រាជធានីភ្នំពេញ ៖ ពិធីបុណ្យចូលឆ្នាំថ្មី ប្រពៃណីជាតិខ្មែរ (មហាសង្ក្រាន្ត) ឆ្នាំម្សាញ់ នឹងឈានចូលមកដល់ក្នុងពេលឆាប់ៗខាងមុខ នៅវេលាម៉ោង ៤ :…
រាជធានីភ្នំពេញ ៖ ពិធីបុណ្យចូលឆ្នាំថ្មី ប្រពៃណីជាតិខ្មែរ (មហាសង្ក្រាន្ត) ឆ្នាំម្សាញ់ នឹងឈានចូលមកដល់ក្នុងពេលឆាប់ៗខាងមុខ នៅវេលាម៉ោង ៤ : ៤៨ នាទី (ជិតភ្លឺ) ត្រូវនឹងថ្ងៃចន្ទ ២រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៨ ត្រូវនឹងថ្ងៃទី១៤ ខែមេសា ឆ្នាំ២០២៥។
ជាទំនៀមទម្លាប់របស់ខ្មែរយើង នៅរាល់ពេលទទួលទេវតាឆ្នាំថ្មី គឺតាមលំនៅដ្ឋាននានា បងប្អូនខ្មែរយើងត្រូវរៀបចំនូវរណ្ដាប់ទទួលទេវតាឆ្នាំថ្មី។ ប្រាកដណាស់ រណ្ដាប់ទទួលទេវតា តាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយសម្រាប់តាំងគ្រឿងពលីការផ្សេងៗ។
ដូច្នេះ ដើម្បីក្តីសុខសុភមង្គល និងក្តីចម្រើនរុងរឿងក្នុងសង្គមគ្រួសារ មកដឹងលម្អិតទាំងអស់គ្នាថាតើយើង គួរត្រៀមរណ្តាប់អ្វីខ្លះទៅសម្រាប់ទទួលទេវតាឆ្នាំថ្ម ឆ្នាំម្សាញ? ទេវតាឆ្នាំថ្មី គណនាឆ្នាំម្សាញ់ឥឡូវនេះសង្ក្រាន្តចូលនៅថ្ងៃចន្ទ ២រោចខែចេត្រ ត្រូវនឹង ថ្ងៃទី១៤ ខែមេសា គ្រឹស្តសករាជ២០២៥ វេលាម៉ោង០៤ម៉៤៨នាទី។
ពេលនោះព្រះ អាទិត្យចេញពីមីនរាសី ទៅឋិតនៅឯមេសរាសី តាមផ្លូវគោវិថី គឺផ្លូវកណ្តាលមានទេវ ធីតាមួយព្រះអង្គជាមគ្គនាយិកាព្រះនាម គោរាគៈទេវី ជារាជបុត្រីទី២នៃកបិល មហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយ សៀត ផ្កាអង្គារបស្ស អភរណៈ កែវមុក្តា ភក្សាហារទ្រង់ តេលំ (ប្រេង) ព្រះហស្តស្តាំ ទ្រង់ ព្រះខ័ន្ធព្រហស្តឆ្វេងទ្រង់ ឈើច្រត់ ទ្រង់គង់ផ្ទំបិទព្រះនេត្រលើខ្នងស្តេចព្យាសៈ (ខ្លា) ជាយានពាហនៈ។
យោងតាមសៀវភៅមហាសង្ក្រាន្ត សង្ត្រាន្តឆ្នាំថ្មី ឆ្នាំម្សាញ់សប្តស័ក ព.ស ២៥៦៩ គ.ស ២០២៥ របស់ ឯកឧត្តម អ៊ឹម បុរិន្ទ អនុប្រធានអចិន្ត្រៃយ៍គណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានលើកឡើងថា «រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួល ទេវតានៅខាងមុខផ្ទះមួយ សម្រាប់តាំងគ្រឿងពលីការផ្សេងៗ។
ត្រូវរៀបក្រាលសំពត់ ពណ៌សឬសំពត់តាមអម្ពរទេវធីតាក៏បាន ហើយរៀបចំនូវគ្រឿងសក្ការបូជា ទេវតា មានជាអាទិ៍បាយសី៩ថ្នាក់មួយគូបាយសីពថ្នាក់មួយគូបាយសី៥ថ្នាក់មួយគូបាយសី ៣ថ្នាក់មួយគូ បាយសីប៉ាឆាមមួយគូស្លាធម៌មួយគូ ទឹកអប់មួយគូ ទៀន៥ធូប៥លាច ៥ផ្កា៥ ដាក់លើជើងពាន១គូ ចេកនួនចេកណាំវ៉ា ដាក់លើជើងពានមួយគូ ផ្លែឈើ ១១មុខ រៀបដាក់ជើងពាន១១គូ ដូងឡៅមួយគូ ទឹកស្អាតពីរកែវ។
ស្រេចហើយនៅ វេលាម៉ោងដែលទេវតាចុះមក ត្រូវជួបជុំក្រុមគ្រួសារដើម្បីថ្វាយបង្គំ ព្រះនមស្សការ ព្រះរតនៈត្រ័យ សមាទានសីល ហើយតាំងចិត្តឱ្យបានស្អាតបរិសុទ្ធជ្រះស្រឡះនូវ មន្ទិលទាំងពួងតម្កល់ចិត្ត រំពឹងគិតទៅលើព្រះពុទ្ធព្រះធម៌ព្រះសង្ឃជាទីពឹងទី រឮក លុះចប់ពិធីទទួលទេវតា។ នៅខាងដើមរានគួរមានភ្លោះមួយបាំងផង ។ នៅគ្រប់ដង្វាយទាំងអស់ត្រូវដាក់ផ្កាម្លិះភួងពីលើគ្រប់ដង្វាយ នៅលើជើងពាន និងលើបាយសីត្រូវដោតទៀនហើយដុតបំភ្លឺ។
ទៀតសោត ការកំណត់ប្រតិទិន ឆ្នាំនេះ ជាឆ្នាំប្រក្រតីសុទិន ថ្ងៃក្នុងឆ្នាំសុរិយគតិ មានចំនួន ៣៦៥ថ្ងៃ។ ខែកុម្ភៈ ឆ្នាំ២០២៦ មានចំនួន២៨ថ្ងៃ។ ជាឆ្នាំអធិកវារៈ ខែជេស្ឋមាន៣០ថ្ងៃ។ ឆ្នាំចន្ទគតិមាន ចំនួន៣៥៥ថ្ងៃ។ ប្រក្រតីមាសខែចន្ទគតិមានចំនួន១២ខែ។ចូលព្រះវស្សានៅថ្ងៃសុក្រ ១រោច ខែអាសាឍត្រូវនឹងថ្ងៃទី១១ខែកក្កដាគ.ស.២០២៥ ជាវារៈមហាធិក បានឫក្ស ២០ តិថី ១៦ ជាកាលវស្សានរដូវត្រូវតាមគន្លងប្រពៃណីពីបរមបុរាណដែលមាន ព្រះអាទិត្យនិងព្រះចន្ទចរជាប្រធាន ត្រឹមត្រូវតាមចក្ររាសីឱ្យបានដឹងកំណត់ទ្វាទស មាស ទើបធ្វើការសារពើបានចម្រើននូវសិរីសួស្ដីជ័យមង្គលបរិបូណ៌ហោង៕
ចែករំលែកព័តមាននេះ