ទីក្រុងកៀវ៖ រុស្ស៊ី និងអ៊ុយក្រែនចោទប្រកាន់គ្នាទៅវិញទៅមកដើម្បីនិយាយយកត្រូវរៀងខ្លួនពាក់ព័ន្ធនឹងការវាយប្រហារគ្នាឥតបន្ធូរដៃរាប់ពាន់ករណីទោះបីលោកពូទីនប្រកាសផ្អាកវាយប្រហារអ៊ុយក្រែននៅថ្ងៃបុណ្យអ៊ីសស្ទើដេ (Easter Day) ក៏ដោយ។ វិមានក្រឹមឡាំងថ្លែងថាគ្មានបទបញ្ជាឱ្យផ្អាកវាយប្រហារនៅលើសមរភូមិដែលកំពុងប្រយុទ្ធគ្នាយ៉ាងក្ដៅគគុកនោះទេ។
មុនដំបូង នៅពេលលោកពូទីនប្រកាសឈប់បាញ់គ្នា៣០ម៉ោងធ្វើឱ្យអាមេរិកមានចិត្តត្រេកអរ និងសង្ឃឹមថាបទឈប់បាញ់អាចនឹងបន្តទៅមុខទៀត។ លោកហ្សេឡិនស្គីធ្លាប់ប្រកាសរួចហើយថាលោកគាំទ្របទឈប់បាញ់រយៈពេល៣០ថ្ងៃ។ ប៉ុន្តែលោកពូទីនមិនបានចេញបញ្ជាឱ្យផ្អាកវាយប្រហារជាបន្តទៀតទេ។ លោកបញ្ជាឱ្យផ្អាកត្រឹមពាក់កណ្ដាលអធ្រាត្រថ្ងៃអាទិត្យតែប៉ុណ្ណោះ។
ទីភ្នាក់ងារព័ត៌មានតាស់ (TASS) របស់រុស្ស៊ីបានដកស្រង់ពាក្យសម្ដីរបស់អ្នកនាំពាក្យវិមានក្រឹមឡាំងមកផ្សាយថាគ្មានការចេញបញ្ជាឱ្យផ្អាកវាយប្រហារជាបន្តទៀតទេ។ កាលពីថ្ងៃអាទិត្យ សភាពការណ៍ពិតជាស្ងប់ស្ងាត់មែន។ គេមិនបានស្ដាប់ឮសំឡេងស៊ីរ៉ែនប្រកាសអាសន្ននៅអ៊ុយក្រែនទេ។ ប៉ុន្តែបន្ទាប់ពីពាក់កណ្ដាលអធ្រាត្របានកន្លងផុតទៅ និងឈានចូលដល់ពេលទៀបភ្លឺថ្ងៃចន្ទនេះ រុស្ស៊ីចាប់ផ្ដើមពន្លះអ៊ុយក្រែនមួយអស់ដៃតែម្ដង។ កងទ័ពអាកាសអ៊ុយក្រែនបានប្រកាសអាសន្ននៅភាគខាងកើត និងភាគអាគ្នេយ៍ដើម្បីឱ្យប្រជាជនប្រុងប្រយ័ត្នចំពោះការវាយប្រហារដោយមីស៊ីល និងដ្រូន។ លោកហ្សេឡិនស្គីថ្លែងថារុស្ស៊ីវាយប្រហារជិតបីពាន់ដងកាលពីយប់មិញ។ អ៊ុយក្រែនបញ្ជាឱ្យកងទ័ពរបស់ខ្លួនរង់ចាំរាប់ចំនួនវាយប្រហារទាំងអស់ដើម្បីចង់ដឹងថាតើរុស្ស៊ីអនុវត្តដូចការសន្យារបស់ខ្លួនដែរឬទេ។
