ទីក្រុងម៉ូស្កូ៖ រុស្ស៊ីព្រមានអាមេរិកថាកុំវាយប្រហារអ៊ីរ៉ង់ប្រយ័ត្នជួបនឹងគ្រោះអាសន្នធំ។ ថ្មីៗនេះ អនុរដ្ឋមន្ត្រីការបរទេសរុស្ស៊ី លោកសឺហ្គេ រីយ៉ាបកូស (Sergei Ryabkov) ព្រមានថាបើអាមេរិកវាយប្រហារទីតាំងនុយក្លេអ៊ែររបស់អ៊ីរ៉ង់មែន ពេលនោះគ្រោះមហន្តរាយដ៏ធំនឹងកើតមានជាមិនខានឡើយ។…
ទីក្រុងម៉ូស្កូ៖ រុស្ស៊ីព្រមានអាមេរិកថាកុំវាយប្រហារអ៊ីរ៉ង់ប្រយ័ត្នជួបនឹងគ្រោះអាសន្នធំ។ ថ្មីៗនេះ អនុរដ្ឋមន្ត្រីការបរទេសរុស្ស៊ី លោកសឺហ្គេ រីយ៉ាបកូស (Sergei Ryabkov) ព្រមានថាបើអាមេរិកវាយប្រហារទីតាំងនុយក្លេអ៊ែររបស់អ៊ីរ៉ង់មែន ពេលនោះគ្រោះមហន្តរាយដ៏ធំនឹងកើតមានជាមិនខានឡើយ។ ការថ្លែងដូច្នេះធ្វើឡើងបន្ទាប់ពីលោកត្រាំកំពុងប្រើប្រាស់វិធីបង្ខំដើម្បីឱ្យអ៊ីរ៉ង់ចូលតុចរចានុយក្លេអ៊ែរ។ បើមិនដូច្នេះទេ លោកនឹងទម្លាក់គ្រាប់បែកយ៉ាងខ្លាំងក្លាបំផុតដែលមិនធ្លាប់មានពីមុនមក។
គេបារម្ភថាបញ្ហានេះមិនសាមញ្ញពេកទេ ត្រាំមិនមែនបានតែសម្ដីទេ បើគាត់ហ៊ាននិយាយ គាត់ត្រូវតែហ៊ានធ្វើ។ សូម្បីតែមេបញ្ជាការកំពូលរបស់អ៊ីរ៉ង់នៅត្រាំបញ្ជាឱ្យធ្វើឃាតកាលពីឆ្នាំ២០២០។ ប៉ុន្មានថ្ងៃនេះ ត្រាំ និងអគ្គមគ្គុទ្ទេសក៍អ៊ីរ៉ង់បានបំផ្លោងវោហារសាស្ត្រដាក់គ្នាយ៉ាងខ្លាំងក្លា។ តបទៅនឹងការព្រមានរបស់ត្រាំ អ៊ីរ៉ង់ប្រកាសថាខ្លួនមិនចុះញ៉មជាដាច់ខាត ហើយខ្លួនត្រៀមចាត់វិធានការឆ្លើយតបយ៉ាងស្មើគ្នា។ មានន័យថាបើត្រាំវាយប្រហារអ៊ីរ៉ង់ប៉ុណ្ណា អ៊ីរ៉ង់នឹងវាយបកទៅវិញប៉ុណ្ណឹងដែរ។
ប្រភពខ្លះថាមូលដ្ឋានទ័ពអាមេរិកនៅមហាសមុទ្រឥណ្ឌា និងនៅមជ្ឈិមបូព៌ានឹងក្លាយជាមុខសញ្ញាធំជាងគេដែលអ៊ីរ៉ង់ត្រៀមវាយប្រហារ។ លោកត្រាំនៅតែព្យាយាមដាក់សម្ពាធអ៊ីរ៉ង់ជាអតិបរមា និងត្រៀមដាក់ទណ្ឌកម្មសេដ្ឋកិច្ចរឹតតែខ្លាំង។ សូម្បីតែប្រទេសដែលរកស៊ីជាមួយអ៊ីរ៉ង់ ឬទិញទំនិញអ៊ីរ៉ង់ក៏ត្រូវដំឡើងពន្ធផងដែរនៅក្នុងសេណារីយោដែលលោកបានដាក់ចេញ។
