ខេត្តកំពង់ចាម ៖ ក្រោមការយកចិត្តទុកដាក់ពីសំណាក់ឯកឧត្តមអ៊ុន ចាន់ដា អភិបាលខេត្ត ដោយដាក់វិធានការឲ្យអភិបាលស្រុកជើងព្រៃនិងអភិបាលស្រុកបាធាយ ត្រូវតែរួមគ្នាថែសួនផ្កានៅចំកណ្ដាលទ្រូងផ្លូវ៤គន្លងចាប់ពីរង្វង់មូលស្គន់ដល់ស្ពាន២៤ ព្រំប្រទល់ខេត្តកណ្ដាល។ អ្វីដែលកត់សម្គាល់នោះ ទោះបីក្នុងរដូវប្រាំងចូលមកដល់យ៉ាងណាក៏ដោយគេសង្កេតឃើញផ្កាក្រដាសនៅតែរីកស្រស់ញញឹម…
ខេត្តកំពង់ចាម ៖ ក្រោមការយកចិត្តទុកដាក់ពីសំណាក់ឯកឧត្តមអ៊ុន ចាន់ដា អភិបាលខេត្ត ដោយដាក់វិធានការឲ្យអភិបាលស្រុកជើងព្រៃនិងអភិបាលស្រុកបាធាយ ត្រូវតែរួមគ្នាថែសួនផ្កានៅចំកណ្ដាលទ្រូងផ្លូវ៤គន្លងចាប់ពីរង្វង់មូលស្គន់ដល់ស្ពាន២៤ ព្រំប្រទល់ខេត្តកណ្ដាល។
អ្វីដែលកត់សម្គាល់នោះ ទោះបីក្នុងរដូវប្រាំងចូលមកដល់យ៉ាងណាក៏ដោយគេសង្កេតឃើញផ្កាក្រដាសនៅតែរីកស្រស់ញញឹម ជាមួយនោះអាជ្ញាធរមូលដ្ឋានគឺយកចិត្តទុកដាក់ប្រឹងថែទាំឲ្យបានល្អប្រសើរ។
លោកអូត ឈាងលី អភិបាលស្រុកបាធាយ បានប្រាប់ឲ្យដឹងនាព្រឹកថ្ងៃទី៤ មេសាឆ្នាំ២០២៥ថា ក្នុងពេលដែលឯកឧត្តមអភិបាលខេត្ត បានអញ្ជើញចូលកាន់តំណែងបានមួយឆ្នាំទៅពីរឆ្នាំមានពេលមួយនោះគេថតសួនច្បារនៅកណ្ដាលទ្រូងផ្លូវជាតិលេខ៦ ដោយថតឃើញមានស្មៅក្រៀមស្វិតស្រពោនក្នុងរដូវប្រាំងរិះគន់។ នាពេលនោះការថែទាំសួនច្បារគឺស្ថិតនៅក្រោមចំណុះឲ្យមន្ទីរសាធារណការនិងដឹកជញ្ជូនខេត្តកំពង់ចាម ក្រោយមកឯកឧត្តមអភិបាលខេត្ត បានចាត់តាំងឲ្យអភិបាលរងខេត្តមួយរូបដឹកនាំកម្លាំងប្រជុំរៀបចំផែនការថែទាំសួនច្បាកណ្ដាលទ្រូងផ្លូវនេះ ឲ្យបានល្អប្រសើរឡើងវិញ។
លោកអភិបាលស្រុកបាធាយ បានរំលឹកថាគ្រាដែលរូបលោកនៅជាអភិបាលស្រុកជើងព្រៃ ដោយទទួលបទបញ្ជាពីសំណាក់ឯកឧត្តមអ៊ុន ចាន់ដា អភិបាលខេត្ត គឺរូបលោកមានរថយន្តមួយគ្រឿងសម្រាប់ដឹកទឹកស្រោចថែទាំសួនច្បារកណ្ដាលទ្រូងផ្លូវដោយក្នុងមួយថ្ងៃចំណាយពេលស្រោចទឹករហូតដល់១០ជើង។ សកម្មភាពនៃការស្រោចវិលជុំពីដើមដល់ចុងទីបានធ្វើឲ្យផ្កាក្រដាសនិងដើមជ្រៃគឺបានដោះលូតលាស់ល្អគួរជាទីចាប់អារម្មណ៍និងមានសោភណ្ឌភាពគួរឲ្យទាក់ទាញនៅលើចម្ងាយផ្លូវ១១គីឡូម៉ែត្រ។ លុះដល់ពេលអាណត្តិដែលត្រូវផ្លាស់ប្ដូររូបលោកមកកាន់តំណែងជាអភិបាលស្រុកបាធាយ ដោយសង្កេតឃើញថាសួនផ្កានៅកណ្ដាលទ្រូងផ្លូវនេះចាប់ពីស្រុកបាធាយរហូតដល់ស្ពាន២៤ ចំណុចព្រំប្រទល់ខេត្តកណ្ដាល ដែលមានចម្ងាយរហូតដល់២០គីឡូម៉ែត្រគឺមានផ្កាខ្លះត្រូវបានក្រៀមស្វិតស្រពោន។
បន្ទាប់មករូបលោកបានរាយការណ៍ជូនថ្នាក់ដឹកនាំខេត្ត ហើយត្រូវបានឯកឧត្តមអភិបាលខេត្តឧបត្ថម្ភផ្កាក្រដាសនិងដើមជ្រៃជិត២០០ដើម ដោយរាល់ថ្ងៃបានដាំជួសផ្កាដែលក្រៀមស្វិតចាប់ពីសាលាស្រុកបាធាយមកដល់ចំណុចច្រមុះជ្រូកម្ដុំផ្សារផ្អាវ។
លោកឈាងលី អភិបាលស្រុកប្រធានបញ្ជាក់ថា រាល់ថ្ងៃសាលាស្រុកមានតែរថយន្តសម្រាប់ថែទាំស្រោចទឹកមួយគ្រឿង ហើយចម្ងាយក៏រាងឆ្ងាយទៀតធ្វើឲ្យមានផលវិបាកខ្លះៗ ជាមួយនោះបើមានសប្បុរសជនឬក្រុមការងារចុះជួយស្រុកបាធាយ ផ្ដល់រថយន្តសម្រាប់ស្រោចទឹកធុនតូចល្មមគឺអាចនឹងអាចថែទាំសួនច្បារបានដោយងាយស្រួល។
សូមបញ្ជាក់ថានៅរង្វង់មូលថ្នល់កែងអតីតឯកឧត្តមលន់ លឹមថៃ អភិបាលខេត្តបានស្ថាបនារង្វង់មូលដាក់រូបសំណាក់ព្រះនរាយ ព្រះវិស្ណុ និងព្រះកិណេះ ដើម្បីសម្រាប់សុំសេចក្តីសុខដល់បងប្អូនប្រជាពលរដ្ឋធ្វើដំណើរតាមដងផ្លូវទៅវិញទៅមក។ តែមានរូបសំណាក់ខ្លះដើមឈើបានដុះបាំងព្រះភ័ក្ត្រអាជ្ញាធរស្រុកបាធាយបានកាត់គាស់ដើមឈើនោះចេញដោយជំនួសដើមផ្កាឡើងវិញស្រួលអ្នកធ្វើដំណើរបានឃើញរូបសំណាក់នោះ។
អ្វីដែលកត់សម្គាល់ ទោះបីជាក្នុងរដូវប្រាំងនៅតំបន់ខ្លះប្រជាពលរដ្ឋមានផលវិបាកក្នុងការប្រើប្រាស់ទឹក តែសម្រាប់សួនផ្កានៅចំណុចមុខសាលាស្រុកបាធាយ មកដល់ចំណុចរង្វង់មូលស្គន់ គឺផ្កាក្រដាសនៅតែរីកស្រស់ញញឹមនេះដោយសារការយកចិត្តថែទាំពីសំណាក់អាជ្ញាធរស្រុកបាធាយនិងជើងព្រៃ ៕
ចែករំលែកព័តមាននេះ