លោកហ្សេឡិនស្គីថ្លែងបន្តទៀតថារុស្ស៊ីវាយប្រហារខ្លាំងក្លាបំផុតនៅសមរភូមិក្ដៅក្បែរទីក្រុងផូករ៉ូស (Pokrovsk)។ កាលពីល្ងាចថ្ងៃអាទិត្យ ដោយសារសភាពការណ៍រាងស្ងប់ស្ងាត់ គ្មានការបន្លឺសំឡេងស៊ីរ៉ែន លោកហ្សេឡិនស្គីខំអរ និងចាត់ទុកថាបទឈប់បាញ់ចាប់ផ្ដើមអនុវត្តជាបណ្ដើរៗហើយ។ លោកក៏ឆ្លៀតឱកាសនេះអំពាវនាវឱ្យរុស្ស៊ីផ្អាកវាយប្រហារដោយដ្រូន និងមីស៊ីលទៅលើទីតាំងជនស៊ីវិលយ៉ាងហោចណាស់ឱ្យបាន៣០ថ្ងៃ។
លោកថាបើរុស្ស៊ីមិនឯកភាពតាមសំណើនេះទេមានន័យថាពួកគេមានចេតនាចង់បំផ្លាញជីវិតមនុស្ស និងចង់ធ្វើសង្គ្រាមជាបន្តទៀត។ ប៉ុន្តែលោកអំពាវនាវឱ្យជនស៊ីវិលកុំទាន់អស់សង្ឃឹមព្រោះថ្ងៃណាមួយសន្តិភាពនឹងកើតមានឡើងជាមិនខាន។ ដោយឡែក បើគេស្ដាប់ការបកស្រាយរបស់រុស្ស៊ីវិញម្ដង។ ក្រសួងការពារជាតិរុស្ស៊ីថ្លែងថាអ៊ុយក្រែនបានរំលោភទៅលើបទឈប់បាញ់ និងបន្តវាយប្រហាររុស្ស៊ីជាងមួយពាន់ករណី ធ្វើឱ្យខូចខាតរចនាសម្ព័ន្ធ និងស្លាប់ជនស៊ីវិលមិនតិចនាក់ឡើយ។
រុស្ស៊ីថ្លែងបន្តទៀតថាទាហានអ៊ុយក្រែនបាញ់ចូលទីតាំងរបស់រុស្ស៊ី៤៤៤ករណី និងវាយប្រហារដោយដ្រូនជាង៩រយករណីរួមទាំងវាយប្រហារតំបន់គ្រីម៉េ, ប្រ៊ីយ៉ង់, ខឺស និងបែលហ្គោរ៉ូតផងដែរ (Bryansk, Kursk & Belgorod)។ ហេតុនេះហើយរុស្ស៊ីអះអាងថាជនស៊ីវិលរបស់ខ្លួនស្លាប់ និងរបួសមិនតិចនាក់ទេ។ នេះមិនទាន់គិតដល់ការខូចខាតអគារជាច្រើននៅឡើយផង។
គ្រាន់តែផ្អាកបាញ់គ្នាប៉ុន្មានម៉ោងក៏ប្រទេសទាំង២ធ្វើមិនបានផង ដូច្នេះមិនចាំបាច់និយាយទៅដល់កិច្ចព្រមព្រៀងសន្តិភាពនោះទេ។ ប៉ុន្តែលោកត្រាំនៅតែមានសុទិដ្ឋិនិយមនៅក្នុងរឿងនេះជានិច្ច។ កាលពីយប់មិញ ត្រាំសង្ឃឹមថារុស្ស៊ី និងអ៊ុយក្រែននឹងសម្រេចបានកិច្ចព្រមព្រៀងនៅក្នុងសប្ដាហ៍នេះដើម្បីបិទបញ្ចប់ជម្លោះ។ កាលពីថ្ងៃសុក្រ ត្រាំ និងរដ្ឋមន្ត្រីការបរទេសរបស់គាត់ប្រកាសថាអាមេរិកនឹងដកខ្លួនថយពីការដោះស្រាយបញ្ហាអ៊ុយក្រែនប្រសិនបើការចរចាមិនរីកចម្រើនទៅមុខ៕
ចែករំលែកព័តមាននេះ