រាជធានីភ្នំពេញ ៖ តាមរយៈការថ្លែងសារពិសេសដែលផ្សាយផ្ទាល់ នាព្រឹកថ្ងៃទី២៩ ខែឧសភា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា…
រាជធានីភ្នំពេញ ៖ តាមរយៈការថ្លែងសារពិសេសដែលផ្សាយផ្ទាល់ នាព្រឹកថ្ងៃទី២៩ ខែឧសភា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានសង្កត់ធ្ងន់ថា អ្វីដែលគួរអោយខ្លាចបំផុត គឺព័ត៌មានក្លែងក្លាយ អុជអាល ដែលនាំទៅដល់សង្គ្រាមរវាងប្រទេសទាំងពីរក៏ដូចជា ការសម្អ.ប់ជាតិសាសន៍ដែលធ្វើឱ្យប្រទេសទាំងពីរបាត់បង់នូវផលប្រយោជន៍ នៅក្នុងទំនាក់ទំនងដែលទាញយកពីទំនាក់ទំនងសហប្រតិបត្តិការល្អ ។
ដូច្នេះហើយសម្តេចតេជោ បានស្នើសុំឲ្យបងប្អូនប្រជាពលរដ្ឋមានការស្ងប់ចិត្ត និងជឿជាក់លើរាជរដ្ឋាភិបាល និងកងកម្លាំងប្រដាប់អាវុធរបស់យើងក៏ដូចជា ជឿជាក់លើសមត្ថភាពនៃការការដោះស្រាយបញ្ហានេះ តាមរយៈនៃការចរចាជាជាងការដោះស្រាយតាមរយៈកងកម្លាំងប្រដាប់អាវុធ ។
ជាមួយគ្នានេះ សម្តេចតេជោ ហ៊ុន សែន បានបញ្ជាក់ថា ការចល័តកម្លាំងទ័ព និងអាវុធធន់ធ្ងន់ទៅកាន់តំបន់ព្រំដែនមិនមែនទៅដើម្បីធ្វើសង្គ្រាមទេ ប៉ុន្តែ គឺជាការត្រៀមបម្រុងទុកនូវយថាហេតុអាក្រក់ ក្នុងករណីដែលភាគីម្ខាងទៀតបំពានតែប៉ុណ្ណោះ គឺយើងមានសិទ្ធការពារខ្លួនយើងមិនយកអាវុធយុទ្ធភ័ណ្ឌ ដែលបានទៅដល់គោលដៅ និងជិតដល់គោលដៅ ដើម្បីទៅវាយប្រហារទៅកាន់ប្រទេសថៃនោះទេ ប៉ុន្តែសូមបញ្ជាក់ថា យើងត្រូវតែត្រៀមបម្រុងទុកនូវយថាហេតុអាក្រក់បំផុតព្រោះថា រឿងនេះវាជាបទពិសោធន៍ដែលកើតឡើងពីឆ្នាំ២០០៨ ដល់២០១១ ។
សម្តេចតេជោ ហ៊ុន សែន សង្កត់ធ្ងន់ថា រឿងលើកនេះ ខ្ញុំមិនជឿថា វាជាបន្ទាត់នយោបាយរបស់រាជរដ្ឋាភិបាលថៃ ឬក៏ជាចេតនារបស់នាយករដ្ឋមន្ត្រីថៃ ឬក្រសួងការពារជាតិថៃអនុញ្ញាតឱ្យធ្វើបែបនេះ អ្វីដែលជាការកត់សម្គាល់របស់ខ្ញុំ គឺវាហាក់បីដូចជា បានកើតឡើងដោយបុគ្គល ឬអង្គភាព នៅខាងក្រោមដែលធ្វើរឿងនេះ ដែលព្រលឹមស្រាងៗត្រូវចាប់ផ្តើមវាយឆ្ម.ក់ ហើយល្ងាចឡើងដកត្រឡប់ទៅវិញ ។ បើនេះ ជាគោលការណ៍របស់រដ្ឋាភិបាល ប្រហែលជាកម្លាំងនេះ មិនត្រូវបានដកទេ អញ្ជឹងវាច្បាស់ណាស់ថា មិនមែនជាបន្ទាត់នយោបាយរបស់រាជរដ្ឋាភិបាលថៃ ឬក៏ក្រសួងការពារជាតិថៃ ឬកងទ័ពថៃទាំងមូលនោះទេ។ ដែលតាមការសន្និដ្ឋានរបស់ខ្ញុំ វាអាចចេញមកពីអង្គភាពតែប៉ុណ្ណោះ ដែលខុសពីហេតុការណ៍នៅវត្តសិក្ខាគិរីស្វារកាលពីឆ្នាំ២០០៨ ។
