ប្រទេសចិន-អាមេរិក ៖ ចិននិងអាមេរិកកាលពីថ្ងៃទី១២ឧសភាបានផ្អាកសង្គ្រាមពាណិជ្ជកម្ម ដោយប្រកាសពីការផ្អាករយៈពេល៩០ថ្ងៃផ្នែកដ៏ធំនៃពន្ធគយខ្ពស់បំផុតដែលដាក់ទៅវិញទៅមក នាំឲ្យរង្គើរដល់សេដ្ឋកិច្ចពិភពលោក។
ការផ្អាកនេះចូលជាធរមាននាពាក់កណ្ដាលយប់ម៉ោងនៅអាមេរិកភាគខាងកើត។ នេះជាការប្រកាសរបស់សេតវិមានបន្ទាប់ពី២ថ្ងៃនៃការចរចាគ្នាជាមួយចិននៅក្រុងហ្សុឺណែវ ដើម្បីកាត់បន្ថយភាពតានតឹងខាងពាណិជ្ជកម្មរវាងមហាអំណាចសេដ្ឋកិច្ចពិភពលោកទាំង២។ ជាក់ស្ដែងមហាអំណាចទាំង២បានទទួលយកការបន្ថយពន្ធមកនៅត្រឹម៣០%សម្រាប់ក្រុងវ៉ាសិុនតោននិង១០%សម្រាប់ក្រុងប៉េកាំង។ មុននេះអាមេរិកយកពន្ធគយលើគ្រប់ផលិតផលនាំចូលពីចិន ដល់ទៅ១៤៥%ហើយចិនបានតបតវិញដោយយកពន្ធលើទំនិញនាំចូលពីអាមេរិក១២៥%។
ការព្រមព្រៀងគ្នានោះរវាងចិននិងអាមេរិកនាំឲ្យផ្សារភាគហ៊ុនងើបឡើងវិញខ្លាំង។ ផ្សារហ៊ុនអាមេរិកDOW JONES ស្ទុ្តុះឡើងវិញដល់២,៨១% ផ្សារហ៊ុនNASDAQ ងើបឡើងវិញ៤,៣៥%និងផ្សារហ៊ុនS&P 500 ស្ទុះឡើងវិញ៣,២៦%។
ប្រធានាធិបតីអាមេរិកលោកដូណាល់ត្រាំថ្លែងថា ភាគីម្ខាងៗបានទទួលយកការកាត់បន្ថយពន្ធគយដែលដាក់ចាប់តាំងពីថ្ងៃទី២មេសាមក មកនៅត្រឹម១០%លើទំនិញអាមេរិកនិង៣០%លើទំនិញចិនសម្រាប់៩០ថ្ងៃ ហើយការចរចានឹងបន្តទៀតលើទិដ្ឋភាពរចនាសម្ព័ន្ធកាន់តែទូូលំទូលាយថែមទៀត។ សរុបពន្ធគយរបស់អាមេរិកលើទំនិញចិនបន្ថយមកនៅត្រឹម៣០%ព្រោះក្រុងវ៉ាសិុនតោននៅមិនទាន់ដកពន្ធបន្ថែម២០%ដែលកំណត់មុនខែមេសានៅឡើយ។
តាមក្រិត្យចេញផ្សាយនាថ្ងៃទី១២ឧសភាដោយសេតវិមានថា ពន្ធគយដែលដាក់ ១២០%ចាប់តាំងពីថ្ងៃទី២ឧសភាមកពេលនេះត្រូវបានកត់បន្ថយមកនៅត្រឹម៥៤%។ លោកត្រាំសង្ឃឹមជួបពិភាក្សាជាមួយសមភាគីចិនលោកសីុជីនពីងអាចនាដំណាច់សប្ដាហ៍នេះ។ ក្រសួងពាណិជ្ជកម្មចិនបានសម្ដែងការអបអរសាទរ ចំពោះការរីកចម្រើនថែមទៀតដែលសម្រេចបាន ក្នុងឱកាសនៃការចរចារវាងថ្នាក់ដឹកនាំអាមេរិកនិងចិន នៅក្រុងហ្សុឺណែវដោយធ្វើអត្ថាធិប្បាយថា ការកាត់បន្ថយពន្ធគយនេះគឺដើម្បីផលប្រយោជន៍រួមរបស់ពិភពលោក៕
ចែករំលែកព័តមាននេះ