ខេត្តកណ្តាល ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល នៅថ្ងៃទី២០ ឧសភា ២០២៥នេះ ចេញបំភ្លឺពាក់ព័ន្ធគណនីហ្វេសប៊ុកឈ្មោះ Aisyah…
ខេត្តកណ្តាល ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល នៅថ្ងៃទី២០ ឧសភា ២០២៥នេះ ចេញបំភ្លឺពាក់ព័ន្ធគណនីហ្វេសប៊ុកឈ្មោះ Aisyah Seom ដែលបានបង្ហោះមានខ្លឹមសារថា ៖ អំពីប្អូនប្រុសឈ្មោះ រី ហាណាហ្វី គាត់ត្រូវប៉ូលិសនគរបាលស្រុកកោះធំ ខេត្តកណ្តាល ចាប់ទៅឃុំខ្លួន រយៈពេល២ថ្ងៃ តាមពាក្យបណ្តឹងជនរងគ្រោះ ដែលបានបាត់ម៉ូតូ ដោយសង្ស័យតាមភិនភាគកាមេរ៉ាសុវត្ថិភាព។ តាមពិត ក្នុងវីដសអូកាមេរ៉ា និងរូបគាត់ មិនមានភិនភាគដូចគ្នាទេ ហើយកាលដែលគាត់សារភាពថា ខ្លួនបានលួចតាមការសាកសួររបស់ប៉ូលិសនោះ គាត់នៅជាប់ឃុំខ្លួន ដោយប៉ូលិសមិនអនុញ្ញាតអោយឪពុកម្តាយចូលជួបឡើយ ពេលនេះប្រជាជនក្នុងភូមិ កំពុងនាំគ្នាស្នើសុំដោះលែងគាត់ហើយ ចាំមើលថា ទៅជាយ៉ាងណា បើគាត់ចាប់ខុសមនុស្សសោះ មិនព្រមដោះលែងហើយដើមបណ្តឹង ក៏មិនឃើញចេញមុខមកដោះស្រាយដែរ សំខាន់គាត់អត់ចេះជិះម៉ូតូផង ទៅលួចម៉ូតូបានយ៉ាងដូចម្តេច សូមជួយស៊ែរ អោយសារព័ត៌មានបានឃើញ និងជួយអត្តរាគមន៍ផង ថ្ងៃ១៩ ឧសភា ២០២៥ ។
ក្រោយពេលទទួលបានព័ត៍មានខាងលើរួច ដោយអនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការ នគរបាលខេត្តកណ្តាល លោកវរសេនីយ៍ឯក ស៊ីម ឃាង អធិការ នៃអធិការដ្ឋាននគរបាលស្រុកកកោះធំ បានបញ្ជាឲ្យកម្លាំងផ្នែកជំនាញស្រុកកោះធំ និងប៉ុស្តិ៍នគរបាលរដ្ឋបាលព្រែកថ្មី ចុះធ្វើការស្រាវជ្រាវករណីខាងលើ ដោយទទួលលទ្ធផលដូចខាងក្រោម ៖
ជាករណីលួចម៉ូតូកើតហេតុកាលពីថ្ងៃទី០២ ខែឧសភា ឆ្នាំ២០២៥ វេលាម៉ោង៨:៥០នាទីព្រឹក នៅចំណុចមុខផ្ទះជនរងគ្រោះ ឈ្មោះ ហៃ សុវណ្ណ ភេទប្រុស អាយុ៤១ឆ្នាំ ជនជាតិខ្មែរ មុខរបរ លក់ដូរ មានទីលំនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល ។
ជនសង្ស័យ ដែលត្រូវឃាត់ខ្លួនមានឈ្មោះ រី ហាណាហ្វី ភេទប្រុស អាយុ២៨ឆ្នាំ ជនជាតិខ្មែរឥស្លាម មុខរបរ មិនពិតប្រាកដ មានទីលំនៅភូមិចាមក្រោម ឃុំព្រែកថ្មី ស្រុកកោះធំ ខេត្តកណ្តាល ។
សម្ភារៈបាត់បង់មាន ៖ ម៉ូតូ HONDA BEAT ពណ៌ស+ខៀវ ស៊េរីឆ្នាំ២០២២ ដែលមានស្លាកលេខ ភ្នំពេញ 1JD.0486 ចំនួន០១គ្រឿង ជារបស់ជនរងគ្រោះ ។
វត្ថុតាងចាប់យក រួមមាន ៖
១/កង់តួប្រុស ពណ៌ខ្មៅ ០១គ្រឿង ដែលជាមធ្យោបាយរបស់ជនសង្ស័យជិះធ្វើសកម្មភាពដើរលួច។
