រាជធានីភ្នំពេញ៖ ជនសង្ស័យ២នាក់ ត្រូវបានកម្លាំងនគរបាលប៉ុស្តិ៍ត្រពាំងក្រសាំង ធ្វើការឃាត់ខ្លួនបាន រីឯបក្ខពួកម្នាក់ទៀតរត់រួច ក្រោយពីក្រុមនេះធ្វើសកម្មភាពវាយបំបែកកាមេរ៉ាសុវត្ថិភាពផ្ទះវីងមួយកន្លែង រួចឆ្កឹះសោទ្វារចូលទៅ ដើម្បីលួចយកទ្រព្យសម្បត្តិ ប៉ុន្តែខណៈនោះ លួចបានតែកង់២គ្រឿង…
រាជធានីភ្នំពេញ៖ ជនសង្ស័យ២នាក់ ត្រូវបានកម្លាំងនគរបាលប៉ុស្តិ៍ត្រពាំងក្រសាំង ធ្វើការឃាត់ខ្លួនបាន រីឯបក្ខពួកម្នាក់ទៀតរត់រួច ក្រោយពីក្រុមនេះធ្វើសកម្មភាពវាយបំបែកកាមេរ៉ាសុវត្ថិភាពផ្ទះវីងមួយកន្លែង រួចឆ្កឹះសោទ្វារចូលទៅ ដើម្បីលួចយកទ្រព្យសម្បត្តិ ប៉ុន្តែខណៈនោះ លួចបានតែកង់២គ្រឿង និងសម្លៀកបំពាក់មួយចំនួនប៉ុណ្ណោះ ដោយមិនទាន់ចូលទៅដល់កន្លែងទុកទ្រព្យសម្បត្តិមានតម្លៃ និងប្រាក់នៅឡើយ ក៏បាននាំគ្នាគេចខ្លួនបាត់អស់។ លុះរយៈពេលជាង១ម៉ោងក្រោយមក ទើបម្ចាស់ផ្ទះបានដឹង ហើយក៏បានទៅដាក់ពាក្យប្ដឹងឲ្យនគរបាលជួយអន្តរាគមន៍ ស្រាជ្រាវរហូតឃាត់ខ្លួនបានជាបន្តបន្ទាប់បែបនេះតែម្ដង ។
ហេតុការណ៍នោះ បានកើតឡើងកាលពីវេលាម៉ោង៨និង១៥នាទីយប់ថ្ងៃទី២៩ ខែឧសភា ឆ្នាំ២០២៥ នៅចំណុចផ្ទះវីង និងប្ដូរប្រាក់មួយកន្លែងស្ថិតនៅក្នុងភូមិសាមគ្គីទី៤ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ ម្ចាស់ផ្ទះខាងលើឈ្មោះសេង ម៉ាណែត ភេទប្រុស អាយុជាង៤០ឆ្នាំ ។
ជនសង្ស័យ ដែលត្រូវនគរបាលឃាត់ខ្លួនបាននោះ ៖
ទី១.ឈ្មោះ ណន បញ្ញា ហៅ អាពី ភេទប្រុស អាយុជាង២០ឆ្នាំ មានទីលំនៅភូមិកោះដាច់ សង្កាត់ក្បាលកោះ ខណ្ឌជ្រោយចង្វារ រាជធានីភ្នំពេញ ។
ទី២.ឈ្មោះ ជុយ ជនឌី អាយុ២៤ឆ្នាំ មុខរបរកាច់ផ្កាឈូក ស្នាក់នៅភូមិកប់ស្រូវតូច សង្កាត់គោករកា ខណ្ឌព្រែកព្នៅ រាជធានីភ្នំពេញ ចំណែកបក្ខពួកម្នាក់ទៀតគេចខ្លួនបាត់ស្រមោល ។
នគរបាលបានប្រាប់ឲ្យដឹងថា នៅវេលាយប់កើតហេតុនោះ មានភ្លៀងធ្លាក់ខ្លាំង ហើយម្ចាស់ផ្ទះខាងលើបានបិទទ្វារចាក់សោរួចរាល់ ក៏បានចូលដេកក្នុងផ្ទះ ហើយផ្ទះរបស់គាត់នោះខណ្ឌជាដំណាក់ៗ ច្រើនតង់ ទើបដល់បន្ទប់ដេក និងកន្លែងទុកទ្រព្យសម្បត្តិ។ ពេលនោះក្រុមជនសង្ស័យ បាននាំគ្នាចូលទៅធ្វើសកម្មភាពវាយបំបែកកាមេរ៉ាសុវត្ថិភាព បណ្ដាលឲ្យខូចខាតរួចទើបឆ្កឹះសោទ្វារផ្ទះខាងក្រោយចូលទៅលួចទ្រព្យសម្បត្តិ ។ ប៉ុន្តែពេលចូលទៅឃើញតែកង់២គ្រឿងនិងសម្លៀកបំពាក់មួយចំនួនប៉ុណ្ណោះ ក៏ប្រមូលយករួចនាំគ្នាគេចខ្លួនបាត់ ដោយមិនបានគាស់បន្ទប់ផ្សេងៗទៀតឡើយ ។
