រាជធានីភ្នំពេញ ៖ ស្តីពីការរីកចម្រើន ឬការងើបឡើងវិញ នៃ GDP (ផលិតផលសរុបក្នុងស្រុក) នៅប្រទេស G8 ប្រទេស G20 តំបន់អឺរ៉ុប និងនៅតំបន់អាស៊ាន ប្រទេសកម្ពុជាទទួលបានចំណាត់ថ្នាក់លេខ២សម្រាប់ប្រទេស នៅតំបន់អាស៊ាន ដោយផ្អែកតាមរបាយការណ៍របស់ IMF និង WB ។
រាជធានីភ្នំពេញ ៖ ស្តីពីការរីកចម្រើន ឬការងើបឡើងវិញ នៃ GDP (ផលិតផលសរុបក្នុងស្រុក) នៅប្រទេស G8 ប្រទេស G20 តំបន់អឺរ៉ុប និងនៅតំបន់អាស៊ាន ប្រទេសកម្ពុជាទទួលបានចំណាត់ថ្នាក់លេខ២សម្រាប់ប្រទេសនៅតំបន់អាស៊ាន ដោយផ្អែកតាមរបាយការណ៍របស់ IMF និង WB ។
លោកសាស្ត្រាចារ្យហេង វណ្ណដា ប្រធានវិទ្យាស្ថានវណ្ណដា បានឱ្យដឹងថា ប្រទេសកម្ពុជាមានកំណើនគួរឱ្យចាប់អារម្មណ៍នោះគឺដោយសារតែ១-ទេសចរណ៍ ទី២-កម្មន្តសាលនាំចេញ ទី៣-កសិកម្ម ។ កត្តាទាំង៣នេះគឺមានការងើបឡើងខ្លាំង ហើយយើងនៅតែព្យាករណ៍ថា ទៅថ្ងៃអនាគតប្រទេសកម្ពុជានឹងមានកំណើនឡើងថែមទៀត ដោយសារការអភិវឌ្ឍន៍នៅតំបន់ដាច់ស្រយាលដែលនឹងធ្វើឱ្យ GDP ឡើងខ្ពស់បន្តទៀត។ ប្រទេសកម្ពុជាមានសក្តានុពលខាងវិស័យទេសចរណ៍ ពីព្រោះវិស័យនេះគឺជាប្រភពមិនចេះរីងស្ងួត ដោយសារយើងសំបូរទៅដោយតំបន់ទេសចរណ៍បែបធម្មជាតិ ជាច្រើនដែលធ្វើឱ្យកំណើននៃភ្ញៀវទេសចរមានការកើនឡើងជាលំដាប់ពី១ឆ្នាំទៅ១ឆ្នាំ ហើយនេះគឺជាឧស្សាហកម្មគ្មានផ្សែង។
លោកសាស្ត្រាចារ្យហេង វណ្ណដា បានមានប្រសាសន៍ថា ចាប់តាំងពីពេលដែលមានវិបត្តិសេដ្ឋកិច្ចពិភពលោករហូតមកដល់ពេលបច្ចុប្បន្ន គឺយើងបានធ្វើការតាមដានមើលតាមរយៈទិន្នន័យដែលមានស្រាប់ និងដោយសាររឿងសេដ្ឋកិច្ចនេះគឺវាមានការប្រទាក់ក្រឡាគ្នាជាហូរហែជាមួយប្រទេសយើងដែរ ។ ដូច្នេះក្នុងនាមជាអ្នកធ្វើអាជីវកម្ម អ្នកសេដ្ឋកិច្ច គឺមិនអាចកាត់ផ្តាច់ចេញពី សេដ្ឋកិច្ចក្នុងប្រទេសក្នុងតំបន់ និងក្នុងពិភពលោកបានទេ ។ ជាក់ស្តែង សេដ្ឋកិច្ចពិភពលោក នៅពេលដែលមានវិបត្តិម្តងៗ គឺវាតែងតែជះឥទ្ធិពលមកលើប្រទេស និងចុងក្រោយគឺជះមកដល់ក្រុមហ៊ុនយើងតែម្តង។ ដូច្នេះបើយើងទប់ជាប់គឺវាល្អ តែយើងទប់មិនជាប់គឺវាក្ស័យធន់ តែម្តង ។ ដំបូងខ្ញុំសូមលើក អំពីប្រទេស G8 នៅត្រីមាសទី១ ឆ្នាំ២០១១នេះ ក្នុងចំណោមប្រទេស G8 ប្រទេសដែលមានGDP ងើបជាងគេបំផុតគឺប្រទេសអាល្លឺម៉ង់ ដែលមានសន្ទុះ៥,២ ប្រទេសរុស្ស៊ី៤,១ សហរដ្ឋអាេមរិក២,៣ ហើយនិងបារាំង២,២ ក្រៅពីនោះប្រទេស៤ទៀតគឺមានតិចតួចគឺ១,១ ឬ១,២ ប៉ុណ្ណោះ ។
