ខេត្តស្វាយរៀង ៖ អាជ្ញាធរស្រុករមាសហែក បានប្រើវិធានការក្តៅ ចំពោះពលរដ្ឋ ដែលសាងសង់របងរំលោភលើចិញ្ជើមផ្លូវសាធារណៈ បន្ទាប់ពីអាជ្ញាធរជូនដំណឹងជាច្រើនលើក ច្រើនសារហើយ មិនព្រមរុះរើ ។…
ខេត្តស្វាយរៀង ៖ អាជ្ញាធរស្រុករមាសហែក បានប្រើវិធានការក្តៅ ចំពោះពលរដ្ឋ ដែលសាងសង់របងរំលោភលើចិញ្ជើមផ្លូវសាធារណៈ បន្ទាប់ពីអាជ្ញាធរជូនដំណឹងជាច្រើនលើក ច្រើនសារហើយ មិនព្រមរុះរើ ។ ករណីនេះបានកើតឡើងនៅព្រឹកថ្ងៃសុក្រទី៤មេសា២០២៥នៅភូមិតាប៉ាងឃុំម្រាមស្រុករមាសហែក ។
ពាក់ព័ន្ធនឹងករណីនេះ អាជ្ញាធរស្រុករមាសហែក បានសម្រេចបង្កើតគណៈកម្មការចម្រុះចុះរុះរើរបងតាមដងផ្លូវ និងចេតិយ ដែលប៉ះពាល់ក្នុងដំណើរការស្ថាបនាជួសជុលនៅថ្ងៃទី៤ ខែមេសា ឆ្នាំ២០២៥ ដោយដឹកនាំដោយលោក ស៊ូ ម៉ុល អភិបាលស្រុករមាសហែក លោក ស្វាយ សុភាព អភិបាល រងស្រុក អាជ្ញាធរឃុំ និងកម្លាំងសមត្ថកិច្ចចម្រុះជាច្រើននាក់ ។
បើតាមលោក ស៊ូ ម៉ុល អភិបាល ស្រុករមាសហែក បានឲ្យដឹងថា ផ្លូវមួយខ្សែនេះមានប្រវែង ១២,៤៣០ម៉ែត្រ ទទឹងសាច់កៅស៊ូ ៧ម៉ែត្រ និងមានក្រាលបេតុងតាមតំបន់ខ្លះៗ នេះគិតទាំងជើងទេរចេញសងខាងអាច ១២ទៅ១៣ម៉ែត្រ គិតចាប់ពីឃុំចន្ត្រីចេញពីផ្លូវជាតិលេខ៣១៥ ឆ្ពោះទៅចុងម្រាមខាងជើង ត្រូវបានរាជរដ្ឋាភិបាលផ្តល់ថវិកា ក្នុងការស្ថាបនាជួសជុលឡើងវិញ ។
លោកអភិបាលស្រុក បានបន្តទៀតថា មុននឹងសមត្ថកិច្ចចុះ រុះរើនោះ គឺទាំងជំនាញទាំងអាជ្ញាធរបានចេញខិលិតជូនដំណឹង ក៏ដូចជាអញ្ជើញពលរដ្ឋ ដែលមានរបងធ្វើប៉ះពាល់ដល់ផ្លូវសាធារណៈទាំងអស់មកប្រជុំសម្របសម្រួលជាច្រើនលើកច្រើនសារួចមកហើយ ប៉ុន្ដែពួកគាត់បានធ្វើកិច្ចសន្យាសុំរុះរើដោយខ្លួនឯង ក៏ប៉ុន្តែរហូតមកពេលនេះ មិនព្រមរុះរើចេញតាមកិច្ចសន្យាកំណត់ ទើបអាជ្ញាធរអនុវត្តតាមច្បាប់ ។
លោក ស៊ូ ម៉ុល អភិបាល ស្រុករមាសហែក បានបញ្ជាក់ទៀតថា ចំពោះកិច្ចសន្យាព្រមព្រៀង ៖
ទី១, ឈ្មោះ សោម វែង ភេទប្រុស អាយុ ៥០ ឆ្នាំ សញ្ជាតិខ្មែរ មុខរបរបច្ចុប្បន្ន គ្រូ ភេទអាយុឆ្នាំ សញ្ជាតិខ្មែរ មុខរបរគ្រូបង្រៀនមានទីលំនៅបច្ចុប្បន្នភូមិ តាប៉ាង ឃុំ ម្រាម ស្រុករមាសហែក ខេត្តស្វាយរៀង ហៅភាគី(ក) ។
