បន្ទាយមានជ័យ ៖ សង្ក្រាន្តចូលឆ្នាំថ្មី រយៈពេល៣ថ្ងៃ មានភ្ញៀវជាតិ និងអន្តរជាតិជាង៦០ម៉ឺននាក់ ដែលមកលេងកម្សាន្ត រហូតដល់ថ្ងៃទី១៦ ខែមេសា ឆ្នាំ២០២៥…
បន្ទាយមានជ័យ ៖ សង្ក្រាន្តចូលឆ្នាំថ្មី រយៈពេល៣ថ្ងៃ មានភ្ញៀវជាតិ និងអន្តរជាតិជាង៦០ម៉ឺននាក់ ដែលមកលេងកម្សាន្ត រហូតដល់ថ្ងៃទី១៦ ខែមេសា ឆ្នាំ២០២៥ នៅខេត្តបន្ទាយមានជ័យ ។
លោក ឈឿង សេរីវុធ ប្រធានមន្ទីពាណិជ្ជកម្មខេត្តបន្ទាយមានជ័យប្រាប់ថា ៖ សង្ក្រានចូលឆ្នាំថ្មីប្រពៃណីយខ្មែររយៈពេល៣ថ្ងៃមានភ្ញៀវជាតិ អន្តរជាតិមកលេងកម្សាន្តនៅខេត្តបន្ទាយមានជ័យ ប្រមាណជាង៦០ម៉ឺននាក់ ក្នុងនោះនៅថ្ងៃទី១៤ ខែមេសា ឆ្នាំ២០២៥មានប្រមាណជិត២០ម៉ឺននាក់ ថ្ងៃទី១៥ ខែមេសា ឆ្នាំ២០២៥ មានប្រមាណជាង២ម៉ឺននាក់ ថ្ងៃទី១៦ ខែមេសា ឆ្នាំ២០២៥ មានប្រមាណ២៥ម៉ឺននាក់ ។
លោកបានបញ្ជាក់ថា ៖ ភ្ញៀវជាតិ និងអន្តរជាតិ ដែលមកលេងកម្សាន្តរយៈពេល៣ថ្ងៃនេះដែលច្រើនជាងគេមាននៅសួនតេជោឈ្នះឈ្នះ ក្រុងសិរីសោភ័ណ ដែលមកលេងកម្សាន្តល្បែងល្បាំប្រជាប្រិយ និងរាំកម្សាន្ត និងមានហូបនំបញ្ចុកមិនតិចជាងតោន សម្រាប់អ្នកលេងហូបហ្វ្រី និងក្រុងប៉ោយប៉ែត មានលេងតាមផ្លូវ ក្នុងទីប្រជុំជន និងបរិវេណកាស៊ីណូមានធុងបាស់ដាក់តាមមុខហាង និងផ្ទះ និងស្រុកថ្មពួកមានប្រាសាទបន្ទាយឆ្មារ និងប្រាសាទបន្ទាយទ័ព ប្រាសាទមេបុណ្យ និងអាងជើងគ្រុស ស្រុកភ្នំស្រុកអាងត្រពាំងថ្មទៅលេងទឹកកម្សាន្ត និងជាទំបន់អភិរក្សសត្វដែលកម្រ និងតាមវត្តអារាម និងតំបន់រម្មណីយដ្ឋានជាច្រើនទៀត ។
លោក ឈឿង សេរីវុធ បានបញ្ជាក់ថា ៖ បើប្រៀបធៀបឆ្នាំ២០២៤កន្លងទៅ សង្ក្រាន្តឆ្នាំ២០២៥នេះ គឺមានភ្ញៀវជាតិ និងអន្តរជាតិមកលេងកម្សាន្តច្រើនជាង ដោយឆ្នាំនេះ ភ្ញៀវមកលេងកម្សាន្តនៅសួនតេជោឈ្នះឈ្នះក្រុងសិរីសោភ័ណ១ថ្ងៃ រាប់ម៉ឺននាក់ និងក្រុងប៉ោយប៉ែត មានច្រើនដូចគ្នា ហើយមានភ្ញៀវអន្តរជាតិក៏ច្រើន ដោយឆ្នាំនេះ រដ្ឋបាលខេត្តបន្ទាយមានជ័យ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានរៀបចំនៅសង្ក្រាន្តសួនតេជោ ឈ្នះឈ្នះមានកន្លែងលេងល្បែងប្រជាប្រិយមានរថយន្តបាញ់ទឹក និងពពុះសាប៊ូទើបភ្ញៀវមកលេងច្រើនខុសពីឆ្នាំមុន ៕
ចែករំលែកព័តមាននេះ