រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានថ្លែងចង់ឃើញស្នាដៃស្រាវជ្រាវ និក្ខេបបទរបស់និស្សិតខ្មែររៀនចប់ នៅក្នុងក្រៅប្រទេសត្រូវបានយកទៅដាក់ក្នុងបណ្ណាល័យទូទាំងប្រទេស ដើម្បីសម្រាប់អ្នកជំនាន់ក្រោយ ជាពិសេស…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានថ្លែងចង់ឃើញស្នាដៃស្រាវជ្រាវ និក្ខេបបទរបស់និស្សិតខ្មែររៀនចប់ នៅក្នុងក្រៅប្រទេសត្រូវបានយកទៅដាក់ក្នុងបណ្ណាល័យទូទាំងប្រទេស ដើម្បីសម្រាប់អ្នកជំនាន់ក្រោយ ជាពិសេស ដើម្បីជាឯកសារយោងជៀសវាងការស្រាវជ្រាវប្រវត្តិសាស្ត្រខ្មែរសោះ តែទៅពឹងលើឯកសាររបស់បរទេស ។
ថ្លែងក្នុងពិធីសម្ពោធសមិទ្ធផលកំណែទម្រង់វិទ្យាស្ថានជាតិអប់រំ និងពិធីប្រគល់សញ្ញាបត្រជូនដល់និស្សិត គរុនិស្សិតនៃវិទ្យាស្ថានជាតិអប់រំ នៅថ្ងៃទី២១ ខែឧសភា ឆ្នាំ២០២៥ សម្តេចបវរធិបតី ហ៊ុន ម៉ាណែត ក៏បានថ្លែងប្រាប់ គ្រូបង្រៀងថា ធ្វើគ្រូទាល់តែចេះ១១០% មិនអាចពឹងលើ Chat GPT ឬកម្មវិធីថ្មីជួយបង្រៀនជំនួស១០០%នោះទេ ។
សម្តេចបវរធិបតីថា ធ្វើគ្រូត្រូវចេះ១០១% ធ្វើសិស្សអាចចេះ៩៩% មួយមេរៀនៗយើងត្រូវត្រៀមលក្ខណៈ ១០១ ឬ១១០% ព្រោះយើងមិនអាចទៅឱ្យសិស្សសួស្អីដែរ យើងកត់នោះទេ គាត់សួរបែប គាត់សួរអ្វីបន្ថែមទៀត ។ យើងត្រូវមានលទ្ធភាពដោះ ។ សម្តេចបវរធិបតី បន្ដថា៖«អញ្ចឹងការស្រាវជ្រាវរៀបចំនូវឯកសារ ហើយជាពិសេសខ្ញុំចង់ឃើញនូវស្នាដៃ និងលទ្ធផលរបស់និស្សិតរបស់បញ្ញវន្តយើងរបស់កូនខ្មែរជាច្រើនឯកសារនៅក្នុងប្រទេសយ៉ាងហោចណាស់បណ្ណាល័យក្នុងប្រទេសរបស់យើងឱ្យមានកាន់តែច្រើន ជៀសជាងស្រាវជ្រាវប្រវត្តិសាស្ដ្រខ្មែរនៅលើទឹកដីខ្មែរ សុទ្ធតែសៀវភៅបរទេសសរសេរឱ្យទៀត» ។
ជាមួយគ្នានោះដែរ សម្ដេចធិបតីនាយករដ្ឋមន្ដ្រី បានជឿជាក់យ៉ាងមុតមាំថា និស្សិត និងគរុនិស្សិតជ័យលាភីទាំងអស់នឹងខិតខំពុះពារជម្នះរាល់ឧបសគ្គ ដើម្បីកសាងខ្លួនឱ្យស័ក្តិសមជាពលរដ្ឋល្អ, មន្ត្រីរាជការល្អ បុគ្គលិកល្អ, ដោយប្រើនូវចំណេះ និងជំនាញពិតប្រាកដរបស់ខ្លួនប្រកបដោយមនសិការ, វិជ្ជាជីវៈ, សីលធម៌ល្អ និងការដាក់ខ្លួនបម្រើប្រជាជនដោយស្មោះស ដើម្បីបុព្វហេតុជាតិមាតុភូមិ ។