សម្រាប់កំណើនសេដ្ឋកិច្ចនៃបណ្តាប្រទេស G20 វិញគឺប្រទេសដែលកើនខ្លាំងជាងគេគឺប្រទេសអាហ្សង់ទីន ក្នុងត្រីមាសទី១នេះគឺកើនឡើងដល់៩,៩ ទី២-គឺប្រទេសចិនគឺ៩,៧ ទី៣-គឺប្រទេសឥណ្ឌាមាន៧,៨ និងទី៤-គឺប្រទេសឥណ្ឌូណេស៊ីគឺ៦,៥ ។ នៅក្នុងចំណោមបណ្តាប្រទេស G20 នេះ ប្រទេសដែលសង្ឃឹមជាងគេគឺប្រទេសចិន និងប្រទេសឥណ្ឌា ។ ទោះបីជាប្រទេសអាហ្សង់ទីន កើនជាងគេក៏ដោយ តែថ្ងៃក្រោយប្រទេសឥណ្ឌូណេស៊ីគឺអាចឈ្នះប្រទេសអាហ្សង់ទីនបានទៀត ។ សម្រាប់ប្រទេសនៅអឺរ៉ុប ដែលពោរពេញទៅដោយបំណុលនោះគឺឡើងមិនបានច្រើននោះទេ គឺត្រឹមតែ១,០០ ឬ២.០០គឺអស់ហើយ ។ នៅអឺរ៉ុបប្រទេសដែលមាន GDP ធ្លាក់ខ្លាំងជាងគេ គឺប្រទេសក្រិចនៅឆ្នាំ២០១០ ប្រទេសក្រិចគឺមានតួលេខដកគឺ-៣,៥ រហូតដល់-៥,៧ ហើយមកដល់ចុងឆ្នាំ២០១០ នេះ គឺមាន-៦,០០មកដល់សព្វថ្ងៃនេះក្រិចនៅតែមានសញ្ញាអវិជ្ជមានដដែលនៅត្រីមាសទី១ឆ្នាំ២០១១ នេះ គឺ-៤,៨ ហើយប្រទេសមួយចំនួនទៀតក៏មានសញ្ញាអវិជ្ជមានដែរ គឺប្រទេសព័រទុយហ្គាល់ អៀរឡង់ អេស្ប៉ាញ។ល។
លោកសាស្ត្រាចារ្យហេង វណ្ណដា ឱ្យដឹងទៀតថា សម្រាប់ប្រទេសអាស៊ានដែលមាន GDP ងើបខ្លាំងជាងគេគឺប្រទេសសាំងហ្គាពួរ ឡើងដល់៨,៣ ឥណ្ឌណេស៊ី៦,៥ វៀតណាម៥,៤ ហ្វីលីពីន៤,៩ ថៃធ្លាក់មកនៅត្រឹម៣,០០។ សម្រាប់ប្រទេសកម្ពុជាយើងធនាគារពិភពលោក និងមូលនិធិរូបិយវត្ថុអន្តរជាតិ បានធ្វើការទស្សន៍ទាយថា គឺក្នុងរង្វង់៦,៧ ទៅ៦,៩ និងអាចងើបឡើងដល់៧,០០។ ដូច្នេះបើ GDP ក្នុងរង្វង់៧,០០ សម្រាប់ប្រចាំឆ្នាំមានន័យថា យើងអាចប៉ាន់ស្មានសម្រាប់ប្រចាំត្រីមាសគឺអាចត្រឹមពី៦,៧ ទៅ៧,០០ គឺយើងអាចមានចំណាត់ថ្នាក់លេខ២បន្ទាប់ពីសាំងហ្គាពួរ ។ ការសម្រេចបាននេះគឺដោយសារតែការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោហ៊ុន សែន ។ GDP របស់ប្រទេសកម្ពុជា យើងនេះគឺជាមោទនភាពរបស់ប្រជាពលរដ្ឋ យើងខ្លាំងណាស់ ហើយខ្ញុំក៏មានមោទនភាពដែរ និងសូមអបអរសាទរជូនចំពោះសម្តេចតេជោជាខ្លាំង ៕
ចែករំលែកព័តមាននេះ