ខេត្តបន្ទាយមានជ័យ ៖ បន្ទាប់ពីដំណើរការសិក្សាវគ្គស្រាវជ្រាវត្រួតពិនិត្យកន្លែងកើត ហេតុអស់រយៈពេលមួយខែរួចមក ពិធីបិទវគ្គក៏បានរៀបចំធ្វើនៅរសៀលថ្ងៃទី៣០ មិថុនា ឆ្នាំ២០១១ នៅស្នងការដ្ឋាននគរបាលខេត្ត ក្រោមអធិបតីភាពលោករៀម សារិន អភិបាលរងខេត្ត។ អញ្ជើញចូលរួមក្នុងពិធីនោះ មានអស់លោក លោកស្រី
ខេត្តបន្ទាយមានជ័យ ៖ បន្ទាប់ពីដំណើរការសិក្សាវគ្គស្រាវជ្រាវត្រួតពិនិត្យកន្លែងកើតហេតុអស់រយៈពេលមួយខែរួចមក ពិធីបិទវគ្គក៏បានរៀបចំធ្វើនៅរសៀលថ្ងៃទី៣០ មិថុនា ឆ្នាំ២០១១ នៅស្នងការដ្ឋាននគរបាលខេត្ត ក្រោមអធិបតីភាពលោករៀម សារិន អភិបាលរងខេត្ត។ អញ្ជើញចូលរួមក្នុងពិធីនោះ មានអស់លោក លោកស្រីជាស្នងការរង នាយ-នាយរងការិយាល័យ លោកអធិការ-អធិការរង និងសិក្ខាកាមសរុបចំនួន១០០នាក់ ។
លោកវរសេនីយ៍ទោ ជៀម ផុន នាយការិយាល័យបណ្តុះបណ្តាល និងវិក្រឹតការ និងជាគណៈគ្រប់គ្រងវគ្គ បានរាយការណ៍ពីចំនួនសិក្ខាកាមដែលបានសិក្សាក្នុងវគ្គស្រាវជ្រាវត្រួតពិនិត្យកន្លែងកើតហេតុនេះ គឺមកពីតាមបណ្តាអធិការដ្ឋាននគរបាលស្រុក-ក្រុង និងការិយាល័យជំនាញសរុបចំនួន១០០នាក់ (ស្រី៣នាក់) និងបញ្ជាក់អំពីលទ្ធផលនៃការសិក្សាផងដែរ។
លោកវរសេនីយ៍ឯក ពូន សានិត ស្នងការរងនិងជាប្រធានការិយាល័យកណ្តាលភស្តុភារ ហិរញ្ញវត្ថុ តំណាងលោកឧត្តមសេនីយ៍ស្នងការនគរបាលខេត្ត និងលោករៀម សារិន អភិបាលរងខេត្ត បានវាយតម្លៃខ្ពស់ចំពោះការខិតខំយកចិត្តទុកដាក់របស់សិក្ខាកាមទាំងអស់ ដែលបានប្រឹងប្រែងក្រេបជញ្ជក់នូវខ្លឹមសារមេរៀន និងស្តាប់ការពន្យល់របស់គ្រូឧទ្ទេសនាម ដើម្បីយកចំណេះដឹងនេះទៅអនុវត្តជាក់ស្តែងនៅមូលដ្ឋាន។ ជាមួយនេះក៏បានក្រើនរំលឹកដល់សិក្ខាកាមទាំងអស់ ត្រូវគោរពវិន័យរបស់កងកម្លាំងនគរបាលជាតិឱ្យបានមឺុងមា៉ត់ ព្រោះវិន័យជាគ្រឹះដ៏រឹងមាំរបស់កងកម្លាំងប្រដាប់អាវុធ ពិសេសកងកម្លាំងនគរបាលជាតិ ។
លោករៀម សារិន ក្នុងនាមតំណាងឱ្យលោកអ៊ុង អឿន អភិបាលខេត្ត បានមានប្រសាសន៍ថា វគ្គបណ្តុះបណ្តាលបំប៉នស្រាវជ្រាវត្រួតពិនិត្យកន្លែងកើតហេតុនេះ គឺមានសារសំខាន់ណាស់សម្រាប់មន្ត្រីនគរបាលយុត្តិធម៌យកទៅអនុវត្តក្នុងបេសកកម្មរបស់ខ្លួន ហើយលោកសុំឱ្យយកចំណេះដឹងនេះទៅអនុវត្តឱ្យចំទិសដៅ។ លោកអភិបាលរងខេត្តក៏បានលើកយកនូវនីតិវិធី និងច្បាប់មួយចំនួនមកបង្ហាញប្រាប់ដល់សិក្ខាកាម ដើម្បីជាមូលដ្ឋានគ្រឹះក្នុងការអនុវត្តជំនាញនេះផងដែរ ។
ជាចុងក្រោយ លោកអភិបាលរងខេត្តក៏បានណែនាំដល់សិក្ខាកាមទាំងអស់ នៅពេលបំពេញភារកិច្ចត្រូវអនុវត្តឱ្យបាននូវក្រមសីលធម៌របស់ខ្លួនជាមន្ត្រីអនុវត្តច្បាប់ និងជាកងកម្លាំងនគរបាលជាតិបម្រើឱ្យផលប្រយោជន៍ប្រជាពលរដ្ឋ និងប្រទេសជាតិ ៕
ចែករំលែកព័តមាននេះ