ខេត្តស្វាយរៀង ៖ គ្រោះថ្នាក់ចរាចរណ៍ដ៏រន្ធត់ រវាងរថយន្តដឹកកម្មករ កម្មការិនី ជាមួយម៉ូតូ បណ្តាលឲ្យអ្នកបើកបរម៉ូតូជាសន្តិសុខឯកជនម្នាក់ បាត់បង់ជីវិតភ្លាមៗ នៅនឹងកន្លែងយ៉ាងរន្ធត់ ។…
ខេត្តស្វាយរៀង ៖ គ្រោះថ្នាក់ចរាចរណ៍ដ៏រន្ធត់ រវាងរថយន្តដឹកកម្មករ កម្មការិនី ជាមួយម៉ូតូ បណ្តាលឲ្យអ្នកបើកបរម៉ូតូជាសន្តិសុខឯកជនម្នាក់ បាត់បង់ជីវិតភ្លាមៗ នៅនឹងកន្លែងយ៉ាងរន្ធត់ ។
ករណីនេះ បានកើតឡើងនៅវេលាម៉ោង៧ព្រឹកថ្ងៃទី២៤ ខែមេសា ឆ្នាំ២០២៥ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥០ និង១៥១ ខាងមុខវិទ្យាល័យ ហ៊ុន សែន ជីភូ ស្ថិតនៅភូមិកម្ពោធប្រោះ សង្កាត់ច្រកម្ទេស ក្រុងបាវិត ។
បើតាមសាច់ញាតិ បានឲ្យដឹងថា ជនរងគ្រោះឈ្មោះ សុខ ស៊ឺ ភេទប្រុស អាយុ២៧ឆ្នាំ នៅលីវ ជាបុគ្គលិកសន្តិសុខឯកជន មានទីលំនៅភូមិព្រៃគគីរ ឃុំបឹងខ្នា ស្រុកកាឡូសែនជ័យ ខេត្តពោធិសាត់ ។
មុនពេលកើតហេតុ ជនរងគ្រោះបានជិះម៉ូតូ ម៉ាកហុងដាសេ១២៥ ពាក់ស្លាកលេខភ្នំពេញ 1KH-9189 បើកបរពីទិសខាងកើត មកលិច លុះមកដល់ចំណុចកើតហេតុ ត្រូវបានរថយន្តដឹកកម្មករ១គ្រឿង បើកបញ្ច្រាសទិសគ្នា ពីលិចទៅកើត បើកវ៉ាជែង ក៏ជ្រុលទៅបុកជាមួយម៉ូតូជនរងគ្រោះ ពេញទំហឹងលាន់ដូចរន្ទះ បង្កឲ្យម៉ូតូជនរងគ្រោះដួលបោកទៅលើថ្នល់ បណ្តាលឲ្យជនរងគ្រោះរងរបួសបែកក្បាលស្លាប់ភ្លាមៗតែម្តង ។ ចំណែករថយន្តបង្ក បានបន្ថែមល្បឿន ឆ្ពោះទៅទិសខាងកើត គេចបាត់ស្រម៉ោល ។
ចំណែកសពជនរងគ្រោះ សមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ដោយហៅរថយន្តសាមុយមន្ទីរពេទ្យជីភូដឹកបញ្ជូនទៅស្រុកកំណើតខេត្តពោធិសាត់ ។ ហើយសមត្ថកិច្ច កំពុងស្រាវជ្រាវរកម្ចាស់រថយន្តបង្ក ឲ្យមកទទួលខុសត្រូវតាមច្បាប់ ៕
ចែករំលែកព័តមាននេះ