ខេត្តបាត់ដំបង ៖ រោងដាក់គំនរចំបើងដ៏ធំសម្បើម សាងសង់ជាប់គ្នាចំនួន០២ខ្នងអស់ទឹកប្រាក់ប្រមាណ០២ម៉ឺនដុល្លារ ត្រូវព្រះអគ្គីលេបត្របាក់យកអស់គ្មានសល់ ដោយគ្មានមូលហេតុ កាលពីវេលាម៉ោង១០និង៥០នាទីព្រឹកថ្ងៃទី២២ ឧសភា នេះ ស្ថិតក្នុងភូមិតាពូងជើង…
ខេត្តបាត់ដំបង ៖ រោងដាក់គំនរចំបើងដ៏ធំសម្បើម សាងសង់ជាប់គ្នាចំនួន០២ខ្នងអស់ទឹកប្រាក់ប្រមាណ០២ម៉ឺនដុល្លារ ត្រូវព្រះអគ្គីលេបត្របាក់យកអស់គ្មានសល់ ដោយគ្មានមូលហេតុ កាលពីវេលាម៉ោង១០និង៥០នាទីព្រឹកថ្ងៃទី២២ ឧសភា នេះ ស្ថិតក្នុងភូមិតាពូងជើង ឃុំតាម៉ឺន ស្រុកថ្មគោល តែមិនបង្កគ្រោះថ្នាក់ដល់មនុស្សទេ ។
សេចក្ដីរាយការណ៍បានឲ្យដឹងថា រោងដាក់គំនរចំបើងដ៏ធំចំនួន០២ខ្នងជាប់គ្នានោះ ធ្វើពីដែកប្រក់ស័ង្កសី មានទំហំ ២៥ម៉x៣០ម៉ មានម្ចាស់ឈ្មោះ ជឿន ម៉ៅ ភេទប្រុស អាយុ៤៦ឆ្នាំ រស់នៅចំណុចកើតហេតុ ។
សមត្ថកិច្ចបានស្រង់សម្ដីម្ចាស់រោងចំបើងថា រោងចំបើងនោះគាត់ធ្វើពីដែកសុទ្ធសាធចំនួន០២ខ្នង និងមានផ្ទុកចំបើងចំនួន១៧,០០០ដុំ ដែលទើបប្រមូលទិញពីតាមស្រែនានា ដែលម្ចាស់ទើបច្រូតរួច ។ ប៉ុន្តែគាត់មិនទាន់ដឹងពីមូលហេតុ ដែលនាំឲ្យមានអគ្គិភ័យឆេះរោងចំបើងគាត់នៅឡើយទេ ។
នៅក្នុងស្ថានភាពបែបនេះ រថយន្តពន្លត់អគ្គិភ័យរបស់សមត្ថកិច្ចចំនួន០៣គ្រឿង បានចេញជួយអន្តរាគមន៍បាញ់ទឹកពន្លត់ និងទប់ស្កាត់ការឆេះរាលដាល ។ ប៉ុន្តែមិនអាចជួយបង្ក្រាបភ្លើងឆេះគំនរចំបើងជិត២០,០០០ដុំបានឡើយ បើទោះជាកម្លាំងពន្លត់អគ្គិភ័យបានប្រឹងប្រែងបាញ់ទឹកពន្លត់យ៉ាងណាក្ដី ។
សមត្ថកិច្ច ក៏ដូចប្រជាពលរដ្ឋ បានចាត់ទុកគ្រោះថ្នាក់អគ្គិភ័យដ៏សន្ធោសន្ធៅនេះថា ជាការ«សំណាង» ។ សំណាងក៏ព្រោះតែម្ចាស់ធ្វើរោងដាក់ចំបើងនេះ ដាច់ឆ្ងាយពីផ្ទះគេឯង តែបើធ្វើនៅក្បែរផ្ទះវិញមិនដឹង «មហន្តរាយ» ដោយសារអគ្គីភ័យនេះធំធេងប៉ុនណាទេ។
ជុំវិញតុល្យការនៃការខាតបង់ បើតាមម្ចាស់ចំបើងបានប្រាប់សមត្ថកិច្ចថា អគ្គិភ័យបានឆេះរោងដាក់ចំបើងទាំង០២ខ្នងខូចខាតទាំងស្រុង និងចំបើងចំនួន១៧០០០ដុំ ដែលប៉ាន់ស្មានជាទឹកប្រមាណ០២ម៉ឺនដុល្លារ ។ ដោយឡែក ពាក់ព័ន្ធនឹងអគ្គិភ័យនេះវិញ ទាំងម្ចាស់រោងចំបើង ទាំងសមត្ថកិច្ច ហាក់មិនទាន់ផ្ដល់ចម្លើយនៃមូលហេតុនៅឡើយទេ បានត្រឹមអង្គុយឆ្ងល់ ៕
ចែករំលែកព័តមាននេះ