រាជធានីភ្នំពេញ ៖ មហាជនបានសម្តែងការភ្ញាក់ផ្អើល បន្ទាប់ពីគេបានឃើញអ្នកនាង ចន ច័ន្ទលក្ខិណា បានទម្លាយសារសម្លេងរបស់អតីតតារាសម្តែងធ្លាប់ល្បីឈ្មោះមួយរូបឆាតទៅសុំលុយអ្នកនាង ដើម្បីទិញថ្នាំព្យាបាលជំងឺប្រចាំកាយ ។ សារសម្លេងដែលអ្នកនាង…
រាជធានីភ្នំពេញ ៖ មហាជនបានសម្តែងការភ្ញាក់ផ្អើល បន្ទាប់ពីគេបានឃើញអ្នកនាង ចន ច័ន្ទលក្ខិណា បានទម្លាយសារសម្លេងរបស់អតីតតារាសម្តែងធ្លាប់ល្បីឈ្មោះមួយរូបឆាតទៅសុំលុយអ្នកនាង ដើម្បីទិញថ្នាំព្យាបាលជំងឺប្រចាំកាយ ។
សារសម្លេងដែលអ្នកនាង ចន ច័ន្ទលក្ខិណា បង្ហោះលើបណ្តាញសង្គមនោះ គឺជាលោក ចាន់រិទ្ធ មេធានី ដែលធ្លាប់ជាតារាសម្តែងល្បីឈ្មោះមួយរូបនៅក្នុងវិស័យសិល្បៈខ្មែរ ។ តាមរយៈសារសម្លេងនោះ លោក ចាន់រិទ្ធ មេធានី បានឆាតសុំលុយអ្នកនាង ចន ច័ន្ទលក្ខិណា ចំនួន១០ម៉ឺនរៀល ដើម្បីទិញថ្នាំព្យាបាលជំងឺទឹកនោមផ្អែម ដែលជាជំងឺប្រចាំកាយរបស់លោក ។
លោក ចាន់រិទ្ធ មេធានី បានលើកឡើងតាមរយៈសារជាសម្លេងថា លោកស្នើសុំអ្នកម្តាយ (អ្នកនាង ចន ច័ន្ទលក្ខិណា) បានលុយ១០ម៉ឺនរៀល ដើម្បីទិញថ្នាំលេប ព្រោះឥឡូវលោកដាច់ហើយ ។ លោកបញ្ជាក់ថា បច្ចុប្បន្ន មុខរបររកស៊ីរបស់លោក គឺរកមិនសូវបាន ហើយឥឡូវអស់ថ្នាំលេបទៀត អញ្ចឹងសុំអ្នកម្តាយ១០ម៉ឺន ដើម្បីមកដោះស្រាយទិញថ្នាំលើសឈាម និងទឹកនោមផ្អែម ។
ជាការឆ្លើយតប អ្នកនាង ចន ច័ន្ទលក្ខិណា បានលើកឡើងតាមរយៈសំណេរបង្ហោះលើបណ្តាញសង្គមថា ហ៊ឺម បងអើយបង បងព្យាយាមឆាតទៅពឹងគេ ផ្តាំតាមគេអោយជួយប្រាប់ប្អូន បងហៅខ្ញុំអ្នកម្តាយអញ្ចឹង បាបប្អូនណាស់បង ប្អូនជួយតាមលទ្ធភាព ព្រោះឥឡូវប្អូនត្រូវការប្រឹងរកស៊ី ដើម្បីជីវភាពផ្ទាល់ខ្លួន ប្អូនមិនអាចចេះតែជួយយកអាសារគេ រហូតភ្លេចជួយខ្លួនឯងដូចមុនទេ ប្អូនជូនពរបងឆាប់ជា និង មានសុខភាពល្អ កំលាំងមាំមួន ។
ជាការកត់សម្គាល់នេះ មិនមែនជាលើកទីមួយទេ ដែលអតីតតារាសម្តែងលោក ចាន់រិទ្ធ មេធានី បានលើកដៃសុំលុយទៅអ្នកសិល្បៈ ពោលកន្លងមក លោកក៏ធ្លាប់សុំការជួយពីអតីតតារាសម្តែងរួមជំនាន់ គឺលោក ខៃ ប្រសិទ្ធ តាមរយៈលោក សាវីន ហ្វីលីព ផងដែរ ។
ដោយសារធ្លាក់ខ្លួនទីទាល់ខ្លាំង ត្រឹមរត់ម៉ូតូកង់បី ដើម្បីចញ្ចឹមជីវិតស្ទើរមិនគ្រប់ រួមផ្សំជាមួយជំងឺទឹកនោមផ្អែមប្រចាំកាយផងនោះ លោក ចាន់រិទ្ធ មេធានី បានស្នើសុំទៅលោក សាវីន ហ្វីលីព អោយជួយរូបលោកផង ។
ពាក់ព័ន្ធរឿងនេះ តារាសម្តែងលោក សាវីន ហ្វីលីព ធ្លាប់បានលើកឡើងតាមរយៈបណ្តាញសង្គមថា លោក ចាន់រិទ្ធ មេធានី តារាសម្ដែងជើងចាស់ជំនាន់លោក ខៃ ប្រសិទ្ធ ពេលនេះ កំពុងឈឺធ្ងន់ដោយសារជំងឺទឹកនោមផ្អែមកំពុងវាយលុក ។ គាត់បានផ្ញើសារសំឡេងមកខ្ញុំ ប្រាប់ឱ្យខ្ញុំជួយប្រាប់ទៅមិត្តសិល្បករដទៃទៀត ដែលមានជីវភាពរស់នៅប្រសើរជាងគាត់ឱ្យជួយគាត់ផង ព្រោះគាត់កំពុងស្ថិតក្នុងស្ថានភាពលំបាកបំផុត ជាពិសេស គឺលោក ខៃ ប្រសិទ្ធ មេត្តាជួយគាត់ផង ។
លោកសាវិន ហ្វីលីព បានបញ្ជាក់ថា ខ្ញុំធ្លាប់បរិច្ចាគថវិកាផ្ទាល់ខ្លួនរបស់ខ្ញុំ ជួយគាត់ច្រើនដងមកហើយកាលពីលើកមុនៗ ។ ភ្ជាប់ជាមួយការស្នើនេះ លោកក៏បានផ្តល់លេខទូរស័ព្ទទំនាក់ទំនង ដើម្បីអោយបងប្អូនសប្បុរសជនណា ដែលចង់ជួយគាត់ គឺតាមរយៈលេខទូរស័ព្ទលេខ
012 567 533 ៕
ចែករំលែកព័តមាននេះ