រាជធានីភ្នំពេញ ៖ តារាចម្រៀងអ្នកនាង យក់ ថិតរដ្ឋា បានបោះពាក្យសម្តីទៅកាន់អ្នកសិល្បៈជាន់ថ្មីមួយរូប ដែលបានប្រើប្រាស់អាកប្បកិរិយាបែបមិនសមរម្យចំពោះរូបនាងដែលជាអ្នកសិល្បៈរៀមច្បងក្នុងពេលដែលនាងមិនធ្លាប់បានជួបពីមុកមក ។ ដោយមិនបានបញ្ចេញអត្តសញ្ញាណ ឬក៏ឈ្មោះអ្នកសិល្បៈរូបណាឲ្យបានច្បាស់ឡើយ…
រាជធានីភ្នំពេញ ៖ តារាចម្រៀងអ្នកនាង យក់ ថិតរដ្ឋា បានបោះពាក្យសម្តីទៅកាន់អ្នកសិល្បៈជាន់ថ្មីមួយរូប ដែលបានប្រើប្រាស់អាកប្បកិរិយាបែបមិនសមរម្យចំពោះរូបនាងដែលជាអ្នកសិល្បៈរៀមច្បងក្នុងពេលដែលនាងមិនធ្លាប់បានជួបពីមុកមក ។
ដោយមិនបានបញ្ចេញអត្តសញ្ញាណ ឬក៏ឈ្មោះអ្នកសិល្បៈរូបណាឲ្យបានច្បាស់ឡើយ ប៉ុន្តែតារាចម្រៀងរូបនេះ សម្តែងការហួសចិត្ត ដ្បិតអ្នកសិល្បៈជើងថ្មីរូបនោះ ប្រើប្រាស់ពាក្យសម្តីបែបថ្លោស ឈ្លើយ និងមានអំនួតក្នុងពេលដែលខ្លួនចាប់ផ្តើមល្បីបន្តិច ។
តាមរយៈសំណេរដែលបានសរសេរបង្ហោះលើបណ្តាញសង្គមអ្នកនាង យក់ ថិតរដ្ឋា បានលើកឡើងថា បានជួបច្រើនហើយតែសំរាប់សិស្សប្អូនម្នាក់នេះ មិនត្រឹមតែសំដីថ្លោសជាងមាឌទេ ថែមទាំងសំដីស្រទន់បែបឈ្លើយ តែកុំភ្លេចខ្លួនណាថា ភាពល្បីនឹងរូបសម្រស់របស់មនុស្សយើងម្នាក់ៗ វាមានដែនកំណត់របស់វាណាប្អូន ហើយបងសុំជូនពរអោយសិស្សប្អូននៅតែល្បីរហូតកុំធ្លាក់ណា កុំមានអំនួតពេក ប្រយត្ន័តែធ្លាក់មកវិញ សូម្បីតែឆ្កែក៏វាមិនហ៊ានមើល ព្រោះវាខ្លាចឆ្លងសន្តានថោកនឹងចរិតអន់ជាងវានោះអី ! ។
នាងបញ្ជាក់បន្ថែមថា មនុស្សឥឡូវកាលណាតែគេមើលងាយយើងពេកពេលខ្លះទ្រាំបានសុខចិត្តដើរចេញ តែបើមើលងាយខ្លាំងពេក មិនអោយតំលៃពិតជាទ្រាំអត់បាន ។ ជាការកត់សម្គាល់តារាចម្រៀងអ្នកនាង យក់ ថិតរដ្ឋា បានវិលមកកាន់ក្បាលមេក្រូបកស្រាយចម្រៀងជាថ្មីឡើងវិញ ក្រោយបាត់មុខអស់ជាច្រើនឆ្នាំ បន្ទាប់ពីនាងបានទុកខ្លួនឯងចោល ដោយសារតែនាងរងនូវការបន្ទោសបង្អាប់ (Bully) ពីមហាជនរូបរាងធាត់មិនស្អាតដូចមុន ។
តារារូបនេះ ធ្លាប់បានទម្លាយរឿងរ៉ាវមួយនេះទាំងទឹកភ្នែក នៅពេលដែលនាងធ្លាប់ត្រូវបានគេបង្អាប់ជាបន្តបន្ទាប់ដោយសាររូបរាង ។ នាងថា បើទោះបីជាមានពាក្យខ្លះជាពាក្យតិះដៀលទាំងមើលងាយបន្ទោសបង្អាប់ពីបងប្អូនមួយចំនួនតូចមកលើរូបរាង ឬក៏សម្រស់របស់ខ្ញុំជាដើម ក៏ខ្ញុំមិនដែលមានអារម្មណ៍ថា ស្អប់នឹងខឹងពួកគាត់ឡើយ ។
នាងបញ្ជាក់ថា ខ្ញុំតែងតែគិត មកពីពួកគាត់គឺគ្រាន់តែចង់ឃើញ idol គាត់ល្អនឹងស្អាតដូចពីមុន បើទោះជាខ្ញុំមានកូនៗដល់ទៅបីនាក់ក៏ដោយ ប៉ុន្តែអ្វីៗគ្រប់យ៉ាងគឺវាស្ថិតនៅលើពេលវេលានឹងការតាំងចិត្តព្រមទាំងកំលាំងកាយនឹងចិត្តជាចំបងផងដែរ ! តែសំរាប់ចិត្តរបស់ខ្ញុំ គឺពិតជាមានពេលខ្លះក៏មានអារម្មណ៍ថា តូចចិត្តខូចចិត្តនឹងខ្លួនឯងខ្លាំងពិតមែន ទើបតែមួយរយៈក្រោយនេះ ខ្ញុំមានកំលាំងចិត្តសារជាថ្មីមកវិញ ហើយក៏មិនព្រមទុកខ្លួនឯងចោលទៀតដែរ ។
នាងបន្ថែមថា កំលាំងចិត្តធំបំផុតនោះ គឺកូនៗនឹងប្តី ព្រមទាំងបងប្អូនមិត្តភ័ក្តិ និង FanFan ជាច្រើនដែលតែងតែបានផ្តល់កំលាំងចិត្តមកដល់ខ្ញុំរហូត តែអីលូវខ្ញុំពិតជាធ្វើវាបានសំរេចខ្លះៗហើយ ហើយក៏ត្រូវតែធ្វើដើម្បីភាពស្រស់ស្អាតរបស់ខ្លួនយើងតែម្តង ។
ក្រោយការសម្រករាងដែលមើលទៅមានភាពស្រស់ស្អាតឡើងវិញហើយនោះ យក់ ថិតរដ្ឋា ក៏ចាប់ផ្តើមមានទីផ្សារសិល្បៈឡើងវិញ ដោយនាងបានបង្ហាញខ្លួនជាបន្តបន្ទាប់ច្រៀងតាមភោជនីយដ្ឋាន និងក្លឹបកម្សាន្តនានា ៕
ចែករំលែកព័តមាននេះ