ប្រទេសថៃ ៖ ប្រភពពីក្រសួងការងារបានប្រកាសប្រាប់អ្នកសារព័ត៌មាន នាព្រឹកថ្ងៃសៅរ៍ ទី១៩ ខែមេសា ឆ្នាំ២០២៥ថា កាលពីល្ងាចថ្ងៃទី១៨ ខែមេសា ឆ្នាំ២០២៥…
ប្រទេសថៃ ៖ ប្រភពពីក្រសួងការងារបានប្រកាសប្រាប់អ្នកសារព័ត៌មាន នាព្រឹកថ្ងៃសៅរ៍ ទី១៩ ខែមេសា ឆ្នាំ២០២៥ថា កាលពីល្ងាចថ្ងៃទី១៨ ខែមេសា ឆ្នាំ២០២៥ លោកសេង សក្តា រដ្ឋលេខាធិការ តំណាងដ៏ខ្ពង់ខ្ពស់របស់លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ហ៊ុន សារឿន ឯកអគ្គរាជទូតកម្ពុជាប្រចាំប្រទេសថៃ ព្រមទាំងមានការចូលរួមពីថ្នាក់ដឹកនាំក្រសួងការងារ, តំណាងក្រុមការងារ ESEA, និងតំណាងសមាគមទីភ្នាក់ងារជ្រើសរើសពលករកម្ពុជា (ACRA) បាននាំយកសារលិខិតរំលែកមរណទុក្ខ និងថវិការបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចំនួន១ម៉ឺនដុល្លារជូនក្រុមគ្រួសារនៃស.ពពលករខ្មែរលោក ផល្លា រតនា ដែលកំពុងធ្វើបុណ្យស.ពនៅក្នុងប្រទេសថៃ ។
លោក ផល្លា រតនា អាយុ២៤ឆ្នាំ ជាពលករខ្មែរដែលធ្វើការ និងរស់នៅក្នុងប្រទេសថៃ បានទទួលមរណភាព ដោយសារការរញ្ជួយដីក្នុងប្រទេសថៃ កាលពីថ្ងៃទី២៨ ខែមីនា ឆ្នាំ២០២៥ ។ នៅក្នុងពិធីបូជាស.ព ដែលបានរៀបចំធ្វើនៅវត្តបាភ្លីយ៉ៃក្លាង ឃុំបាងភ្លីយ៉ៃ ស្រុកបាភ្លី ខេត្តសាមុទ្រប្រាកាន ប្រទេសថៃ លោក សេង សក្តា បានសម្តែងនូវសមានទុក្ខក្តុកក្តួលរន្ធត់ចិត្ត និងសេចក្តីសោកស្តាយស្រណោះអាឡោះអាល័យជាទីបំផុត និងសូមចូលរួមមរណទុក្ខដ៏ក្រៀមក្រំជូនចំពោះលោក សៅ ផល្លា និងលោកស្រី ឆាយ សោភ័ណ្ឌ ជាឪពុកម្តាយនៃស.ព ព្រមទាំងក្រុមគ្រួសារចំពោះការបាត់បង់កូនជាទីស្រឡាញ់ ដែលបានលាចាកលោក និងលាចាកពីក្រុមគ្រួសារ ។
ជាមួយគ្នានេះលោក សេង សក្តា ដែលជាតំណាងឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឧទ្ទិសបួងសួងដល់ដួងវិញ្ញាណក្ខន្ធលោក ផល្លា រតនា សូមបានទៅកាន់សុគតិភពកុំបីឃ្លៀងឃ្លាតឡើយ ។
គួររំលឹកថា កាលពីថ្ងៃទី១៧ ខែមេសា ឆ្នាំ២០២៥ វិទ្យាស្ថានវេជ្ជសាស្ត្រកោសល្យវិច្ច័យនៃមន្ទីរពេទ្យនគរបាលជាតិប្រទេសថៃ បានចេញសេចក្តីជូនដំណឹងអំពីលទ្ធផលនៃការពិនិត្យ កោសល្យវិច្ច័យ DNA ដោយបញ្ជាក់ថា ក្នុងចំណោមសាកស.ពទាំង៤២ ដែលបានរកឃើញ ក្រោមគំនរបាក់បែកនៃអគារសវនកម្មជាតិ គឺជាស.ពរបស់លោក ផល្លា រតនា ដែលជាប្រជាពលរដ្ឋខ្មែរ ។
គួរកត់សម្គាល់ថា ប្រតិបត្តិការស្វែងរកអ្នកបាត់ខ្លួនក្នុងឧបទ្ទវហេតុបាក់រលំអគារការិយាល័យសវនកម្មជាតិថៃដែលកំពុងសាងសង់នៅសង្កាត់ Chatuchak ក្រុងបាងកក រាប់ចាប់ពីថ្ងៃទី២៨ ខែមីនា មកទល់នឹងថ្ងទី១៩ ខែមេសា បានបន្តអស់រយៈពេល២១ថ្ងៃហើយ ដោយគិតត្រឹមម៉ោង១០ព្រឹក ថ្ងៃទី១៨ មេសា រកឃើញអ្នកស្លា.ប់៤២នាក់ របួស៩នាក់ និង ៥០នាក់បន្តបាត់ខ្លួន ។
ក្រៅពីសោកនាដកម្មរលំបាក់អគារ នៅទីក្រុងបាកកង បើតាមលោក Phasakorn Boonyalak អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយ បានរាយការណ៍ កាលពីថ្ងៃទី១៨ ខែមេសាថា គ្រោះរញ្ជួយដីនៅថ្ងៃទី២៨ ខែមីនា ឆ្នាំ២០២៥ បានបង្កការខូចខាតយ៉ាងធ្ងន់ធ្ងរដល់អាយុជីវិត និងទ្រព្យសម្បត្តិរបស់ប្រជាពលរដ្ឋថៃ ដោយក្នុងនោះនាយកដ្ឋានបង្ការ និងកាត់បន្ថយគ្រោះមហន្តរាយបានទទួលរបាយការណ៍អំពីការខូចខាតក្នុងខេត្តចំនួន១៨ ស្រុក១៣៩ ឃុំ៤៣៥ ស្មើនឹង៨៣៦ភូមិ ខណៈដែលទីក្រុងបាងកក ដែលជាតំបន់រងគ្រោះធ្ងន់ធ្ងរជាងគេ ។
ចំពោះរបាយការណ៍ស្តីពីផលប៉ះពាល់ក្នុងនៅទីក្រុងបាងកក គិតត្រឹមថ្ងៃទី១៥ ខែមេសា ឆ្នាំ២០១៥ មានអ្នកស្លា.ប់សរុបចំនួន៤៨នាក់ ក្នុងនោះមានជនជាតិថៃចំនួន៦នាក់ ជនបរទេសចំនួន០៣នាក់ និង២២នាក់ ពុំអាចកំណត់អត្តសញ្ញាណបាន ហើយខូចខាតអគារចំនួន៧ផ្សេងទៀត ៕
ចែករំលែកព័តមាននេះ