ខេត្តសៀមរាប ៖ ក្នុងចេតនាការពារអាយុជីវិតអ្នកទេសចរជាតិនិងអន្តរជាតិ ដែលទៅទស្សនាប្រាង្គប្រាសាទនានាក្នុងតំបន់អង្គរ អាជ្ញាធរខេត្ត នឹងដំឡើងបន្ថែមទៀតនូវឧបករណ៍ការពាររន្ទះនៅបរិវេណប្រាសាទអង្គរវត្ត និងនៅតាមបណ្តាប្រាសាទសំខាន់ៗមួយចំនួនទៀតដែលមានអ្នកទេសចរដើរកម្សាន្តច្រើន ដើម្បីបង្កើនការធានាសុវត្ថិភាពជូនភ្ញៀវទេសចរ ពីគ្រោះធម្មជាតិមួយនេះ ។…
ខេត្តសៀមរាប ៖ ក្នុងចេតនាការពារអាយុជីវិតអ្នកទេសចរជាតិនិងអន្តរជាតិ ដែលទៅទស្សនាប្រាង្គប្រាសាទនានាក្នុងតំបន់អង្គរ អាជ្ញាធរខេត្ត នឹងដំឡើងបន្ថែមទៀតនូវឧបករណ៍ការពាររន្ទះនៅបរិវេណប្រាសាទអង្គរវត្ត និងនៅតាមបណ្តាប្រាសាទសំខាន់ៗមួយចំនួនទៀតដែលមានអ្នកទេសចរដើរកម្សាន្តច្រើន ដើម្បីបង្កើនការធានាសុវត្ថិភាពជូនភ្ញៀវទេសចរ ពីគ្រោះធម្មជាតិមួយនេះ ។ នេះជាការបញ្ជាក់របស់លោក លី វណ្ណៈ នាយករដ្ឋបាលសាលាខេត្ត ប្រាប់អ្នកសារព័ត៌មាន ។
ជុំវិញគម្រោងបំពាក់ឧបករណ៍ការពាររន្ទះបន្ថែមនេះ ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប បានដឹកនាំក្រុមការងារទៅពិនិត្យនៅបរិវេណប្រាសាទអង្គរវត្តដោយផ្ទាល់ កាលពីថ្ងៃទី១៧ ខែឧសភា ឆ្នាំ២០២៥កន្លងទៅ ។
នៅក្នុងការងារនេះ លោក លី វណ្ណៈ បញ្ជាក់ថា ក្រុមការងារបានរកឃើញថា អាជ្ញាធរជាតិអប្សរាបំពាក់ឧបករណ៍ការពាររន្ទះបានមួយចំនួនធំហើយ ប៉ុន្តែនៅមិនទាន់គ្របដណ្ដប់ពេញលេញ ដូចជានៅតាមផ្លូវថ្មើរជើងជាដើម ។ លោក លី វណ្ណៈ បន្ថែមថា «យើងបានចុះពិនិត្យមើល ខាងអាជ្ញាធរជាតិអប្សរាដាក់ឧបករណ៍ការពាររន្ទះបានមួយចំនួនហើយ ប៉ុន្តែវាមិនគ្របដណ្តប់ដល់ផ្លូវដើរនោះទេ ។
ឯកឧត្តមឧបនាយករដ្ឋមន្ត្រី ទៀ សីហា ពេលនេះបានដឹកនាំក្រុមការងារកងវិស្វកម្ម ដើម្បីពិនិត្យមើលថា តើមានអ្វីខ្លះដែលអាចបំពេញបន្ថែមទៀត នៅចំណុចណាដែលខ្វះខាត ។ យើងគ្រោងដាក់នៅតាមប្រាសាទនានាផងដែរ ជាពិសេស ប្រាសាទដែលមានភ្ញៀវទេសចរទៅទស្សនាកម្សាន្តច្រើន» ។
លោក លី វណ្ណៈ បន្ថែមទៀតថា ឯកឧត្តម ទៀ សីហា បានជំរុញឱ្យអាជ្ញាធរខេត្ត និងអាជ្ញាធរជាតិអប្សរា ប្រជុំពិភាក្សាគ្នាឱ្យបានលម្អិតបន្ថែមទៀត ដើម្បីកំណត់ទីតាំងជាក់លាក់ ក្នុងការដំឡើងឧបករណ៍ការពារគ្រោះមហន្តរាយធម្មជាតិនេះ សំដៅរក្សាសុវត្ថិភាព១០០% ជូនដល់អ្នកទេសចរ ព្រោះតែខែនេះ ផ្គរ រន្ទះ មានច្រើន និងកាន់តែកាចសាហាវផងដែរ៕
ចែករំលែកព័តមាននេះ