នគរបាលបានប្រាប់ឲ្យដឹងបន្តទៀតផងដែរថា ពេលនោះដោយសារតែភ្លៀងខ្លាំងពេក ទើបម្ចាស់ផ្ទះមិនបានដឹងឡើយ រហូតដល់វេលាម៉ោង១០យប់ថ្ងៃដដែល ក្រោយពេលជនសង្ស័យចាកចេញទៅបាត់អស់ ទើបដឹងថាផ្ទះរបស់គាត់មានចោរឆ្កឹះសោទ្វារចូលលួចទ្រព្យសម្បត្តិ ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលត្រពាំងក្រសាំងឲ្យជួយអន្តរាគមន៍ ។ ខណៈនោះនោះនគរបាលបានចុះទៅតរួតពិនិត្យទាំងយប់ និងបានបើកការស្រាវជ្រាវ រហូតដល់វេលាម៉ោង១២ថ្ងៃត្រង់ថ្ងៃទី៣០ ខែឧសភា ឆ្នាំ២០២៥ ទើបឃាត់ជនសង្ស័យបានម្នាក់ឈ្មោះណន បញ្ញា ហៅ អាពី ដែលកំពុងស្ថិតនៅផ្ទះមួយនៅក្នុងភូមិកើតហេតុនោះដែរ ហើយនគរបាលបានធ្វើការឆែកឆេររកឃើញនិងដកហូតបានឧបករណ៍សម្រាប់ឆ្កឹះសោ១ ទូរស័ព្ទដៃ១គ្រឿងនិងម៉ូតូហុងដាស្កួបពី១គ្រឿង ។
នគរបាលដដែលបានបញ្ជាក់ប្រាប់ឲ្យដឹងបន្ថែមទៀតថា នគរបាលបានធ្វើការសាកសួរជនសង្ស័យខាងលើ ហើយបានដឹងថាបក្ខពួក២នាក់ទៀត កំពុងលាក់ខ្លួននៅក្នុងភូមិកប់ស្រូវតូច សង្កាត់គោករកា ខណ្ឌព្រែកព្នៅ រាជធានីភ្នំពេញ ។ បន្ទាប់មកនគរបាលប៉ុស្តិ៍ត្រពាំងក្រសាំង ក៏បានសហការណ៍ជាមួយនគរបាលប៉ុស្តិ៍គោករកា ខណ្ឌព្រែកព្នៅ ដើម្បីធ្វើការឃាត់ខ្លួនបក្ខពួក២នាក់នោះ ប៉ុន្តែពេលទៅដល់ឃាត់បានម្នាក់ឈ្មោះជុយ ជនឌី ចំណែកម្នាក់ទៀតអត់នៅផ្ទះឡើយ ។
នគរបាលខាងលើបានប្រាប់បន្តថា ក្រោយមកកម្លាំងក៏បានបន្តស្វែងរក ទៀត ស្រាប់តែប្រទះឃើញជនសង្ស័យម្នាក់នោះកំពុងជិះម៉ូតូ១គ្រឿងម៉ាកយ៉ាម៉ាហាសុីរូសនៅតាមផ្លូវក្នុងភូមិកប់ស្រូវតូចនោះដែរ ហើយគ្រាន់តែឃើញនគរបាលភ្លាម ជនសង្ស័យរូបនោះបានជិះម៉ូតូរត់គេចខ្លួន ។ ពេលនោះនគរបាលបានដេញតាម រហូតដល់ចំណុចបឹងតាមោក សង្កាត់គោករកា ជនសង្ស័យបានផ្ដួលម៉ូតូចោល រួចរត់ចូលទៅក្នុងរណ្ដៅដីមួយគេចខ្លួនបាត់ដោយសុវត្ថិភាព ។ បន្ទាប់មកនគរបាលបានដកហូតយកម៉ូតូដែលជនសង្ស័យផ្ដួលចោលនោះ រួចនាំយកទាំងជនសង្ស័យទៅកាន់ប៉ុស្តិ៍ត្រពាំងក្រសាំង ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