សម្តេចតេជោហ៊ុន សែន សង្ឃឹមថា ការចរចារវាងមេបញ្ជាការកងទ័ពជើងគោក កម្ពុជា-ថៃ នឹងធ្វើឱ្យសភាពការណ៍វិលត្រឡប់មកដូចសភាពធម្មតាឡើងវិញ ហើយនឹងមិនរាលដាលទូទាំងព្រំដែន និងកុំអោយសភាពការណ៍នេះប៉ះពាល់កិច្ចសហប្រតិបត្តិការដទៃទៀតដូចជា សេដ្ឋកិច្ច ពាណិជ្ជកម្ម វិនិយោគ ទេសចរណ៍ កីឡា ឬគ្រប់ផ្នែកគ្រប់វិស័យដែលយើងមានកិច្ចសហប្រតិបត្តិ រាប់ទាំងសហប្រតិបត្តិការយោធាផងដែរ ។
បន្ថែមលើនេះ សម្តេចបានអំពាវនាវដោយអង្វករថា សូមកុំប្រើប្រាស់ករណីនេះដែលនាំឱ្យមានស្អប់ខ្ពើមជាតិសាសន៍ដែលរស់នៅជិតខាងគ្នា រឿងវាបានកើតឡើងទៅហើយ រកវិធីដោះស្រាយ ដើម្បីសម្រាលសភាពការណ៍នេះត្រឡប់មកវិញ ហើយជំរុញជំនឿទុកចិត្តគ្នាដើម្បីស្វែងរក និងទាយយកផលប្រយោជន៍ពីកិច្ចសហប្រតិបត្តិការ ខណៈកម្ពុជាថៃមានទំហំពាណិជ្ជកម្មជាង១០ពាន់លានដុល្លារ ដែលថៃក៏មានផលប្រយោជន៍ក្នុងទីផ្សារកម្ពុជា ហើយកម្ពុជាក៏មានផលប្រយោជន៍ក្នុងទីផ្សារថៃដូចគ្នា ។
គួររំលឹកថា កាលពីថ្ងៃរាត្រីថ្ងៃទី២៨ ខែឧសភា ឆ្នាំ២០២៥ ក្លិបអ្នកកាសែតកម្ពុជា និងសមាគមអ្នកកាសែតថៃ បានចេញសេចក្តីថ្លែងការណ៍រួមអំពាវនាវដល់ប្រព័ន្ធផ្សព្វផ្សាយប្រទេសទាំងពីរ មិនគួរផ្សព្វផ្សាយព័ត៌មានដែលគ្មានប្រភពច្បាស់លាស់ ឬព័ត៌មិនពិតទាក់ទងនឹងស្ថានភាពនៅតាមខ្សែបន្ទាត់ព្រំដែន ។ សេចក្តីថ្លែងការណ៍រួមនេះធ្វើឡើងក្រោយពីភាគីទាំងពីរសង្កេតឃើញថា នាពេលថ្មីៗនេះ ប្រព័ន្ធផ្សព្វផ្សាយមួយចំនួន ជាពិសេសអ្នកប្រើប្រាស់បណ្តាញ សង្គមបានផលិត ផ្សព្វផ្សាយ និងចែកចាយព័ត៌ដែលមិនមានប្រភពច្បាស់លាស់អំពីស្ថានភាពទូទៅនៅតាមតំបន់ព្រំដែនកម្ពុជា-ថៃ ដែលនាំឲ្យមានការភាន់ច្រឡំ ហើយព័ត៌មានទាំងនោះបានរីករាលដាលយ៉ាងច្រើន នៅក្នុងប្រទេសទាំងពីរ ។
ក្លិបអ្នកកាសែតកម្ពុជា និងសមាគមអ្នកកាសែតថៃ មានការព្រួយបារម្ភអំពីការបន្តផ្សព្វផ្សាយ ដែលអាចនឹងជំរុញឱ្យកើតភាពចម្រុងចម្រះផ្នែកព័ត៌មានកាន់តែធំរវាងប្រទេសទាំងពីរ ៕
ចែករំលែកព័តមាននេះ