ប៉ុន្មានម៉ោង បន្ទាប់ពីការដំឡើងពន្ធរបស់អាមេរិកចំនួន១០៤ភាគរយលើទំនិញចិន បានចូលជាធរមាន ប្រទេសចិន បានព្រមាននឹងធ្វើការតបតខ្លាំងក្លាចំពោះចំណាត់ការរបស់អាមេរិក ។ នេះបើតាមការផ្សាយរបស់សារព័ត៌មាន CNBC កាលពីរសៀលថ្ងៃទី៩ ខែមេសា…
ប៉ុន្មានម៉ោង បន្ទាប់ពីការដំឡើងពន្ធរបស់អាមេរិកចំនួន១០៤ភាគរយលើទំនិញចិន បានចូលជាធរមាន ប្រទេសចិន បានព្រមាននឹងធ្វើការតបតខ្លាំងក្លាចំពោះចំណាត់ការរបស់អាមេរិក ។ នេះបើតាមការផ្សាយរបស់សារព័ត៌មាន CNBC កាលពីរសៀលថ្ងៃទី៩ ខែមេសា ។
លោក លីន ជៀន អ្នកនាំពាក្យក្រសួងការបរទេសចិនបាននិយាយថា ប្រទេសចិននឹងចាត់វិធានការតបតយ៉ាងខ្លាំងក្លា និងដាច់ខាតដើម្បីការពារផលប្រយោជន៍របស់ចិន ។ ការដំឡើងពន្ធថ្មីលើទំនិញប្រទេសជាច្រើនដែលចូលទីផ្សារអាមេរិក បានចូលជាធរមានហើយនៅពេលនេះម៉ោងនៅប្រទេសកម្ពុជា ដោយធ្វើអោយសង្គ្រាមពាណិជ្ជកម្មកាន់តែឆាបឆេះ ។
ធ្ងន់ជាងគេនោះ លោកដូ ណាល់ត្រាំ ប្រធានាធិបតីអាមេរិកបានសម្រេចនៅព្រឹកថ្ងៃពុធម៉ោងនៅកម្ពុជាដំឡើងពន្ធបន្ថែមទៀតចំនួន៥០ភាគរយ ដោយធ្វើអោយពន្ធលើទំនិញចិននឹងត្រូវឡើងដល់១០៤ភាគរយ។
លោកត្រាំ ដាក់ពន្ធបន្ថែម៥០ភាគរយទៀតលើទំនិញចិន បន្ទាប់ពីចិនបានសងសឹងដាក់ពន្ធទំនិញ៣៤ភាគរយលើទំនិញអាមេរិក ជាការឆ្លើយតបនឹងការដំឡើងពន្ធរបស់អាមេរិកលើទំនិញចិនចំនួន៣៤ភាគរយកាលពីចុងខែមីនាទៅលើពន្ធដែលមានស្រាប់២០ភាគរយ។
លោកត្រាំសម្រេចដាក់ពន្ធបន្ថែម៥០ភាគរយទៀតមែននោះ វានឹងធ្វើអោយពន្ធលើទំនិញរបស់ចិនឡើងដល់១០៤ភាគរយ ពីព្រោះអាមេរិកបានដំឡើងពន្ធ៣៤ភាគរយទៅលើពន្ធ២០ភាគរយលើទំនិញចិនកាលពីខែមីនា។
ចិនទំនងជាមិននៅស្ងៀមអោយអាមេរិកធ្វើបាបស្រេចចិត្តដែរ។ ចិនក៏ទំនងជានឹងសាងសឹកវិញដូចអ្វីដែលចិនបានប្រតិកម្មកន្លងមក ហើយចិនបាននិយាយថា «អាមេរិកប្រព្រឹត្តកំហុសមួយហើយមួយទៀត»។ ទីផ្សារភាគហ៊ុនក៏ចាប់ផ្តើមធ្លាក់ចុះដោយសារការដំឡើងពន្ធរបស់អាមេរិកផងដែរ៕
ចែករំលែកព័តមាននេះ