ក្រុមបាល់ទាត់ជម្រើសជាតិកម្ពុជា បានធ្លាក់ចេញពីការប្រកួតជម្រុះបឋមសម្រាប់ World Cup ហើយ បន្ទាប់ពីលេងចាញ់ក្រុមឡាវក្នុងលទ្ធផល២ទល់នឹង៦ក្នុងម៉ោងបន្ថែម កាលពីល្ងាចថ្ងៃទី៣ កក្កដា ក្នុងទីក្រុងវៀងច័ន្ទ ប្រទេសឡាវនោះរួចមក។
លេងក្នុង៩០នាទីពេញ ក្រុមបាល់ទាត់ជម្រើសជាតិឡាវបានយកឈ្នះកម្ពុជា៤ទល់នឹង២។ លទ្ធផល៤ទល់នឹង២នេះ ដូចគ្នានឹងការដែលក្រុមកម្ពុជាឈ្នះឡាវលើទឹកដីខ្លួនឯង កាលពីថ្ងៃទី២៩ មិថុនាដែរ ។ ដូច្នេះតម្រូវឱ្យក្រុមទាំង២លេង៣០នាទីបន្ថែមទៀត ការលេងបន្ថែមម៉ោង៣០នាទី។ ការលេងម្តង១៥នាទីនេះហើយ ដែលក្រុមឡាវឈ្នះកម្ពុជា២ទល់នឹង០ ដោយ១៥នាទីដំបូងឡាវនាំមុខ១ទល់នឹង០ និង១៥នាទីបន្ទាប់ ឡាវស៊ុតចូល១គ្រាប់ទៀត ដែល២គ្រាប់ក្នុងម៉ោងបន្ថែមនេះ ធ្វើឱ្យក្រុមជម្រើសជាតិកម្ពុជាធ្លាក់ចេញពីការប្រកួតជម្រុះបឋម World Cup ឆ្នាំ២០១៤ ដែលនឹងប្រារព្ធធ្វើនៅប្រទេសប្រេស៊ីល។
ទោះជាយ៉ាងណា បើតាមអ្នកចាត់ការទូទៅក្រុមបាល់ទាត់ជម្រើជាតិកម្ពុជា លោកវ៉ាន់ លី ធ្លាប់បានបញ្ជាក់ប្រាប់កោះសន្តិភាពកន្លងមកថា «ការប្រកួតជម្រុះបឋមពានរង្វាន់ពិភពលោកនេះ មិនមែនជាទិសដៅសម្រាប់ក្រុមកម្ពុជានោះទេ ។ ទិសដៅរបស់កម្ពុជាគឺជាការប្រកួតស៊ីហ្គេមនៅប្រទេសឥណ្ឌូណេស៊ីដែលនឹងធ្វើឡើងនៅខែ វិច្ឆិកាខាងមុខ» ៕
ចែករំលែកព័តមាននេះ