២/ទូរសព្ទ័ដៃ ម៉ាក VIVO ពណ៌ផ្ទៃមេឃ ០១គ្រឿង ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានឲ្យដឹងទៀតថា សភាពរឿងហេតុ កាលពីព្រឹកថ្ងៃទី០២ ខែឧសភា ឆ្នាំ២០២៥ វេលាម៉ោង០៨:៣០នាទី ជនរងគ្រោះឈ្មោះ ហៃ សុវណ្ណ បានដើរចូលទៅក្នុងផ្ទះហើយបានអូសម៉ូតូម៉ាកហុងដា BEAT ពណ៌ ស+ខៀវ ដែលមានស្លាកលេខ ភ្នំពេញ 1JD.0486 ចេញយកមកទុកនៅខាងមុខផ្ទះ ហើយបានបែរក្បាលម៉ូតូ ទៅទិសខាងកើត ដោយបានទុកកូនសោម៉ូតូ នៅក្នុងឃ្លុបម៉ូតូខាងមុខ។ ក្រោយពេលអូសម៉ូតូចេញយកមកខាងក្រៅផ្ទះបានបន្តិច ជនរងគ្រោះឈ្មោះ ហៃ សុវណ្ណ ក៏បានដើរចេញមកខាងក្រៅផ្ទះ ហើយបានបើកឡានដឹកអីវ៉ាន់ចេញទៅលក់ដូរបាត់ទៅ។ បន្តិចក្រោយមក ស្រាប់តែកូនស្រីរបស់ជនរងគ្រោះ ឈ្មោះ វណ្ណ ស្រីណុច គាត់បានទូរសព្ទមកប្រាប់ថា បាត់ម៉ូតូ ឮដូច្នេះជនរងគ្រោះក៏បានបើកឡានត្រឡប់មកផ្ទះវិញ។ នៅពេលមកដល់ផ្ទះ គាត់ក៏បាននាំគ្នាទៅសុំអ្នកជិតខាងឱ្យជួយឆែកកាមេរ៉ាសុវត្តិភាពមើលទើបដឹងថា មានក្មេងប្រុសម្នាក់ បានជិះកង់ចូលមកលួចយកម៉ូតូរបស់គាត់ជិះចេញទៅតាមផ្លូវជាតិលេខ២១ បាត់ទៅ ដោយបានបន្សល់ទុកនៅកង់តួប្រុស ពណ៌ខ្មៅ ០១គ្រឿង នៅកន្លែងកើតហេតុ។ បន្ទាប់មក ជនរងគ្រោះឈ្មោះ ហៃ សុវណ្ណ គាត់បានមករាយការណ៍ និងដាក់ពាក្យបណ្តឹងនៅអធិការរដ្ឋាននគរបាលស្រុកកោះធំ ដើម្បីឱ្យសមត្ថកិច្ច ជួយធ្វើការស្រាវជ្រាវស្វែងរកមុខសញ្ញា ដែលបានធ្វើសកម្មភាពចូលលួចម៉ូតូរបស់គាត់ ។
រហូតមកដល់ថ្ងៃទី១៨ ខែឧសភា ឆ្នាំ២០២៥ វេលាម៉ោង១៩:០០នាទី កម្លាំងសមត្ថកិច្ចស្រុកកោះធំ និងប៉ុស្តិ៍នគរបាលរដ្ឋបាលព្រែកថ្មី បានចេញល្បាតមកដល់ចំណុចលើស្ពានឆ្លងទន្លេបាសាក់ស្រុកកោះធំ ក៏បានជួបប្រទះនឹងមុខសញ្ញាជនសង្ស័យឈ្មោះ រី ហាណាហ្វី កំពុងតែជិះកង់លេងនៅលើស្ពាន ឆ្លងទន្លេបាសាក់ ស្រុកកោះធំ តែម្នាក់ឯង។ ដោយមានការសង្ស័យសមត្ថកិច្ចយើងបានហៅជនសង្ស័យខាងលើនេះយកមកកាន់នៅអធិការដ្ឋានគរបាលស្រុកកោះធំ ដើម្បីសាកសួរអំពីរឿងហេតុដែលបានកើតឡើង ។
នៅចំពោះមុខសមត្ថកិច្ចជនសង្ស័យឈ្មោះ រី ហាណាហ្វី គាត់បានឆ្លើយសារភាពថា ខ្លួនពិតជាបានធ្វើសកម្មភាពចូលទៅលួចយកម៉ូតូរបស់ជនរងគ្រោះឈ្មោះ ហៃ សុវណ្ណ ពិតប្រាកដមែន គឺដោយសារជនរងគ្រោះគាត់បានទុកកូនសោម៉ូតូនៅក្នុងឃ្លុបម៉ូតូខាងមុខ ដោយឃើញមានឱកាសល្អទើបខ្លួនដើរចូលទៅលួចយកម៉ូតូរបស់ជនរងគ្រោះជិះចេញទៅបាត់ដោយបានបន្សល់ទុកនូវកង់តួប្រុសពណ៌ខ្មៅ ០១គ្រឿងនៅកន្លែងកើតហេតុ។ ក្រោយពេលជនសង្ស័យលួចម៉ូតូបានហើយ គឺបានជិះម៉ូតូនោះយកទៅដាក់បញ្ចាំឱ្យទៅជនសង្ស័យមិនស្គាល់អត្តសញ្ញាណនៅក្រុងសំពៅពូន ខេត្តកណ្តាល បានលុយចំនួន ២០០ដុល្លារ យកមកទិញទូរសព្ទដៃថ្មីមួយគ្រឿងម៉ាក VIVO ពណ៌ផ្ទៃមេឃក្នុងតម្លៃ១០០ដុល្លារ ហើយលុយ ដែលនៅសេសសល់ចំនួន១០០ដុល្លារ ទៀតគឺទុកសម្រាប់ស៊ីចាយ ។
ចំពោះករណីខាងលើនេះផ្នែកជំនាញស្រុកកោះធំ បានរៀបចំកសាងសំណុំរឿងបញ្ជូនជនសង្ស័យ និងវត្ថុតាងចាត់ការតាមនីតិវិធីច្បាប់ ។
អាស្រ័យហេតុនេះ សូមសាធារណជន និងបណ្តាញសារព័ត៌មានមេត្តាជ្រាបកុំមានការភាន់ច្រឡំ ៕ «ជិះកង់មកលួចម៉ូតូ គេចខ្លួនបានកន្លះខែជាប់ជង់»
ចែករំលែកព័តមាននេះ