សហរដ្ឋអាមេរិក ៖ តម្លៃមាសអន្តរជាតិបានធ្លាក់ចុះដល់កម្រិតទាបបំផុតក្នុងរយៈពេលជាង១សប្តាហ៍ គិតត្រឹមថ្ងៃទី២៩ ខែឧសភា ឆ្នាំ២០២៥ បន្ទាប់ពីតុលាការពាណិជ្ជកម្មអន្តរជាតិរបស់សហរដ្ឋអាមេរិក បានសម្រេចរារាំងមិនឱ្យពន្ធគយរបស់ប្រធានាធិបតី លោក ដូណាល់…
សហរដ្ឋអាមេរិក ៖ តម្លៃមាសអន្តរជាតិបានធ្លាក់ចុះដល់កម្រិតទាបបំផុតក្នុងរយៈពេលជាង១សប្តាហ៍ គិតត្រឹមថ្ងៃទី២៩ ខែឧសភា ឆ្នាំ២០២៥ បន្ទាប់ពីតុលាការពាណិជ្ជកម្មអន្តរជាតិរបស់សហរដ្ឋអាមេរិក បានសម្រេចរារាំងមិនឱ្យពន្ធគយរបស់ប្រធានាធិបតី លោក ដូណាល់ ត្រាំ (Donald Trump) ចូលជាធរមាន។ កត្តានេះបានកាត់បន្ថយភាពទាក់ទាញរបស់ទ្រព្យសម្បត្តិដ៏មានសុវត្ថិភាពមួយនេះ ស្របពេលភាពរឹងមាំនៃប្រាក់ដុល្លារអាមេរិកបានដាក់សម្ពាធបន្ថែមលើតម្រូវការមាស។ នេះបើតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅរសៀលថ្ងៃទី២៩ ខែឧសភា ឆ្នាំ២០២៥។
គិតត្រឹមវេលាម៉ោង២នាទីរសៀល ថ្ងៃទី២៩ ខែឧសភា ឆ្នាំ២០២៥ តម្លៃមាសអន្តរជាតិបានធ្លាក់ចុះ ០,៦% នៅក្នុងតម្លៃ៣ ២៧១ដុល្លារក្នុង១អោន ឬស្មើនឹង៣ ៩៤០ដុល្លារក្នុង១តម្លឹង ដែលជាកម្រិតទាបបំផុត ចាប់តាំងពីថ្ងៃទី២០ ខែឧសភា ឆ្នាំ២០២៥។ តម្លៃខ្ពស់បំផុតមិនធ្លាប់មានឈានដល់ ៣ ៥០០ដុល្លារក្នុង១អោន ឬ ៤ ២១៦ដុល្លារក្នុង១តម្លឹង ដែលត្រូវបានកត់ត្រាកាលពីថ្ងៃទី២២ ខែមេសា ឆ្នាំ២០២៥។
តម្លៃមាសអន្តរជាតិធ្លាក់ចុះ នៅក្រោយពេលតុលាការពាណិជ្ជកម្មអន្តរជាតិរបស់អាមេរិក កាលពីថ្ងៃពុធ បានសម្រេចបិទមិនឱ្យពន្ធគយរបស់លោក ត្រាំ ចូលជាធរមាន ដោយរកឃើញថា
ប្រធានាធិបតីអាមេរិកទី៤៧ វ័យ៧៨ឆ្នាំរូបនេះ បានប្រើសិទ្ធិអំណាចហួសដែនកំណត់ ដោយការដាក់ពន្ធសកលលើការនាំចូលពីប្រទេសដែលមានអតិរេកពាណិជ្ជកម្មជាមួយសហរដ្ឋអាមេរិក។ ទោះយ៉ាងណាក្តី ក្រោយមកប៉ុន្មានម៉ោង រដ្ឋបាលលោក ត្រាំ បានដាក់សេចក្តីជូនដំណឹងអំពីការប្តឹងឧទ្ធរណ៍ ដោយជំទាស់នឹងសិទ្ធិអំណាចតុលាការពាណិជ្ជកម្មអន្តរជាតិរបស់អាមេរិក និងជាសញ្ញាអាចឈានដល់ការតវ៉ាដល់តុលាការកំពូល ប្រសិនបើជាចាំបាច់។
អ្នកជំនាញនៅក្នុងវិស័យនេះ បានលើកឡើងថា ការសម្រេចចិត្តរបស់តុលាការ គឺជាកត្តាជំរុញព័ត៌មានដ៏សំខាន់ដែលនាំទៅរកការកើនឡើងតម្លៃប្រាក់ដុល្លារអាមេរិក ដែលជំរុញឱ្យតម្លៃមាសធ្លាក់ចុះជាបន្តបន្ទាប់។
សូមជម្រាបថា កាលពីថ្ងៃទី២ ខែមេសា កន្លងទៅ លោក ត្រាំ បានយកពន្ធទៅវិញទៅមកលើបណ្តាប្រទេសជាដៃគូពាណិជ្ជកម្ម ដោយបង្កឱ្យមានការភ័យខ្លាចនៃវិបត្តិសេដ្ឋកិច្ចសកល។ ប៉ុន្តែ១សប្តាហ៍ក្រោយ ភាពតានតឹងបានធូរស្រាលវិញ នៅពេលពន្ធគយជាក់លាក់លើប្រទេសទាំងនោះត្រូវបានផ្អាក ដោយទុករយៈពេល៩០ថ្ងៃ ដើម្បីចរចាគ្នា៕
ចែករំលែកព័តមាននេះ