ខេត្តកណ្តាល ៖ ឆ្លងចរន្តអគ្គិសនី(ទុស្សេខ្សែភ្លើង) លេបត្របាក់ផ្ទះពលរដ្ឋ ចំនួន០២ខ្នងទាំងស្រុង ផ្អើលសមត្ថកិច្ចទាំងកណ្តាលយប់ ចុះជួយពន្លត់ បង្កឱ្យមានការភ្ញាក់ផ្អើល កាលពីវេលាម៉ោង១១និង៣០នាទីយប់ថ្ងៃទី១ ខែមេសា…
ខេត្តកណ្តាល ៖ ឆ្លងចរន្តអគ្គិសនី(ទុស្សេខ្សែភ្លើង) លេបត្របាក់ផ្ទះពលរដ្ឋ ចំនួន០២ខ្នងទាំងស្រុង ផ្អើលសមត្ថកិច្ចទាំងកណ្តាលយប់ ចុះជួយពន្លត់ បង្កឱ្យមានការភ្ញាក់ផ្អើល កាលពីវេលាម៉ោង១១និង៣០នាទីយប់ថ្ងៃទី១ ខែមេសា ឆ្នាំ២០២៥ ស្ថិតនៅចំណុច ភូមិបាក់ដាវក្រោម សង្កាត់បាក់ដាវ ក្រុងអរិយក្សត្រ ខេត្តកណ្តាល ។
បើយោងតាមប្រភពព័ត៍មានពី ម្ចាស់ផ្ទះបានឱ្យដឹងថា មុនកើតហេតុ ពួកគាត់កំពុងតែសម្រាកលង់លក់នៅក្នុងផ្ទះ ស្រាប់តែលឺសូរសំឡេងផ្ទុះ ចំនួន០១ដង ភ្លាមៗនោះ ក៏គាត់បានងើបដើរទៅមើល ស្រាប់តែមានផ្សែងហ៊ុយខ្មៅខ្មួលខ្មាញ់ លាយលំអណ្តាតភ្លើងយ៉ាងសន្ធោសន្ធៅ ទើបប្រញាប់ប្រញាល់នាំគ្នាចុះពីលើផ្ទះ។ ស្របពេលនោះ ប្រជាពលរដ្ឋក៏បាននាំគ្នាយកទុយោទឹក ដើម្បីជួយបាញ់ពន្លត់ តែទប់ទល់មិនបាន ដោយសារភ្លើងឆេះសន្ធោសន្ធៅខ្លាំងពេក ទើបប្រញាប់រាយការណ៍ជូនសមត្ថកិច្ចអោយជួយចុះមកអន្តរាគមន៍ ដើម្បីកុំអោយមានការរាលដាលកាន់តែខ្លាំងដល់ផ្ទះដទៃទៀត ។
បន្ទាប់ពីទទួលបានដំណឹងថា មានករណីអគ្គិភ័យឆាបឆេះផ្ទះប្រជាពលរដ្ឋ ភ្លាមៗលោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល បានបញ្ជារឲ្យរថយន្តបង្ការអគ្គិភ័យ ពន្លត់ និងសង្គ្រោះ ចេញរថយន្តទៅជួយអន្តរាគមន៍ ពន្លត់អគ្គិភ័យ ផងដែរ ។
ម្ចាស់ផ្ទះរងគ្រោះទី០១ ឈ្មោះ ឌុំ ណាំ ភេទប្រុស សំណង់ផ្ទះទំហំទទឹង០៦ម៉ែត្រ គុណ ០៨ម៉ែត្រ សង់ពីឈើប្រក់ ហ្វីប្រូស៊ីម៉ង់ ឆេះខូចខាតទាំងស្រុង ។ ចំណែកសម្ភារៈខូចខាតរួមមាន ៖ ម៉ូតូ២គ្រឿង, ម៉ូតូសណ្តោងរ៉ឺម៉ក ១គ្រឿង និង ចំនួនស្រូវ០២តោន និងសម្ភារៈទាំងស្រុង ។
ម្ចាស់ផ្ទះ រងគ្រោះទី០២ ឈ្មោះ លី រៀម ភេទប្រុស សំណង់ផ្ទះទំហំទទឹង០៦ម៉ែត្រ គុណ បណ្តោយ០៨ម៉ែត្រ សង់ពីឈើ ប្រកប្រូស៊ីម៉ង់ ឆេះខូចខាតទាំងស្រុង ។ ចំណែកសម្ភារៈខូចខាត រួមមាន ៖ ម៉ូតូចំនួន០១ គ្រឿង, ស្រូវចំនួន០១តោនកន្លះ, និងសម្ភារៈក្នុងផ្ទះទាំងស្រុង ។
ដោយក្នុងនោះ ប្រើប្រាស់រថយន្តពន្លត់អគ្គិភ័យរបស់ អធិការដ្ឋានក្រុងអរិយក្សត្រចំនួន០១គ្រឿង, រថយន្តស្រុកល្វាឯម០២គ្រឿង, រថយន្តស្រុកមុខកំពូល០១គ្រឿង, រថយន្តស្រុកខ្សាច់កណ្តាល០១គ្រឿង ជួយបាញ់ពន្លត់ដោយបានប្រើប្រាស់ទឹកអស់ចំនួន០៥រថយន្ត ទើបគ្រប់គ្រងបាន និងរលត់ជាស្ថាពរនៅវេលាម៉ោង០១និង៤០នាទីយប់ ឈានចូលថ្ងៃទី២ ខែមេសា ឆ្នាំ២០២៥ ។
ចំពោះមូលហេតុ សមត្ថកិច្ចបានធ្វើការស្រាវជ្រាវ គឺបណ្តាលមកពីការឆ្លងចរន្តអគ្គិសនី (ទុស្សេខ្សែភ្លើង) ទោះបីជាយ៉ាងណា ក្នុងករណីខាងលើនេះ គឺមិនបណ្តាលឱ្យមានអ្នករងរបួសទ្បើង ៕
ចែករំលែកព័តមាននេះ