ខេត្តកំពត ៖ ករណីរឿងចាក់សាំងដែលផ្ទុះការវែកញែកគ្នាលើបណ្តាញសង្គម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវឱ្យបញ្ចប់ការវែកញែក នៅតាមបណ្ដាញសង្គម ព្រោះថា…
ខេត្តកំពត ៖ ករណីរឿងចាក់សាំងដែលផ្ទុះការវែកញែកគ្នាលើបណ្តាញសង្គម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវឱ្យបញ្ចប់ការវែកញែក នៅតាមបណ្ដាញសង្គម ព្រោះថា មានរឿងតិចតួចអាចនិយាយគ្នាទៅ ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ «កំពង់ផែទេសចរណ៍អន្តរជាតិខេត្តកំពត» នៅថ្ងៃ ទី២១ ខែមេសា ឆ្នាំ២០២៥ សម្តេចបវរធិបតី ហ៊ុន ម៉ាណែត បានរំលឹកថា នាពេលកន្លងទៅ ឱ្យតែមានបញ្ហាអ្វីមួយគឺទៅប្ដឹងអ្នកទី៣ តាមរយៈហ្វេសប៊ុក គឺអត់ជជែកគ្នាទេ ដូច្នេះ មានរឿងអ្វី ត្រូវនិយាយគ្នាទៅ កុំទៅប្ដឹងអ្នកទី៣។
សម្តេចបវរធិបតីស្នើឱ្យបញ្ចប់ការវែកញែកទៅ ព្រោះរឿងនេះ (រឿងចាក់សាំង)គ្មានអ្នកណាឈ្នះនោះទេ ។ សម្តេចបវរធិបតី ហ៊ុន ម៉ាណែត មានប្រសាសន៍ថា «រឿងនេះ វាមិនគួរជារឿងសោះ បើសិនជាយើងចេះយោគយល់គ្នា ។ ខ្វះខាតអីយើងនិយាយគ្នាទៅ ។ បើសិនជានិយាយជាមួយ (អ្នកនេះ)មិនត្រូវយើងនិយាយជាមួយ(អ្នកនោះ)ទៅ ហើយសូមខ្ញុំឱ្យអំពាវនាវ ឱ្យបញ្ចប់ទៅ»។
ទន្ទឹមនឹងនេះ សម្តេចបវរធិបតីក៏អំពាវនាវឱ្យមន្ត្រីរាជការគ្រប់លំដាប់ថ្នាក់ទាំងអស់ បន្តខិតខំបំពេញភារកិច្ច និងបម្រើប្រជាពលរដ្ឋឱ្យបានល្អផងដែរ ។
គួរបញ្ជាក់ថា បន្ទាប់ពីមានការវែកញែកតាមបណ្តាញសង្គមច្រើនមក ខាងភាគីអ្នកដែលចូលទៅចាក់សាំងនោះ ក៏បានបង្ហោះតាមបណ្តាញសង្គមតិកតុក ដែលមាន គណីឈ្មោះ tangsokjeng ថា រូបគេបានចូលទៅការ៉ាស់សាំងខាងលើបំណង ចាក់ប្រេងម៉ាស៊ូត៥០លីត្រ តែខាងបុគ្គលិកនៅតែបង្ខំឱ្យចាក់ជាដុល្លារ ហើយក៏បានប្រាប់ទៅថា ទូរស័ព្ទដែលមានABA គឺអស់ថ្ម តែមានលុយខ្មែរនៅខាងក្រៅជិត ២០ម៉ឺនដែរ និងបានប្រាប់ឱ្យបុគ្គលិកយកតម្លៃម៉ាស៊ូតនោះ គុណនឹង៥០លីត្រ នឹងឃើញទឹកប្រាក់ដែលត្រូវចំណាយ តែបុគ្គលិកនៅតែប្រកែកទើបខ្លួនសម្រេចចិត្តលើកទូរសព្ទថត ។
ភ្លាមនោះ បុគ្គលិកក៏បញ្ជាក់ថា លុយខ្មែរចាក់បានតែត្រូវគិតកន្ទុយ ហើយបញ្ជាក់ថា ខ្លួនផ្តោតទៅលើម្ចាស់ការ៉ាស់មិនមែនបុគ្គលិកទេ ព្រោះបុគ្គលិកត្រូវដូរលុយជាដុល្លារទៅ ឱ្យម្ចាស់ការ៉ាស់ ដោយខ្លួនយល់ថា ការធ្វើដូច្នេះគឺមានការកេងប្រវេញ្ចនិងអត់គាំទ្រលុយខ្មែរ។
សូមជម្រាបថា ករណីនេះបានកើតឡើងកាលពីថ្ងៃទី១៧ ខែមេសា ឆ្នាំ២០២៥ នៅចំណុចការ៉ាស់សាំង PTT នាភូមិត្រពាំងធំ ឃុំជុំគ្រៀល ស្រុកទឹលឈូ ខេត្តកំពត ៕
ចែករំលែកព័តមាននេះ