ខេត្តតាកែវ ៖ មានករណីក្រុមសន្តិសុខហៅឃាត់អ្នករត់កង់បីដែលដឹកភ្លៀវចិនសុទ្ធតែអ្នកលេងល្បែងអនឡាញទៅចុះនៅក្នុងបរិវេណអាគារដ៏ធំមួយកន្លែងនៅស្រុកបាទី តែត្រូវបានម្ចាស់កង់បីរត់ផ្លោះរបងចេញរួចទាំងព្រលឹងចុងសក់ ទៅប្តឹងសមត្ថកិច្ចនគរបាលប៉ុស្តិ៍រដ្ឋបាលលំពង់ជួយអន្តរាគមន៍។ តាមការឲ្យដឹងពីម្ចាស់ផាស់អេបថា នៅថ្ងៃទី៣ ខែឧសភា ឆ្នាំ២០២៥ ខ្លួនបានដឹកភ្លៀវចិនពីបូរីពិភពថ្មី…
ខេត្តតាកែវ ៖ មានករណីក្រុមសន្តិសុខហៅឃាត់អ្នករត់កង់បីដែលដឹកភ្លៀវចិនសុទ្ធតែអ្នកលេងល្បែងអនឡាញទៅចុះនៅក្នុងបរិវេណអាគារដ៏ធំមួយកន្លែងនៅស្រុកបាទី តែត្រូវបានម្ចាស់កង់បីរត់ផ្លោះរបងចេញរួចទាំងព្រលឹងចុងសក់ ទៅប្តឹងសមត្ថកិច្ចនគរបាលប៉ុស្តិ៍រដ្ឋបាលលំពង់ជួយអន្តរាគមន៍។
តាមការឲ្យដឹងពីម្ចាស់ផាស់អេបថា នៅថ្ងៃទី៣ ខែឧសភា ឆ្នាំ២០២៥ ខ្លួនបានដឹកភ្លៀវចិនពីបូរីពិភពថ្មី ក្បែរវត្តសំរោងអណ្ដែត រាជធានីភ្នំពេញ មកចុះនៅមុខអាគារមួយកន្លែងនៅភូមិនាល ឃុំលំពង់ ស្រុកបាទី ខេត្តតាកែវ។ ស្របពេលនោះមានក្រុមសន្តិសុខ៤ ទៅ៥នាក់ បានបក់ដៃឃាត់ខ្លួនអោយឈប់។ ដោយមានការភ័យខ្លាចខ្លួនបានរត់ផ្លោះរបងចេញក្រៅ ទៅប្តឹងសមត្ថកិច្ចអោយជួយអន្តរាគមន៍តែម្តងទៅ។
ជុំវិញម្ចាស់រត់ចោលកង់បីនេះ តាមការអោយដឹងពីលោកមេប៉ុស្តិ៍នគរបាលរដ្ឋបាលលំពង់នៅរសៀលថ្ងៃទី៣ ខែមិថុនា ឆ្នាំ២០២៥ នេះថា បានដោះស្រាយហៅម្ចាស់កង់បីមកយករបស់គាត់វិញហើយ។ ចំពោះមូលហេតុដែលគាត់រត់ចោលនោះ គឺគាត់ភ័យព្រោះឃើញចិន និង ចិនដែលគាត់ដឹកឈ្លោះគ្នា ហើយក្រុមសន្តិសុខក៏បានបិទទ្វារបង តែម្ចាស់កង់បីរត់ចេញក្រៅទៅ។
សូមបញ្ជាក់ថា ជុំវិញរឿងនៅអគារស្កឹមស្កៃលេចធ្លោផុតចុងព្រឹក្សា មហាជនដាក់ការសង្ស័យថា ជា អគារសម្រាប់សម្បុកជនជាតិចិនប្រព្រឹត្តបទល្មើស ខណៈក្រុមអាជ្ញាធរអះអាងថាជារោងចក្រផលិតស្បែកជើងយ៉ាងឥតអៀនខ្មាស់ទៅវិញ តើរោងចក្រខ្មោចយក៍អីអត់មានកម្មករ…។ យោងតាមប្រជាពលរដ្ឋលក់ដូរនៅទល់មុខអាគារខាងលើ បានអោយដឹងថា ពួកគាត់លក់ដូរនៅទីនេះ មិនឃើញមានកម្មករចេញចូល ដូចរោងចក្រផលិតស្បែកជើងផ្សេងៗទៀតនោះទេ គឺឃើញមានតែកម្មករផ្នែកអនាម័យ និងផ្នែកជួសជុលបន្តិចបន្តួច តែប៉ុណ្ណោះចេញចូល ។
ប្រភពដដែលបានបន្តទៀតថា បើអគារខាងលើ ពិតជារោងចក្រផលិតស្បែកជើងមែននោះ គឺត្រូវប្រើកម្លាំងកម្មករក្បែរពាន់នាក់ ពិតជាមានអ្នកចេញចូលគគ្រឹកគគ្រែង មានភាពអធិកអធ័មមិន ខាន តែនេះគេសង្កេតឃើញតែក្រុមជនជាតិចិនចេញចូលពេញៗឡាន ដោយមានការប្រុងប្រយ័ត្នខ្ពស់បំផុតដោយចតរថយន្តនៅខាងក្រៅ ហើយដើរទាំងក្រុមៗចូលទៅខាងក្នុង ។
