ទីក្រុងម៉ូស្គូ៖ តាមមើលទៅ មិនយូរទេ អ៊ុយក្រែនត្រូវតែបង្ខំចិត្តចាកចេញពីតំបន់ខឺសរបស់រុស្ស៊ីដែលពួកគេធ្លាប់វាយកាន់កាប់តាំងពីខែសីហា ឆ្នាំ២០២៤។ ថ្មីៗនេះ រុស្ស៊ីអះអាងថាខ្លួនអាចវាយរំដោះតំបន់ខឺសបានលើសពី៩៩%ទៅហើយ។ ពោលគឺនៅសល់តែបន្តិចបន្តួចប៉ុណ្ណោះនឹងរំដោះបានទាំងស្រុង។ នាយអគ្គសេនាធិការកងទ័ពរុស្ស៊ី ឧត្ដមសេនីយ៍វ៉ាល់ឡឺរី…
ទីក្រុងម៉ូស្គូ៖ តាមមើលទៅ មិនយូរទេ អ៊ុយក្រែនត្រូវតែបង្ខំចិត្តចាកចេញពីតំបន់ខឺសរបស់រុស្ស៊ីដែលពួកគេធ្លាប់វាយកាន់កាប់តាំងពីខែសីហា ឆ្នាំ២០២៤។ ថ្មីៗនេះ រុស្ស៊ីអះអាងថាខ្លួនអាចវាយរំដោះតំបន់ខឺសបានលើសពី៩៩%ទៅហើយ។ ពោលគឺនៅសល់តែបន្តិចបន្តួចប៉ុណ្ណោះនឹងរំដោះបានទាំងស្រុង។ នាយអគ្គសេនាធិការកងទ័ពរុស្ស៊ី ឧត្ដមសេនីយ៍វ៉ាល់ឡឺរី កេរ៉ាស៊ីម៉ូស (Valery Gerasimov) ថ្លែងថាកងទ័ពរបស់លោកវាយបណ្ដេញទ័ពអ៊ុយក្រែនស្ទើរតែអស់រលីងពីតំបន់ខឺសភាគខាងលិច។
លោកថ្លែងប្រាប់លោកពូទីនតាមប្រព័ន្ធវីឌីអូថាទីតាំងដែលធ្លាប់រងការវាយឆ្មក់ពីសំណាក់ទាហានអ៊ុយក្រែនឥឡូវនេះត្រូវរុស្ស៊ីចូលកាន់កាប់យ៉ាងពេញលេញ។ លោកថាទឹកដីទំហំ១២៦០គីឡូម៉ែត្រការ៉េត្រូវរុស្ស៊ីវាយរំដោះបានមកវិញ មានន័យថាស្មើនឹង៩៩,៥%។ តាមពិត រុស្ស៊ីព្យាយាមវាយយកតំបន់ខឺសមកវិញតាំងពីខែសីហាមកម៉្លេះបន្ទាប់ពីអ៊ុយក្រែនវាយកាន់កាប់ទីនេះដោយសេចក្ដីសង្ឃឹមថាបើសិនមានការចរចាសន្តិភាពនាពេលអនាគត ខ្លួនអាចយកតំបន់ខឺសនេះសម្រាប់តថ្លៃគ្នា។
ឥឡូវនេះ បើរុស្ស៊ីវាយយកបានមកវិញទាំងស្រុងមានន័យថាអ៊ុយក្រែនមិនមានអ្វីសម្រាប់តថ្លៃតទៅទៀតឡើយ។ ក្រោយពេលឧត្ដមសេនីយ៍កេរ៉ាស៊ីម៉ូសរាយការណ៍អំពីស្ថានការណ៍សឹកថ្មីៗដូចខាងលើនេះបានតែបន្តិចប៉ុណ្ណោះ លោកពូទីនក៏ប្រកាសជាឯកតោភាគីថារុស្ស៊ីផ្អាកវាយប្រហារអ៊ុយក្រែន៣០ម៉ោងដើម្បីអបអរសាទរពិធីបុណ្យអ៊ីសស្ទើដេ (Easter Day)។
យោងតាមឧត្ដមសេនីយ៍រុស្ស៊ីរូបនេះ កងទ័ពអ៊ុយក្រែននៅសល់ចំណែកដីនៅតំបន់ខឺសប្រហែលត្រឹមតែ៣គីឡូម៉ែត្រការ៉េតែប៉ុណ្ណោះនៅក្នុងភូមិចំនួន២ដែលស្ថិតនៅជាប់នឹងព្រំដែន។ បើមើលក្រឡាមិនស្រួល ពួកគេអាចនឹងបណ្ដោះខ្លួនចូលអ៊ុយក្រែនតែម្ដង។ ឥឡូវនេះឮថារុស្ស៊ីទើបតែវាយយកបានភូមិមួយនៅក្នុងចំណោមនោះកាលពីថ្ងៃសៅរ៍។ នេះបើតាមក្រសួងការពារជាតិរុស្ស៊ី។
ប៉ុន្មានអាទិត្យចុងក្រោយនេះ រុស្ស៊ីសម្រុកវាយប្រហារខ្លាំងទៅលើទីតាំងនានានៅតំបន់ខឺស និងចាប់ផ្ដើមវាយរុញច្រានកងទ័ពអ៊ុយក្រែនឱ្យដកថយជាបន្តបន្ទាប់នៅតំបន់ស៊ូមី (ទឹកដីអ៊ុយក្រែន) ដែលនៅក្បែរតំបន់ខឺសដែរ។ អ៊ុយក្រែនអាចនឹងដកថយពីខឺសមែន ប៉ុន្តែពួកគេងាកទៅវាយលុកចូលតំបន់បែលហ្គោរ៉ូត (Belgorod) របស់រុស្ស៊ីដែលស្ថិតនៅភាគខាងត្បូងតំបន់ខឺស។ ប៉ុន្តែឧត្ដមសេនីយ៍យោធារុស្ស៊ីរូបនេះអះអាងថាកងទ័ពរបស់គាត់អាចវាយបំបែកកម្លាំងរបស់អ៊ុយក្រែននៅតំបន់នោះ៕
ចែករំលែកព័តមាននេះ