ទីក្រុងវ៉ាស៊ីនតោន៖ ត្រាំបង្ហាញការខកចិត្តយ៉ាងខ្លាំងដែលរុស្ស៊ីបន្តវាយប្រហារអ៊ុយក្រែនយ៉ាងខ្លាំងក្លាទោះបីមានកិច្ចខិតខំប្រឹងប្រែងដើម្បីបញ្ចប់សង្គ្រាមយ៉ាងណាក្ដី។ កាលពីយប់មិញ ត្រាំជំរុញឱ្យលោកពូទីនបញ្ឈប់ការវាយប្រហារទាំងស្រុង ហើយងាកមកចុះហត្ថលេខាលើកិច្ចព្រមព្រៀងសន្តិភាពដែលសម្របសម្រួលដោយអាមេរិក។ ត្រាំថាគាត់ចង់ឱ្យពូទីនបញ្ឈប់ការបាញ់ប្រហារគ្នាតទៅទៀត ហើយអង្គុយចរចាគ្នាដើម្បីសម្រេចបានកិច្ចព្រមព្រៀងសន្តិភាព។
ត្រាំថ្លែងដូច្នេះតបទៅនឹងសំណួររបស់អ្នកសារព័ត៌មានដែលថាតើគាត់ចង់ឱ្យលោកពូទីនធ្វើអ្វីជាបន្តទៀត។ ត្រាំធ្លាប់បង្ហាញអារម្មណ៍ខឹងសម្បារយ៉ាងខ្លាំងបន្ទាប់ពីលោកពូទីនវាយប្រហារអ៊ុយកាលពីសប្ដាហ៍មុនដោយដ្រូន និងមីស៊ីលទៅលើទីក្រុងកៀវបណ្ដាលឱ្យស្លាប់យ៉ាងតិច១២នាក់ និងរបួសជាង៧០នាក់។ នេះជាការវាយប្រហារដ៏ផ្ដាច់ផ្ដិលជីវិតមនុស្សបំផុតនៅក្នុងរយៈពេល៩ខែចុងក្រោយ។
ត្រាំថាគាត់ខកចិត្តយ៉ាងខ្លាំងដែលគ្រាប់មីស៊ីលរបស់រុស្ស៊ីបន្តបាញ់ប្រហារអ៊ុយក្រែនបន្ទាប់ពីនិយាយគ្នាទើបតែហើយថាកុំឱ្យបាញ់ទៀត។ ការថ្លែងដូច្នេះនៅពេលត្រាំ និងជំនួយការរបស់គាត់កំពុងព្យាយាមដាក់សម្ពាធទៅលើរុស្ស៊ី និងអ៊ុយក្រែនដើម្បីទទួលយកកិច្ចព្រមព្រៀងសន្តិភាព។ ត្រាំព្រមានថាបើគ្មានកិច្ចព្រមព្រៀងនៅក្នុងពេលឆាប់ៗនេះទេ គាត់នឹងដើរចេញពីការចរចា។ រហូតមកដល់ពេលនេះ គេមិនបានដឹងលម្អិតថាតើការចរចាគ្នានេះរីកចម្រើនទៅមុខកម្រិតណាទេ។
សារព័ត៌មានខ្លះចុះផ្សាយថាត្រាំយល់ព្រមទទួលស្គាល់តំបន់គ្រីម៉េជាទឹកដីរុស្ស៊ីដោយស្របច្បាប់ទោះបីហ្សេឡិនស្គីប្រកាសអ៊ុយក្រែននឹងមិនទទួលស្គាល់ជាផ្លូវការថាគ្រីម៉េជាទឹកដីរុស្ស៊ីទេ។ ថ្មីៗនេះ ត្រាំ និងហ្សេឡិនស្គីបានជួបគ្នានៅទីក្រុងរ៉ូមនៅពេលលោកទាំង២អញ្ជើញទៅចូលរួមពិធីបញ្ចុះព្រះបរមសពសម្ដេចសង្ឃ។ អ្នកសារព័ត៌មានបានសាកសួរត្រាំថាតើហ្សេឡិនស្គីបានលើកឡើងអំពីបញ្ហាគ្រីម៉េដែរឬទេ។ ត្រាំថាហ្សេឡិនស្គីបាននិយាយអំពីបញ្ហានេះ។ ប៉ុន្តែនិយាយមិនច្រើនទេ។
ត្រាំសូមបញ្ជាក់ម្ដងទៀតថាគ្រីម៉េបានទៅប្រទេសរុស្ស៊ីតាំងពីជំនាន់លោកអូបាម៉ា និងលោកបៃដិនកាលពី១១ ឬ១២ឆ្នាំមុនមកម៉្លេះ។ ហេតុនេះត្រាំថាគាត់មិនដឹងថាតើត្រូវទាមទារយកគ្រីម៉េមកវិញដោយវិធីណាទេព្រោះតំបន់នេះបានបាត់បង់ទៅច្រើនឆ្នាំណាស់ទៅហើយ។ គាត់ថារយៈពេល១២ឆ្នាំកន្លងមកនេះ បើគ្រាន់បើណាស់ម្ដេចក៏គ្មាននរណាទាមទារយកតំបន់គ្រីម៉េត្រឡប់មកវិញ។ ហើយឥឡូវនេះពួកគេលើកឡើងអំពីបញ្ហានេះជាថ្មីម្ដងទៀត (ដើម្បីឱ្យគាត់ជួយយកត្រឡប់មកវិញ)។
ត្រាំចាត់ទុកកិច្ចជំនួបរវាងគាត់ និងហ្សេឡិនស្គីនៅទីក្រុងរ៉ូម ប្រទេសអ៊ីតាលីនោះប្រព្រឹត្តទៅក្នុងបរិយាកាសល្អ។ ប៉ុន្តែគាត់ទទួលស្គាល់ថាមានបញ្ហាជាច្រើនទៀតដែលត្រូវដោះស្រាយ។ ត្រាំថាហ្សេឡិនស្គីទាមទារចង់បានអាវុធយុទ្ធភ័ណ្ឌឱ្យបានច្រើនថែមទៀតដើម្បីយកទៅតទល់ជាមួយរុស្ស៊ី។ ប៉ុន្តែត្រាំថាហ្សេឡិនស្គីទាមទារតែអីចឹងរយៈពេលជាងបីឆ្នាំមកហើយ។ ត្រាំថាគាត់ចង់ពិនិត្យសភាពការណ៍ជាក់ស្ដែងជាមុនសិន។ ខាងលើនេះជាការដកស្រង់ប្រភពពីគេហទំព័រដឹហ៊ីល (The Hill) ៕
ចែករំលែកព័តមាននេះ