រហែលជា ៧០គីឡូម៉ែត្រ បើសិនធ្វើកន្លែងនេះ អាចធានាបានតុល្យភាពទឹករវាងទន្លេមេង្គ និងទន្លេសាប ហើយអាចធានាដល់ប្រព័ន្ធធារាសាស្ដ្រ និងប្រព័ន្ធទឹកប្រើប្រាស់ នៅទូទាំងប្រទេស» ។
សូមជម្រាបថា ការលើកឡើងរបស់សម្តេចបវរធិបតី ហ៊ុន ម៉ាណែតបន្ទាប់ពីកន្លងមកនេះ ការគ្រប់គ្រងទឹកនៅមានកំណត់ គឺពេលខ្លះពលរដ្ឋខ្វះទឹកប្រើប្រាស់ក្នុងវិស័យកសិកម្មជាដើម ៕
ចែករំលែកព័តមាននេះ