ខេត្តមណ្ឌលគិរី ៖ កម្លាំងនគរបាលដែលឈរជើងតាមខ្សែបន្ទាត់ព្រំដែន គឺជាភ្នែកច្រមុះរបស់រាជរដ្ឋាភិបាល ដូច្នេះត្រូវតែភាពស្វាហាប់ ស្មារតីរឹងមាំ ក្នុងការបំពេញតួនាទីភារកិច្ចរបស់ខ្លួន ដាច់ខាតមិនអនុញ្ញាតឲ្យបរទេសណាឈ្លានពាន ដែនបូរណភាពទឹកដីខ្មែរ សូម្បីបន្តិច…
ខេត្តមណ្ឌលគិរី ៖ កម្លាំងនគរបាលដែលឈរជើងតាមខ្សែបន្ទាត់ព្រំដែន គឺជាភ្នែកច្រមុះរបស់រាជរដ្ឋាភិបាល ដូច្នេះត្រូវតែភាពស្វាហាប់ ស្មារតីរឹងមាំ ក្នុងការបំពេញតួនាទីភារកិច្ចរបស់ខ្លួន ដាច់ខាតមិនអនុញ្ញាតឲ្យបរទេសណាឈ្លានពាន ដែនបូរណភាពទឹកដីខ្មែរ សូម្បីបន្តិច នេះជាប្រសាសន៍របស់លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ថ្លែងអំឡុងចុះសាកសួរសុខទុក្ខកងកម្លាំងការពារព្រំដែន និងសម្ពោធឲ្យប្រើប្រាស់ជាផ្លូវការអគារស្នាក់នៅរបស់ប៉ុស្តិ៍នគរបាលការពារព្រំដែនគោកក្បាលដំរី ដែលជាអំណោយដ៏ថ្លៃថ្លារបស់លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ។
លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី មានប្រសាសន៍ថា ដោយមានការយកចិត្តទុកដាក់ខ្ពស់ពីសំណាក់ឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ បានចាត់ឲ្យថ្នាក់ដឹកនាំស្នងការដ្ឋាននគរបាលខេត្តមណ្ឌលគិរី ចុះសាកសួរសុខទុក្ខបងប្អូនកងកម្លាំងនគរបាលការពារព្រំដែនទាំងអស់ មុនឱកាសបុណ្យចូលឆ្នាំថ្មីប្រពៃណីជាតិខ្មែរចូលមកដល់ឆាប់ៗខាងមុខនេះ និងបាននាំយកអំណោយចែកជូនដល់កងកម្លាំងតាមបណ្តាប៉ុស្តិ៍ការពារព្រំដែនគោកទាំង៦ ដែលកំពុងឈរជើងបំពេញការងារតាមខ្សែបន្ទាត់ ព្រំដែនចាប់ពីស្រុកពេជ្រាដា រហូតដល់ស្រុកកោះញែក ទល់ជាមួយខេត្តរតនគិរី ។
ជាមួយគ្នានេះដើម្បីបង្កើនប្រសិទ្ឋភាពការងារ និងកិច្ចការការពារដែនបូរណភាពទឹកដី ជាពិសេសបញ្ហាជីវភាពរស់នៅរបស់កងកម្លាំងឈរជើងប្រចាំការ នៅតាមខ្សែបន្ទាត់ព្រំដែនកម្ពុជា-វៀតណាម ក្នុងភូមិសាស្ត្រស្រុកពេជ្រាដា និងស្រុកកោះញែក អគារស្នាក់នៅនិងធ្វើការត្រូវបានសាងសង់និងដាក់ឲ្យប្រើប្រាស់សរុបចំនួន ៤ប៉ុស្តិ៍រាប់ទាំងអគារសម្ពោធពេលនេះ ចំណែកប៉ុស្តិ៍ការពារព្រំដែនម្រើច និងប៉ុស្តិ៍អូររ៉ូ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី កំពុងបញ្ជាឲ្យមានការសាងសង់ជាបន្តជូនដល់កងកម្លាំងនៅទីនោះ។
សូមបញ្ជាក់ថា អគារស្នាក់នៅ(មានលក្ខណៈស្តង់ដារត្រឹមត្រូវរឹងមាំ)ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ជូនដល់ប៉ុស្តិ៍នគរបាលការពារព្រំដែនគោកក្បាលដំរី នៃវរសេនាតូចនគរបាលការពារព្រំដែនគោកលេខ៣០៣ ក្នុងនោះមាន អគារស្នាក់នៅមានទំហំ ៧,៥០ x ២១,១៤ ម៉ែត្រ អគារផ្ទះបាយទំហំ ៨,២០ x ១០,២៥ ម៉ែត្រ និងបន្ទប់ទឹកទំហំ ៤x៤,២៥ម៉ែត្រ។
ក្នុងឱកាសនោះដែរ លោកឧត្តមសេនីយ៍ទោ ឡោ សុខា ស្នងការនគរបាលខេត្ត បាននាំយកអំណោយជា ថវិកា គ្រឿងឧបភោគបរិភោគ ជូនដល់ប៉ុស្តិ៍នគរបាលព្រំដែនគោកទាំង៦ដែលកំពុងបំពេញបេសកម្មរបស់ខ្លួនរួមមាន ភេជ្ជៈចំនួន ៦០កេស ក្នុងមួយប៉ុស្តិ៍ទទួលបាន ១០កេស។ ក្នុងនោះមាន ត្រីខចំនួន ០៦កេសធំ ក្នុងមួយប៉ុស្តិ៍ទទួលបាន ០១កេស, មីចំនួន ០៦កេសធំ ក្នុងមួយប៉ុស្តិ៍ទទួលបាន ០១កេស , ឃីតចំនួន ៤០កញ្ចប់ , អង្ករចំនួន ៩០០គីឡូក្រាម ក្នុងមួយប៉ុស្តិ៍ទទួលបាន ១៥០គីឡូក្រាម , ថវិកាចំនួន៣លានរៀល ក្នុងមួយប៉ុស្តិ៍ៗទទួលបាន ៥០ម៉ឺនរៀល។
លោកឧត្ដមសេនីយ៍ទោ ស្នងការនគរបាលខេត្ត បានថ្លែងអំណរអរគុណ យ៉ាងជ្រាលជ្រៅដល់កងកម្លាំងនគរបាលការពារព្រំដែន សូមឲ្យមានសុខភាពល្អនិងទទួលបានជ័យជំនះគ្រប់ភារកិច្ចក្នុងបុព្វហេតុការពារជាតិមាតុភូមិកម្ពុជា ៕
ចែករំលែកព័តមាននេះ