ទី២,ឈ្មោះ ម៉ៅ ហ៊ក់ ហៅដេ ភេទស្រី អាយុ ៦៣ឆ្នាំ មុខរបរកសិករនៅភូមិ តាប៉ាង ឃុំ ម្រាម ស្រុក រមាសហែក ខេត្តស្វាយរៀង ហៅភាគី(ក)។ ទី៣,ម៉ៅ ស៊ុង ភេទប្រុស អាយុ ៦៣ឆ្នាំ មុខរបរកសិករ នៅភូមិ តាប៉ាង ឃុំ ម្រាម ស្រុក រមាសហែក ខេត្តស្វាយរៀង ហៅភាគី(ក) ។ និងឈ្មោះ កែន សាមី ភេទប្រុស អាយុ៧២ឆ្នាំ សញ្ជាតិខ្មែរ ជាមេឃុំម្រាម ស្រុករមាសហែក ខេត្តស្វាយរៀង ហៅថាភាគី(ខ) ។
បើតាមកិច្ចសន្យាព្រមព្រៀងគ្នា សម្រាប់ភាគី (ក) បានបញ្ជាក់ថា បើភាគីខាងរោងបុណ្យ យល់ព្រម រុះរើ រោងបុណ្យ ត្រឹមគំនូស ដែលក្រុមហ៊ុនបានវាស់វែង និងបាញ់ថ្នាំពណ៌ក្រហមនោះ បានរួចរាល់នៅពេលណា ក៏យល់ព្រមឱ្យរុះរើរបង និងទ្រព្យសម្បត្តិផ្សេងៗ ដែលមានការប៉ះពាល់ដល់ការសាងសង់ផ្លូវ នៅពេលនោះដែរ ។ ហើយបើភាគីខាងរោងបុណ្យ មិនព្រម រុះរើ រោងបុណ្យ ត្រឹមគំនូស ដែលក្រុមហ៊ុនបានវាស់វែង និងបាញ់ថ្នាំពណ៌ក្រហម នោះទេ ក៏មិនយល់ព្រមឱ្យចុះរុះរើរបង និងទ្រព្យសម្បត្តិផ្សេងៗដែរ ។
ចំណែកភាគី (ខ) បានបញ្ជាក់ថា បើភាគីខាងរោងបុណ្យ មិនព្រម រុះរើ រោងបុណ្យ ត្រឹមគំនូសដែលក្រុមហ៊ុនបានវាស់វែង និងបាញ់ថ្នាំពណ៌ក្រហម នោះទេ យើងខ្ញុំជាមេឃុំ ក្រុមប្រឹក្សាឃុំ និងស្មៀនឃុំ ធានាអះអាងថា ឈប់តវ៉ា ពាក់ព័ន្ធនឹង របង ឬទ្រព្យ សម្បត្តិផ្សេងៗរបស់ ភាតិ(ក) ដែលធ្លាប់មានការប៉ះពាល់ដល់ការសាងសង់ផ្លូវ តទៅទៀតហើយ ។ បន្ទាប់ពីបានអាន និងពន្យល់យ៉ាងច្បាស់លាស់ នូវខ្លឹមសារទាំងអស់ នៃកិច្ចព្រមព្រៀងភាគីទាំងពីរ បានយល់ព្រម គោរព និងអនុវត្តតាមនូវគ្រប់ចំណុច នៃកិច្ចព្រមព្រៀងនេះដោយស្ម័គ្រចិត្ត និងគ្មានការកែប្រែឡើយ ។ តែប្រសិនបើភាគីរណា មួយមានការប្រែក្រឡះមិនគោរព និងមិនអនុវត្តតាមចំណុចណាមួយ នៃកិច្ចព្រមព្រៀងខាងលើ ភាគីនោះនឹងទទួលខុសត្រូវ ចំពោះមុខច្បាប់ជាធរមាន ។ ដើម្បីបញ្ជាក់ការពិត ភាគីទាំងពីរ បានយល់ព្រមផ្តិតស្នាមមេដៃស្តាំទុកជាភស្តុតាង ។ កិច្ចព្រមព្រៀងនេះធ្វើឡើងចំនួនបួនច្បាប់ ដោយប្រគល់ជូនគូភាគីម្នាក់មួយច្បាប់ រក្សាទុកនូវអាជ្ញាធរមូលដ្ឋានមួយច្បាប់ និង ផ្ញើជួនមន្ទីរ អភិវឌ្ឍន៍ជនបទខេត្តមួយច្បាប់ ។
សូមជម្រាបជូនថា ចំពោះការចុះរុះរើរបងផ្ទះ នាថ្ងៃនេះ គឺអាជ្ញាធរបានវាយកំទេចរបងផ្ទះចំនួន២ខ្នងផ្ទះ នៅសល់ប៉ុន្មានខ្នងផ្ទះទៀត នឹងត្រូវបន្តអនុវត្តនៅពេលក្រោយឆាប់ៗខាងមុខនេះ ។ មហាជនបានលើកឡើងថា កាលពេលប្រជាពលរដ្ឋចាប់ផ្តើមសាងសង់របង និងចេតីយ៍រោងបុណ្យអាជ្ញាធរ គូមិឃុំមិនមកហាមឃាត់ទេ ពេលសាងសង់រួចរាប់ឆ្នាំ ទើបប្រាប់ថា សាងសង់ខុសថ្បាប់ ត្រូវវាយចោល ៕
ចែករំលែកព័តមាននេះ