ទីក្រុងវ៉ាស៊ីនតោន៖ លោកត្រាំចេញមុខការពារចំណាត់ការរបស់គាត់ដែលសម្រេចចិត្តចាត់វិធានការក្ដៅទៅលើសាកលវិទ្យាល័យហាវើត។ ថ្មីៗនេះ រដ្ឋាភិបាលរបស់លោកបានចេញបញ្ជាឱ្យហាវើតឈប់ទទួលនិស្សិតបរទេសឱ្យចូលរៀន។ ប៉ុន្តែបទបញ្ជានេះត្រូវចៅក្រមមួយរូបសម្រេចចិត្តព្យួរទុកសិនតបតាមពាក្យបណ្ដឹងរបស់ហាវើត។
លោកត្រាំបានបង្ហោះសារនៅលើបណ្ដាញសង្គម និងដាក់ជាសំណួរថាតើហេតុអ្វីបានជាហាវើតមិននិយាយថានិស្សិតបរទេសជិត៣១%កំពុងរៀននៅសាលារបស់ខ្លួន។ នៅក្នុងចំណោមនោះ ប្រទេសខ្លះមិនមែនប្រទេសជាមិត្តរបស់យើងទៅទៀត។ លោកសរសេរបន្តទៀតថាយើងចង់ដឹងថាតើនិស្សិតបរទេសទាំងនោះមាននរណាខ្លះ។
លោកចាត់ទុកថានេះជាសំណើសុំដ៏សមរម្យបំផុតព្រោះរដ្ឋាភិបាលបានជះលុយរាប់ពាន់លានដុល្លារទៅឱ្យហាវើត។ គ្រាន់តែប៉ុណ្ណឹងហាវើតធ្វើមិនបាន។ កាលពីថ្ងៃព្រហស្បតិ៍ រដ្ឋមន្ត្រីក្រសួងសន្តិសុខមាតុភូមិ លោកស្រីគ្រីស្ទី ណូអែម (Kristi Noem) បានចេញបញ្ជាទៅហាវើតមិនត្រូវអនុញ្ញាតឱ្យនិស្សិតបរទេសសិក្សានៅក្នុងសាកលវិទ្យាល័យរបស់ខ្លួនតទៅទៀតឡើយ។
ហេតុនេះ ជោគវាសនារបស់និស្សិតរាប់ពាន់នាក់ដែលកំពុងរៀននៅហាវើតត្រូវហេលហាលកណ្ដាលទីមិនដឹងត្រូវគិតយ៉ាងដូចម្ដេចទៀត។ បើនៅក្នុងអំឡុងពេលនេះ ពួកគេមិនអាចស្វះស្វែងរកសាកលវិទ្យាល័យដទៃដើម្បីរៀនទេ ពួកគេអស់សិទ្ធិស្នាក់នៅប្រទេសអាមេរិកតទៅទៀត។ ប្រាក់ចំណូលរបស់ហាវើតដែលបានពីការបង់ថ្លៃសិក្សាក៏ត្រូវបាត់បង់អស់រលីង។
រដ្ឋមន្ត្រីរូបនេះធ្លាប់បានព្រមានតាំងពីខែមេសាថានឹងបិទខ្ទប់មិនឱ្យនិស្សិតបរទេសចូលរៀននៅហាវើតទេលុះត្រាតែហាវើតប្រគល់ទៅឱ្យរដ្ឋាភិបាលនូវបញ្ជីឈ្មោះនិស្សិតបរទេសទាំងឡាយណាដែលចូលរួមនៅក្នុងចលនាហែបាតុកម្មប្រឆាំងដែលរដ្ឋាភិបាលចាត់ទុកថាជាទង្វើខុសច្បាប់ និងប្រកបដោយអំពើហិង្សា។ ប៉ុន្តែបទបញ្ជានេះត្រូវព្យួរទុកវិញបន្ទាប់ពីហាវើតដាក់ពាក្យប្ដឹងទៅតុលាការដើម្បីឱ្យរដ្ឋាភិបាលបញ្ឈប់នូវអ្វីដែលហាវើតចាត់ទុកថាប្រើប្រាស់ឥទ្ធិពល និងអំណាចរបស់ខ្លួនដើម្បីគាបសង្កត់ហាវើត។ ហាវើតថានេះទង្វើខុសច្បាប់ និងផ្ទុយពីរដ្ឋធម្មនុញ្ញ។
រដ្ឋាភិបាលកំពុងចាត់វិធានការបង្ក្រាបសាកលវិទ្យាល័យនានានៅតាមមុខព្រួញជាច្រើន។ រដ្ឋាភិបាលយល់ថាបើបណ្ដោយបែបនេះតទៅទៀត ចលនាប្រឆាំងនឹងជនជាតិជ្វីប/អ៊ីស្រាអែលកាន់តែរីកធំទៅៗរហូតដល់ទប់ទល់លែងបាន។ រដ្ឋាភិបាលក៏លុបចោលទិដ្ឋាការ និងបណ្ដេញចេញពីប្រទេសអាមេរិកនូវពួកនិស្សិតបរទេសដែលចូលរួមហែបាតុកម្មប្រឆាំងនឹងសង្គ្រាមអ៊ីស្រាអែលនៅតំបន់ហ្កាហ្សា។ រដ្ឋាភិបាលចោទប្រកាន់ថាការហែបាតុកម្មរបៀបនេះមានន័យស្មើនឹងគាំទ្រក្រុមហាម៉ាស់៕
ចែករំលែកព័តមាននេះ