គួររំលឹកថា អគារដ៏ធំស្កឹមស្កៃអមដោយរបងថ្មកំពស់៥ម៉ែត្រ ហ៊ុមពទ្ធ័ជិតឈឹង និងមានកងសន្តិសុខយាមកាមយ៉ាងតឹងរឹងនេះ ស្ថិតនៅឃុំលំពង់ស្រុកបាទី ខេត្តតាកែវ ត្រូវបានមហាជនដាក់ការសង្ស័យថា ជាអគារភ្នាល់ល្បែងតាមប្រព័ន្ធអនឡាញ ដែលមានមេខ្លោងការពារនៅភ្នំពេញទៅអើតមើលម្តងៗ ។
តាមប្រភពពីប្រជាពលរដ្ឋនៅក្បែរទីតាំងខាងលើ បានអោយដឹងថា រាល់ថ្ងៃបើគេសង្កេតមើលអគារ ខាងលើ គឺដូចជាកាស៊ីណូសុទ្ធសាធ ព្រោះកងសន្តិសុខ ការពារយ៉ាងតឹងរឹង ហើយការចេញចូល គឺមានការត្រួតពិនិត្យតឹងរឹង ជាពិសេសចេញចូល បានតែជនបរទេសដែលសុទ្ធតែចិនទាំងក្រុមៗនោះ ទេ ។
ប្រភពដដែលបន្តទៀតថា ចាប់ពីម៉ោង១០ព្រឹក គឺមានតាក់ស៊ីដឹកតែភ្ញៀវបរទេសនោះទេ មកដាក់មុខអគារខាងលើ ហើយជនបរទេសចូលទៅក្នុងអគារបាត់ ចំណែកតាក់ស៊ីនៅឈប់ចតតម្រៀបគ្នាមុខអគារ រង់ចាំដឹកជនបរទេសទាំងនោះចេញទៅវិញភាគច្រើនជនជាតិចិន ។
តាមប្រភពច្បាស់ការពីមន្ត្រីសាលាស្រុកបាទីសុំមិនបញ្ចេញឈ្មោះបានអោយដឹងថា អគារខាងលើគឺជាអគារភ្នាល់ល្បែងអនឡាញគ្រប់ប្រភេទ មានចម្រុះជាតិសាសន៍ ហើយបុគ្គលិកបម្រើការនៅក្នុងអគារមិនបានអនុញ្ញាតអោយចេញក្រៅផ្ដេសផ្ដាស់នោះទេ ។ ចំណែកលោក ភួន ឈឹម អភិបាលស្រុកបាទី ធ្លាប់អោយកោះសន្តិភាពដឹងតាមទូរស័ព្ទថា អគារខាងលើ គឺដូចជារីសត តែធាតុពិត គឺជាអគាររោងចក្រនោះទេ មិនមែនអគារភ្នាល់ល្បែងអនឡាញ ដូចមហាជននិយាយឡើយ តែពេលកោះសន្តិភាព សួរលោកអភិបាលថា តើរោងចក្រខាងលើឈ្មោះអ្វី ផលិតអ្វី លោកមិនបានប្រាប់ទេ ដោយលោកលើកឡើងថា លោកជាប់រវល់ប្រជុំ ។
តាមពិតទៅអគារដូចសកលវិទ្យាល័យនេះ សង្ស័យជាសំបុកល្បែងអនឡាញរបស់ជនជាតិចិន ដែលមានមន្ត្រីជាន់ខ្ពស់ នៅភ្នំពេញទៅអើតម្តងម្កាល ជាមន្ត្រីស័ក្តិធ្ងន់ស្មា ។ ចំណែកមន្ត្រីត្រឹមថ្នាក់ស្រុកថ្នាក់ឃុំអត់ហ៊ាននិយាយជាមួយអ្នកកាសែតទេ ត្រូវថ្នាំសណ្តំខៀវភ្នែកអស់ហើយ ។
មហាជនសង្ស័យថា មហាសម្បុកអនឡាញធំណាស់នៅទីនេះ គ្មានមហាបុរសណាហ៊ានប៉ះពាល់ទេ សូម្បីថ្នាក់ខេត្តច្រើនជំនាន់មកហើយ ក៏អត់ហ៊ានក្អកដាក់ដែរ ព្រោះមេធំណាស់នៅភ្នំពេញ ទិញយកអស់ហើយ…ហេ! ហេ! ។ យូរៗឃើញមេខ្លោងនៅភ្នំពេញ ទៅអើតម្តងៗ តើអ្នកណាមិនខ្លាច? សំខាន់បំផុតអ្នកបម្រើអនាម័យពេលចេញមកក្រៅម្តងៗ បើគេសួរ តើទីនេះគេធ្វើអី? គាត់អត់ឆ្លើយទេ ធ្វើមិនដឹង ! ។
ឱ! រដ្ឋអំណាចខេត្តតាកែវអើយ…មិនគួរណាមិនហ៊ានបកស្បែកសម្បុក«ឪម៉ាល់»ដ៏ធំមួយនេះសោះ…ហេ! ហេ!
តើមេខ្លោងដែលនៅភ្នំពេញទៅអើតមើលម្តងៗជាអ្នកណា? មានមនុស្សច្រើននាក់ស្គាល់ តែគេថា «មិនហ៊ាននិយាយទេ..ធំណាស់ ល្បីកាចណាស់…»។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