ខេត្តកណ្តាល ៖ បុរសម្នាក់ឈប់សម្រាកពីការងាររោងចក្រ ជិះម៉ូតូឌុបប្រពន្ធកូនទៅស្រុកកំណើត ដើម្បីជួបជុំឪពុកម្តាយបងប្អូន នៅថ្ងៃចូលឆ្នាំខាងមុខនេះ ជាអកុសលកំពុងឆ្លងផ្លូវ ត្រូវរថយន្តបុកពេញទំហឹង ស្លា.ប់ទាំង២នាក់ ភ្លាមៗ…
ខេត្តកណ្តាល ៖ បុរសម្នាក់ឈប់សម្រាកពីការងាររោងចក្រ ជិះម៉ូតូឌុបប្រពន្ធកូនទៅស្រុកកំណើត ដើម្បីជួបជុំឪពុកម្តាយបងប្អូន នៅថ្ងៃចូលឆ្នាំខាងមុខនេះ ជាអកុសលកំពុងឆ្លងផ្លូវ ត្រូវរថយន្តបុកពេញទំហឹង ស្លា.ប់ទាំង២នាក់ ភ្លាមៗ ចំណែកកូនតូចរងរបួសស្រាល រួចក៏រថយន្តបង្កនោះបន្ថែមល្បឿនបើករត់គេចខ្លួនបាត់ស្រមោល ។
ហេតុការណ៍នេះ បានកើតឡើងកាលពីវេលាម៉ោង០៨និង៣០នាទីយប់ថ្ងៃទី១០ ខែមេសា ឆ្នាំ២០២៥ នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រ២៨-២៩ ស្ថិតនៅភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្ដាល ។
ស.ពជនរងគ្រោះទី០១ មានឈ្មោះ សឿន សុធារ៉ា ភេទប្រុស អាយុ៤៥ឆ្នាំ (ត្រូវជាប្តី) រស់នៅភូមិត្រពាំងខ្ចៅ ឃុំត្រាចទង ស្រុកឧដុង្គ ខេត្តកំពង់ស្ពឺ ។ ជនរងគ្រោះទី០២ មានឈ្មោះ កែម សាមាន ភេទស្រី អាយុ៤២ (ត្រូវជាប្រពន្ធ)។ ចំណែកកូនស្រីឈ្មោះស.ស.ព អាយុ៣ឆ្នាំ (របួសស្រាល) ។
បើយោងតាមប្រភពព័ត៌មានពីប្រជាពលរដ្ឋបានឱ្យដឹងថា មុនពេលកើតហេតុ ជនរងគ្រោះបានជិះម៉ូតូមួយគ្រឿង ម៉ាក HONDA Beat C110 ពណ៌ស ពាក់ផ្លាកលេខ ភ្នំពេញ 1LF-7970 បានឌុបប្រពន្ធ និងកូន ដើម្បីទៅលេងស្រុកកំណើត ក្នុងទិសដៅពីកើតទៅលិច (ភ្នំពេញ-កំពង់ស្ពឺ) លុះពេលមកដល់ចំណុចកើតហេតុខាងលើ ម៉ូតូបានបត់ឆ្វេង ដើម្បីឆ្លងផ្លូវ ស្របពេលនោះ ក៏មានរថយន្តមួយគ្រឿង មិនស្គាល់ម៉ាក បើកបរមកបញ្ច្រាសទិសគ្នាពីលិចទៅកើត បានបុកម៉ូតូយ៉ាងពេញទំហឹង បណ្តាលឲ្យជនរងគ្រោះ០២នាក់ប្តីប្រពន្ធ បែកក្បាលស្លា.ប់ភ្លាមៗនៅកន្លែងកើតហេតុ ខណៈដែលកូនស្រីរងរបួសស្រាល ត្រូវបានប្រជាពលរដ្ឋនាំទៅកាន់មន្ទីរពេទ្យ ។ ចំណែកឯរថយន្ត បន្ថែមល្បឿនបើករត់បាត់ស្រមោលតែម្តង ។
បច្ចុប្បន្ន ស.ពត្រូវបានសមត្ថកិច្ចជំនាញ ប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែកម៉ូតូ ត្រូវបានសមត្ថកិច្ចវាស់វែងយកម៉ូតូទៅរក្សាទុក នៅអធិការដ្ឋាននគរបាលស្រុក អង្គស្នួល ដើម្បីរង់ចាំក្រុមគ្រួសារមកទទួលយក ចំពោះរថយន្ត កម្លាំងជំនាញបានកំពុងធ្វើការស្រាវជ្រាវតាមរយៈកាមេរ៉ាសុវត្ថិភាព ដើម្បីយកមកដោះស្រាយគ្នា តាមនិតិវិធីច្បាប់ ៕
ចែករំលែកព័តមាននេះ