ខេត្តស្វាយរៀង ៖ ជនជាតិវៀតណាមម្នាក់ សង្ស័យបែកថ្នាំ បានកាន់កាំបិតចុងស្រួចក្នុងដៃ ដើរចូលអុកឡុកក្នុងហាងលក់បន្លែមួយ បង្កឲ្យមានការភ្ញាក់ផ្អើល ខណៈនោះមានកម្មករអ្នកដឹកបន្លែ ១ក្រុម បិទទ្វារហាងព្រួតវាយជនរងគ្រោះបណ្តាលឲ្យរងរបួសធ្ងន់ធ្ងរ…
ខេត្តស្វាយរៀង ៖ ជនជាតិវៀតណាមម្នាក់ សង្ស័យបែកថ្នាំ បានកាន់កាំបិតចុងស្រួចក្នុងដៃ ដើរចូលអុកឡុកក្នុងហាងលក់បន្លែមួយ បង្កឲ្យមានការភ្ញាក់ផ្អើល ខណៈនោះមានកម្មករអ្នកដឹកបន្លែ ១ក្រុម បិទទ្វារហាងព្រួតវាយជនរងគ្រោះបណ្តាលឲ្យរងរបួសធ្ងន់ធ្ងរ រួចលើកជនរងគ្រោះមកទុកចោលនៅខាងមុខហាង ហើយបានស្លា.ប់ បន្ទាប់ពីសមត្ថកិច្ចបញ្ជូនទៅកាន់មន្ទីរពេទ្យខេត្តស្វាយរៀង ។
បើតាមសមត្ថកិច្ចបានឲ្យដឹងថា កាលពីថ្ងៃទី០៦ ខែមេសា ឆ្នាំ២០២៥ វេលាម៉ោង ០៧និង៤០នាទីព្រឹក ការិយាល័យជំនាញបានទទួលព័ត៌មានពីក្រុមគ្រូពេទ្យ នៃមន្ទីរពេទ្យខេត្តស្វាយរៀងថា មានជនជាតិវៀតណាមម្នាក់ បានស្លា.ប់ពេលបញ្ជូនមកដល់មន្ទីរពេទ្យខេត្តស្វាយរៀង ។
ប្រភពបានបន្តថា ក្រោយពីទទួលបានព័ត៌មានភ្លាម ដោយមានបទបញ្ជាពីលោកឧត្ដមសេនីយ៍ទោស្នងការនគរបាលខេត្ត លោកវរសេនីយ៍ឯក គឹម ឡៃ ស្នងការរងទទួលផែនការងារនគរបាលព្រហ្មទណ្ឌ បានដឹកនាំកម្លាំងជំនាញការិយាល័យនគរបាលបច្ចេកទេស និងវិទ្យាសាស្ត្រ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងជំនាញ នៃអធិការដ្ឋាននគរបាលក្រុងស្វាយរៀង និងលោកវេជ្ជបណ្ឌិត ជួន សម្បត្តិ សមាជិកគណៈកម្មការកោសល្យវិច័យ នៃមន្ទីរពេទ្យខេត្តស្វាយរៀង ដោយមានការសម្របសម្រួលនីតិវិធីពីលោក ចាន់ វណ្ណៈ ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង បានចុះទៅពិនិត្យ និងធ្វើការស្រាវជ្រាវ ។
សមត្ថកិច្ចបានឲ្យដឹងថា ៖ ជាលទ្ធផល នៃការពិនិត្យសាកសព ជនរងគ្រោះឈ្មោះ ង្វៀង វ៉ាន់ជុង (NGUYEN VAN CHUNG) ភេទប្រុស ជនជាតិវៀតណាម កើតថ្ងៃទី១៥ ខែឧសភា ឆ្នាំ១៩៧៥ កាន់អត្តសញ្ញាណបណ្ណវៀតណាម មុខរបរមិនពិតប្រាកដ។ ហើយនៅលើខ្លួនប្រាណសាកស.ព មានស្នាមជាំជាច្រើនកន្លែង ។
តាមការសន្និដ្ឋានផ្អែកតាមការពិនិត្យសាកសព សមត្ថកិច្ចជំនាញ និងគ្រូពេទ្យ សន្និដ្ឋានបានថា ៖ ឈ្មោះ ង្វៀង វ៉ាន់ជុង ស្លា.ប់ដោយសារការប្រព្រឹត្តអំពើហិ.ង្សា ដោយឡែកសាកស.ព សមត្ថកិច្ចបានបញ្ជូនតាមរថយន្តយកទៅរក្សាទុកនៅសាលតម្កល់ស.ពក្នុងវត្តទឹកថ្លា រាជធានីភ្នំពេញ ។
សមត្ថកិច្ចបានបញ្ជាក់ថា លទ្ធផល នៃការស្រាវជ្រាវដល់កន្លែងកើតហេតុ បានឱ្យដឹងថា កាលពីព្រលឹមថ្ងៃទី០៦ ខែមេសា ឆ្នាំ២០២៥ មានបុរសជនជាតិវៀតណាមម្នាក់ មិនស្គាល់អត្តសញ្ញាណ ស្លៀកខោខ្លី គ្មានអាវ ដេកសន្លប់បាត់ស្មារតីនៅត្រង់ចំណុចខាងមុខផ្ទះឈ្មោះ យិន ស៊ីថាន ហើយត្រូវបានបញ្ជូនតាមរថយន្តសង្គ្រោះយកមកមន្ទីរពេទ្យ ។