សម្ដេចធិបតី នាយករដ្ឋមន្ដ្រីបានលើកឡើងថា រាជរដ្ឋាភិបាលផ្ដល់អាទិភាពខ្ពស់ចំពោះវិស័យអប់រំ និង ការបណ្តុះបណ្តាលវិជ្ជាជីវៈដោយសារការអប់រំ និងការបណ្តុះបណ្តាលធនធានមនុស្សឱ្យមានចំណេះដឹងទូលំទូលាយ, ជំនាញច្បាស់លាស់ និងសីលធម៌វិជ្ជាជីវៈអាចធានានូវប្រសិទ្ធភាព, បរិយាប័ន្ន និងចីរភាព នៃការអភិវឌ្ឍសង្គម-សេដ្ឋកិច្ច ព្រមទាំងអាចឆ្លើយតបទៅនឹងតម្រូវការជាក់ស្ដែងនៃទីផ្សារការងារ, ទាំងក្នុងស្រុក, តំបន់ និងសកល ។
ជាមួយគ្នានោះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងឱ្យដឹងថា រាជរដ្ឋាភិបាលកំពុងវិភាជថវិកាជាតិយ៉ាងច្រើនសម្រាប់កសាងមូលដ្ឋាន និងហេដ្ឋារចនាសម្ព័ន្ធអប់រំ ជាក់ស្ដែងគ្រឹះស្ថានបណ្ដុះបណ្តាលធនធានមនុស្សទាំងរដ្ឋ និងឯកជន កំពុងរីកលូតលាស់យ៉ាងឆាប់រហ័ស ។
សម្តេចបវរធិបតី ហ៊ុន ម៉ាណែត បានឱ្យដឹងថា ជាក់ស្ដែងអ្នកសិក្សាសន្សំបាន«ទ្រព្យសម្បត្តិជាចំណេះដឹងមិនចេះរីងស្ងួត» សម្រាប់មួយជីវិត ដែលអាចយកទៅប្រើប្រាស់សម្រាប់អភិវឌ្ឍខ្លួនឯង និងក្រុមគ្រួសារ ក្រោមរូបភាពជាការងារ, ការវិនិយោគ ឬសហគ្រិនភាព ។ សម្តេចបវរធិបតីបន្ដថា ជាមួយគ្នានេះការអប់រំបង្កើតឱ្យមានផលប្រយោជន៍សម្រាប់សង្គមជាតិជាច្រើន ។ ភស្តុតាងជាអន្តរជាតិបង្ហាញថា ប្រជាជនដែលមានការអប់រំខ្ពស់, មានសុខភាពល្អ, មានសីលធម៌, មានសុភមង្គលក្នុងគ្រួសារ, និង«ជាទ្រព្យ សកម្ម, និងមិនមែនជាបន្ទុករបស់សង្គមជាតិ ។
សម្ដេចនាយករដ្ឋមន្ដ្រីលើកឡើងថា «រាជរដ្ឋាភិបាលបាន និងកំពុងវិភាគថវិកាជាតិយ៉ាងច្រើនសម្រាប់កសាងមូលដ្ឋាន និងហេដ្ឋារចនាសម្ព័ន្ធអប់រំ មានជាអាទិ៍ ៖ គ្រឹះស្ថានឧត្តមសិក្សា, មជ្ឈមណ្ឌលបណ្តុះបណ្តាលបច្ចេកទេស, សាលារៀន, បណ្ណាល័យជាដើម» ។
សម្ដេចនាយករដ្ឋមន្ដ្រីបន្ថែមថា ជាលទ្ធផល, គ្រឹះស្ថានបណ្ដុះបណ្តាលធនធានមនុស្ស, ទាំងរដ្ឋ និងឯកជនបាន និងកំពុងរីកលូតលាស់ឆាប់រហ័ស ហើយគុណភាពនៃការអប់រំបណ្តុះបណ្តាលក៏មានការរីកចម្រើនគួរឱ្យកត់សម្គាល់ដែលឆ្លុះបញ្ចាំងតាមរយៈការកើនឡើងនូវចំនួនសិស្ស-និស្សិតកម្ពុជាចូលរួម និង ទទួលបានជ័យលាភីនៅក្នុងការប្រកួតប្រជែងសមត្ថភាពលើមុខជំនាញវិទ្យាសាស្ត្រ, បច្ចេកវិទ្យា, វិស្វកម្មនិងគណិតវិទ្យាទាំងនៅកម្រិតតំបន់ និងអន្តរជាតិ ៕
ចែករំលែកព័តមាននេះ