ខេត្តស្វាយរៀង ៖ គ្រោះថ្នាក់ចរាចរណ៍ដ៏រន្ធត់រវាងរថយន្តដឹកកម្មករកម្មការិនីជាមួយម៉ូតូបណ្តាលឲ្យអ្នកបើកបរម៉ូតូជាសន្តិសុខឯកជនម្នាក់បាត់បង់ជីវិតភ្លាមៗនៅនិងកន្លែងយ៉ាងរន្ធត់។
ករណីខាងលើនេះបានកើតឡើងនៅវេលាម៉ោង៧ព្រឹកថ្ងៃទី២៤ មេសា ឆ្នាំ២០២៥ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥០និង១៥១ខាងមុខវិទ្យាល័យហ៊ុនសែនជីភូ ស្ថិតនៅភូមិកម្ពោធប្រោះ សង្កាត់ច្រកម្ទេស ក្រុងបាវិត ។
បើតាមសាច់ញាតិបានឲ្យដឹងថា ជនរងគ្រោះសុខ ស៊ឺ ភេទប្រុស អាយុ២៧ឆ្នាំ នៅលីវ ជាបុគ្គលិកសន្តិសុខឯកជន មានទីលំនៅភូមិព្រៃគគីរឃុំបឹងខ្នា ស្រុកកាឡូសែនជ័យខេត្តពោធិសាត់។
មុនពេលកើតហេតុ ជនរងគ្រោះបានជិះម៉ូតូម៉ាកហុងដាសេ១២៥ ពាក់ស្លាកលេខភ្នំពេញ1KH-9189 បើកបរពីទឹសខាងកើតមកលិចលុះមកដល់ចំណុចកើតហេតុ ត្រូវបានរថយន្តដឹកកម្មករកម្មការនី១គ្រឿងបើកបញ្ច្រាស់ទឹសគ្នាពីលិចទៅកើតបើកវ៉ាជែងក៏ជ្រុលទៅបុកជាមួយម៉ូតូជនរងគ្រោះពេញទំហឹងលាន់ដូចរន្ទះបង្កឲ្យម៉ូតូជនរងគ្រោះដួលបោកទៅលើថ្នល់បណ្តាលឲ្យជនរងគ្រោះរងរបួសបែកក្បាលធ្ងន់ធ្ងរស្លាប់ភ្លាមៗតែម្តង។
ចំណែករថយន្តបង្កបានបន្ថែមល្បឿនឆ្ពោះទៅទឹសខាងកើតគេចបាត់ស្រមោល ។ ចំណែកសពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ដោយហៅរថយន្តសាមុយមន្ទីរពេទ្យជីភូដឹកបញ្ជូនទៅស្រុកកំណើតខេត្តពោធិសាត់ ។
បច្ចុប្បន្ន សមត្ថកិច្ចកំពុងស្រាវជ្រាវរកម្ចាស់រថយន្តបង្កឲ្យមកទទួលខុសត្រូវតាមច្បាប់ ៕
ចែករំលែកព័តមាននេះ