ទីក្រុងព្យុងយ៉ាង៖ នៅទីបំផុត កូរ៉េខាងជើងប្រកាសទទួលស្គាល់ជាលើកដំបូងថាខ្លួនពិតជាបានបញ្ជូនកងទ័ពទៅជួយរុស្ស៊ីនៅក្នុងសង្គ្រាមអ៊ុយក្រែនពិតមែនក្រោមការបញ្ជាដ៏ម៉ឺងម៉ាត់របស់លោកគីមជុងអ៊ុន។ កូរ៉េខាងជើងបញ្ជាក់ថាកងទ័ពរបស់ខ្លួនបានចូលរួមចំណែកដ៏សំខាន់ក្នុងការវាយរំដោះតំបន់ខឺសដែលត្រូវកងទ័ពអ៊ុយក្រែនវាយកាន់កាប់តាំងពីខែសីហា ឆ្នាំ២០២៤។
ទូរទស្សន៍កូរ៉េខាងជើង ខេស៊ីអឹនអេ (KCNA) ផ្សាយថាជ័យជម្នះលើកនេះឆ្លុះបញ្ចាំងពីរួបរួមកម្លាំងយោធាគ្នាកម្រតិខ្ពស់ជាយុទ្ធសាស្ត្ររវាងកូរ៉េខាងជើង និងរុស្ស៊ី។ កាលពីសប្ដាហ៍មុន, រុស្ស៊ីប្រកាសថាខ្លួនបានវាយបណ្ដេញកងទ័ពអ៊ុយក្រែនចុងក្រោយបង្អស់ដែលឈរជើងនៅក្នុងភូមិមួយកន្លែងនៃតំបន់ខឺស។ អ៊ុយក្រែនអះអាងកងទ័ពរបស់ខ្លួនអាចនឹងដកថយពីខឺសមែន ប៉ុន្តែពួកគេទៅប្រមូលផ្ដុំគ្នានៅបែលហ្គោរ៉ូតដែលជាទឹកដីរបស់រុស្ស៊ីដដែលទេ។ ទីនេះស្ថិតនៅជាប់នឹងព្រំដែនតែម្ដង។
គណៈកម្មការយោធានៃបក្សពលករកូរ៉េថ្លែងថាថាលោកគីមជុងអ៊ុនបានសម្រេចចិត្តបញ្ជូនកងទ័ពកូរ៉េខាងជើងទៅរុស្ស៊ីដោយអនុវត្តតាមស្មារតីនៃកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយដែលបានចុះហត្ថលេខាកាលពីឆ្នាំ២០២៤។ កូរ៉េខាងជើងចាត់ទុកថានេះជាកិត្តិយសដ៏ឧត្ដុងឧត្ដមរបស់ខ្លួនដែលចងសម្ព័ន្ធមិត្តជាមួយប្រទេសមហាអំណាចដូចជារុស្ស៊ី។
គេប៉ាន់ស្មានថាកូរ៉េខាងជើងបញ្ជូនកងទ័ពប្រហែល១,៤ម៉ឺននាក់ទៅរុស្ស៊ី។ ចំនួននេះគិតទាំងកងទ័ព៣ពាន់នាក់ដែលបញ្ជូនទៅបន្ថែមទៀតដើម្បីជំនួសកងទ័ពដែលស្លាប់ និងរបួស។ នេះបើយោងតាមប្រភពពីអ៊ុយក្រែន។ ដោយសារខ្វះខាតយុទ្ធោបករណ៍ពាសដែកសម្រាប់ការពារខ្លួន និងខ្វះខាតបទពិសោធធ្វើសង្គ្រាមដ្រូនផងនោះធ្វើឱ្យពួកគេស្លាប់អស់ច្រើនគួរសមដែរ។
ការប្រកាសរបស់រដ្ឋាភិបាលទីក្រុងព្យុងយ៉ាងនៅថ្ងៃចន្ទនេះក៏ស្របនឹងអ្វីដែលរដ្ឋាភិបាលទីក្រុងម៉ូស្គូទើបតែប្រកាសកាលពីថ្ងៃសៅរ៍សប្ដាហ៍មុនថាកងទ័ពកូរ៉េខាងជើងបានប្រឡូកនៅក្នុងសង្គ្រាមនៅតំបន់ខឺសពិតមែន។ ដំណឹងនេះត្រូវក្រុមស៊ើបការណ៍សម្ងាត់អាមេរិក អ៊ុយក្រែន និងកូរ៉េខាងត្បូងប្រកាសយ៉ាងគគ្រឹកគគ្រេងតាំងពីយូរមកហើយ។ ប៉ុន្តែរុស្ស៊ី និងកូរ៉េខាងជើងរក្សាភាពស្ងៀមស្ងាត់ជានិច្ចដើម្បីរង់ចាំរហូតដល់ទទួលជ័យជម្នះទាំងស្រុងទើបពួកគេប្រកាសជាសាធារណៈ៕
ចែករំលែកព័តមាននេះ