ទីក្រុងយេរូសាឡឹម៖ បន្ទាប់ពីលោកត្រាំបិទបញ្ចប់ទស្សនកិច្ច៤ថ្ងៃនៅមជ្ឈិមបូព៌ាត្រឹមតែប៉ុន្មានសិបម៉ោងប៉ុណ្ណោះ អ៊ីស្រាអែលប្រកាសបើកយុទ្ធនាការទ្រង់ទ្រាយធំដើម្បីវាយប្រហារតំបន់ហ្កាហ្សានៅទឹកផ្ដាច់ព្រ័ត្រ។ អាជ្ញាធរសុខាភិបាលប៉ាឡេស្ទីនអះអាងថាមនុស្សស្លាប់រាប់សិបនាក់នៅថ្ងៃនេះ។ អ៊ីស្រាអែលថ្លែងថាគោលដៅរបស់ខ្លួនលើកនេះគឺបោសសម្អាតក្រុមហាម៉ាស់ និងវាយរំដោះយកចំណាប់ខ្មាំងដែលនៅសេសសល់។ ទោះបីរស់ក្ដី ឬស្លាប់ក្ដីត្រូវតែយកពួកគេមកវិញឱ្យខាងតែបាន។
អាជ្ញាធរមូលដ្ឋាននៅហ្កាហ្សាថ្លែងថាគ្រាន់តែវាយប្រហារ១ប្រាវទៅលើតំបន់នេះកាលពីយប់ថ្ងៃសុក្រស្លាប់៥៨នាក់។ បើគិតទាំងថ្ងៃព្រហស្បតិ៍ទៀត មនុស្សស្លាប់បីរយនាក់។ អង្គការមើស៊ីខប (Mercy Corps) ដែលទទួលបន្ទុកផ្នែកមនុស្សធម៌ប្រាប់ទស្សនាវដ្ដីញូស្វីក (Newsweek) ថាគ្រោះទុរភិក្សកើតមានកាន់តែខ្លាំង។ មនុស្សរស់នៅទាំងអត់អាហារកាន់តែច្រើនឡើងៗ។
សូមរំលឹកថាលោកត្រាំបិទបញ្ចប់ទស្សនកិច្ចនៅអារ៉ាប៊ីសាអូឌីត កាតា និងអារ៉ាប់អេមីរ៉ាតដោយគ្មានសម្រេចបានកិច្ចព្រមព្រៀងនៃបទឈប់បាញ់ទេ។ ដូចនេះ ជាការព្រួយបារម្ភសម្រាប់ជោគវាសនារបស់ប្រជាជនប៉ាឡេស្ទីននៅហា្កហ្សា។ នាយករដ្ឋមន្ត្រីអ៊ីស្រាអែលថ្លែងថាពួកគេត្រូវផ្លាស់ទៅរស់នៅភាគខាងត្បូង។ យោធាអ៊ីស្រាអែលថ្លែងថាខ្លួនបានបញ្ជូនកងទ័ពដើម្បីវាយកាន់កាប់ជ្រោយហ្កាហ្សា។ នេះជាផ្នែក១នៃយុទ្ធនាការយោធាដែលមានឈ្មោះសម្ងាត់ថា ប្រតិបត្តិការជីឌីអន ឆារៀត (Gideon’s Chariots)។
អ៊ីស្រាអែលចេញសេចក្ដីប្រកាសនៅថ្ងៃអាទិត្យថាកងទ័ពរបស់ខ្លួនបានបាញ់សម្លាប់យុទ្ធជនរបស់សត្រូវរាប់សិបនាក់ និងវាយប្រហារគោលដៅជាង៦៧០កន្លែងកាលពីប៉ុន្មានថ្ងៃមុនការប្រកាសបើកយុទ្ធនាការធំជាផ្លូវការនៅថ្ងៃអាទិត្យ។ អាជ្ញាធរសុខាភិបាលប៉ាឡេស្ទីនថ្លែងថាមនុស្សស្លាប់ច្រើនណាស់ដោយសារការវាយប្រហារលើកនេះ។ ត្រឹមតែរយៈពេល២៤ម៉ោងប៉ុណ្ណោះ មនុស្សស្លាប់យ៉ាងតិច១៥០នាក់។ កាលពីយប់ថ្ងៃសៅរ៍ឆ្លងចូលថ្ងៃអាទិត្យស្លាប់ថែមយ៉ាងតិច១០៣នាក់ទៀត។
អ៊ីស្រាអែលបញ្ជាក់ថាផែនការវាយប្រហាររបស់ខ្លួនលើកនេះគឺដាក់សម្ពាធជាអតិបរមាទៅលើក្រុមហាម៉ាស់ដើម្បីឱ្យពួកគេទទួលយកបទឈប់បាញ់ស្របទៅតាមការទាមទាររបស់អ៊ីស្រាអែល។ នៅក្នុងចំណោមនោះ មានចំណុចមួយដែលតម្រូវឱ្យពួកគេដោះលែងចំណាប់ខ្មាំងទាំងអស់។ ប៉ុន្តែអ៊ីស្រាអែលថ្លែងថាទោះបីដោះលែងចំណាប់ខ្មាំងក៏ដោយ ក៏មិនមែនមានន័យថាខ្លួនយល់ព្រមបិទបញ្ចប់សង្គ្រាម និងចុះកិច្ចព្រមព្រៀងសន្តិភាពនោះដែរ។ ចំណែកហាម៉ាស់ថ្លែងថាអ្វីដែលខ្លួនចង់បានគឺការបិទបញ្ចប់សង្គ្រាមទាំងស្រុង និងជាស្ថាពរ។ ម៉្យាងទៀត អ៊ីស្រាអែលត្រូវតែដកកងទ័ពទាំងអស់ចេញពីតំបន់ហ្កាហ្សា៕
ចែករំលែកព័តមាននេះ