ទីក្រុងកៀវ៖ នៅទីបំផុត រដ្ឋាភិបាលអ៊ុយក្រែនត្រៀមខ្លួនរួចរាល់ហើយដើម្បីចុះហត្ថលេខាលើកិច្ចព្រមព្រៀងរ៉ែកម្រជាមួយអាមេរិក អាចនឹងចុះកិច្ចព្រមព្រៀងនៅយប់នេះតែម្ដង។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលអ៊ុយក្រែន។ អ៊ុយក្រែនកំពុងសង្ឃឹមទុកជាមុនថាតាមរយៈការចុះកិច្ចព្រមព្រៀងនេះ អាមេរិកនឹងបន្តជួយអ៊ុយក្រែនដូចកាលពីមុនទៀត។
នៅដំណាក់កាលចុងក្រោយនេះ ការគាំទ្រពីសំណាក់រដ្ឋាភិបាលរបស់លោកត្រាំចំពោះអ៊ុយក្រែនរាងធ្លាក់ដៃបន្តិច។ ជាពិសេស ក្រោយការទាស់ពាក្យសម្ដីគ្នានៅសេតវិមានកាលពីដើមខែមីនា។ ប៉ុន្តែនៅពេលនេះ អ្វីៗចាប់ផ្ដើមប្រែក្រឡាស់ទៅរកភាពល្អប្រសើរឡើងវិញហើយ។ ឧបនាយករដ្ឋមន្ត្រីអ៊ុយក្រែន លោកស្រីយូលីយ៉ា ស្វ៊ីរីដឹនកូ (Yulia Svyrydenko) កំពុងធ្វើដំណើរទៅអាមេរិកដើម្បីចុះហត្ថលេខា។
ប្រទេសទាំង២បានចុះអនុស្សារណៈយោគយល់គ្នាកាលពីថ្ងៃទី១៨ ខែមេសាដើម្បីទុកជាជំហានដំបូងឆ្ពោះទៅរកកិច្ចព្រមព្រៀងធំនៃការចម្រាញ់យករ៉ែកម្រនៅអ៊ុយក្រែន។ នៅក្នុងអនុស្សារណៈនោះ ភាគីទាំង២ប្រកាសថាពួកគេនឹងចរចាគ្នាចប់សព្វគ្រប់ត្រឹមថ្ងៃទី២៦ ខែមេសា ហើយនឹងចុះហត្ថលេខាលើកិច្ចព្រមព្រៀងជាប្រញាប់បំផុតតាមដែលអាចធ្វើទៅបាន។
កន្លងផុតទៅបានពីរថ្ងៃ នាយករដ្ឋមន្ត្រីអ៊ុយក្រែន លោកដេនីស ស្មីហាល់ (Denys Shmyhal) ថ្លែងថាទីក្រុងកៀវបានឯកភាពតាមទាំងស្រុងហើយថារាល់ការផ្ដល់ជំនួយរបស់អាមេរិកចំពោះអ៊ុយក្រែនកាលពីពេលកន្លងមករហូតមកដល់ពេលបច្ចុប្បន្ននេះនឹងមិនទាមទារទៅវិញទេ។ ជំនួយទាំងនោះនឹងត្រូវទូទាត់គ្នាឱ្យបានចប់សព្វគ្រប់ត្រឹមកិច្ចព្រមព្រៀងរ៉ែកម្រនេះតែម្ដង។
កាលពីពេលបំពេញទស្សនកិច្ចនៅអាមេរិកសប្ដាហ៍មុន ឧបនាយករដ្ឋមន្ត្រីអ៊ុយក្រែនបានជួបពិភាក្សាការងារជាមួយរដ្ឋមន្ត្រីក្រសួងរតនាគារជាតិ (ស្មើនឹងក្រសួងសេដ្ឋកិច្ចនៅប្រទេសដទៃទៀត)។ លោកយល់ថាដំណើរការចរចាគ្នានោះរីកចម្រើនទៅមុខយ៉ាងខ្លាំង។ លោកថ្លែងថាអ៊ុយក្រែនក៏បានកំណត់យ៉ាងច្បាស់ថាតើការប្រតិបត្តិបែបណាដែលដើរហួសបន្ទាត់ក្រហម៕
ចែករំលែកព័តមាននេះ