សមត្ថកិច្ចធ្វើការស្រាវជ្រាវ និងតាមពិនិត្យតាមរយៈកាមេរ៉ាសុវត្ថិភាពរហូតមកដល់ម៉ោង១២និង៣០នាទី ឃើញថា កាលពីវេលាម៉ោង០៤និង៥០នាទីទៀបភ្លឺ មានបុរសជនជាតិវៀតណាមឈ្មោះ ង្វៀង វ៉ាន់ជុង ស្លៀកខោខ្លី ពណ៌ខ្មៅ គ្មានអាវ ដើរកាន់កាំបិតពីទិសខាងកើតមកខាងលិច មកដល់ចំណុចហាងលក់បន្លែគ្មានស្លាកយីហោ មួយកន្លែង បានរត់ចូលក្នុងហាង តែត្រូវកម្មករនៅខាងក្នុងនាំគ្នាដេញចេញមកវិញ ពេលនោះឈ្មោះ ង្វៀង វ៉ាន់ជុង បានដើរឆ្លងផ្លូវចូលទៅក្នុងផ្ទះលក់ដូរឈ្មោះ យិន ស៊ីថាន ខណៈនោះម្ចាស់ផ្ទះបានចាក់សោរទ្វាររួចដើរទៅក្រោយផ្ទះ ក៏មានមនុស្សមួយក្រុមរត់ចូលទៅ បានមួយសន្ទុះ ក៏ឃើញលើកសែងបុរសជនជាតិវៀតណាមនោះ មកទុកខាងមុខផ្ទះ ។
ប្រភពបន្តថា ក្រោយទទួលបានរូបភាពវីដេអូ ពីកាម៉ារ៉ាសុវត្ថិភាពនេះរួចមក សមត្ថកិច្ចជំនាញ បានធ្វើការនាំខ្លួនបុគ្គលសង្ស័យពាក់ព័ន្ធចំនួន ០៥នាក់ ជាជនជាតិខ្មែរ យកមកសាកសួរនៅអធិការដ្ឋាននគរបាលក្រុងបាវិត។ បុគ្គលសង្ស័យរួមមាន ៖
១/ឈ្មោះ យិន ស៊ីថាន ភេទប្រុស អាយុ ៣៩ឆ្នាំ មុខរបរកម្មករដឹកបន្លែ មានទីលំនៅភូមិតាពៅ សង្កាត់បាវិត ក្រុងបាវិត ខេត្តស្វាយរៀង។ ២/ឈ្មោះ អ៊ុក តៃនិញ ភេទប្រុស អាយុ ១៧ឆ្នាំ មុខរបរកម្មករដឹកបន្លែ មានទីលំនៅភូមិតាបិប សង្កាត់បាវិត ក្រុងបាវិត ខេត្តស្វាយរៀង។ ៣/ឈ្មោះ វាសនា សាលិ ភេទប្រុស អាយុ ១៦ឆ្នាំ មុខរបរកម្មករដឹកបន្លែ មានទីលំនៅភូមិតាបិប សង្កាត់បាវិត ក្រងបាវិត ខេត្តស្វាយរៀង។
៤/ឈ្មោះ សូរ ប្រុសណេត ភេទប្រុស អាយុ ២៤ឆ្នាំ មុខរបរកម្មករដឹកបន្លែ មានទីលំនៅភូមិតាបិប សង្កាត់បាវិត ក្រងបាវិត ខេត្តស្វាយរៀង និង៥/ឈ្មោះ តន ម៉េងហួរ ហៅត្រេន ភេទប្រុស អាយុ ១៨ឆ្នាំ មុខរបរកម្មករដឹកបន្លែ មានទីលំនៅភូមិព្រៃរកា ឃុំដូនស ស្រុកស្វាយជ្រំ ខេត្តស្វាយរៀង ។
នៅចំពោះមុខសមត្ថកិច្ចជនសង្ស័យបានឆ្លើយដោះសារ ដោយឈ្មោះ អ៊ុក តៃនិញ និងឈ្មោះ វាសនា សាលិ ឆ្លើយថា ពួកខ្លួនចូលរួមជួយឃាត់ប៉ុន្តែមិនវាយទៅលើបុរសនោះទេ។ រីឯឈ្មោះ សូរ ប្រុសណេត និងឈ្មោះ តន ម៉េងហួរ ហៅត្រេន ឆ្លើយថា ពួកខ្លួនរត់ទៅជួយឃាត់ រួចឈ្មោះ ណេត បានទាត់មួយជើងចំត្រគៀក និងឈ្មោះ ត្រេន វាយមួយខ្សែក្រវ៉ាតចំខ្នង ។ ចំណែកឈ្មោះ យិន ស៊ីថាន ឆ្លើយថា ខ្លួនរត់ទៅនាំប្រពន្ធកូនចូលបន្ទប់ចាក់សោរពុំបានវាយជនរងគ្រោះនោះទេ។ ទោះបីយ៉ាងណា សមត្ថកិច្ចបានឃាត់ខ្លួនជនសង្ស័យចំនួន០៥នាក់ កសាងសំណុំរឿងបញ្ជូនទៅសាលាដំបូងខេត្តស្វាយរៀង ចាត់ការតាមនីតិវិធី ៕
ចែករំលែកព័តមាននេះ