តាមចិត្តរបស់ត្រាំ គាត់ចង់ចរចាគ្នាដោយផ្ទាល់ជាមួយអ៊ីរ៉ង់ដើម្បីឱ្យចេញជាសាច់ការ។ ប៉ុន្តែសំណើនេះត្រូវអ៊ីរ៉ង់បដិសេធ។ អ៊ីរ៉ង់ថាខ្លួនលែងទុកចិត្តអាមេរិកតទៅទៀតហើយ។ កាលពីឆ្នាំ២០១៥ចរចាត្រូវរ៉ូវគ្នាហើយ ដល់ពេលត្រាំឡើងកាន់អំណាច គាត់ដើរចេញពីកិច្ចព្រមព្រៀង និងដាក់ទណ្ឌកម្មអ៊ីរ៉ង់សាជាថ្មី។ អ៊ីរ៉ង់អាចទទួលយកបានត្រឹមការចរចាគ្នាដោយប្រយោល។
ដោយសារមើលឃើញសភាពការណ៍ហាក់ដូចជាមិនសូវស្រួល អនុរដ្ឋមន្ត្រីរុស្ស៊ីថ្លែងនៅក្នុងបទសម្ភាសជាមួយទស្សនាវដ្ដីកិច្ចការអន្តរជាតិ (International Affairs) ថារុស្ស៊ីសូមប្រឆាំងជំទាស់ជាដាច់ខាតចំពោះផែនការរបស់អាមេរិកដែលចង់ប្រើកម្លាំងយោធាបើអ៊ីរ៉ង់មិនព្រមចរចាគ្នាដើម្បីឱ្យមានកិច្ចព្រមព្រៀងនុយក្លេអ៊ែរ។ លោកព្រមានថាបើអាមេរិកហ៊ានវាយ, អាមេរិកនឹងប្រឈមនឹងផលវិបាកដ៏មហន្តរាយ។ ជាពិសេស បើអាមេរិកវាយទីតាំងនុយក្លេអ៊ែររបស់អ៊ីរ៉ង់ដឹងតែគ្រោះថ្នាក់ធំតែម្ដង។
អនុរដ្ឋមន្ត្រីរុស្ស៊ីថ្លែងបន្តទៀតថាលោកស្ដាប់ឮភាសាគំរាមកំហែងទាំងនោះ និងការដាក់ឱសានវាទដើម្បីឱ្យអ៊ីរ៉ង់ជ្រើសរើសផ្លូវសម្រាប់ដើរ។ លោកយល់ថានេះជាវិធីដោះស្រាយបញ្ហាមិនត្រឹមត្រូវ។ រុស្ស៊ីសូមថ្កោលទោសទុកជាមុន។ ចុងក្រោយនេះ អ៊ីរ៉ង់ប្រកាសច្បាស់ៗហើយថាបើអាមេរិកពិតជាវាយប្រហារមែន ខ្លួនគ្មានជម្រើសអ្វីក្រៅពីផលិតអាវុធនុយក្លេអ៊ែរនោះទេ។
តាមមើលទៅ សង្គ្រាមអាចនឹងផ្ទុះមែន មិនមែននិយាយលេងសើចទេ។ ជាក់ស្ដែង គេឃើញកងទ័ពអាមេរិកចាប់ផ្ដើមធ្វើសកម្មភាពយ៉ាងគគ្រឹកគគ្រេងនៅឈូងសមុទ្រពែក្ស (Persian Gulf) និងមហាសមុទ្រឥណ្ឌាដើម្បីត្រៀមលក្ខណៈទុកជាស្រេច។ ឱ្យតែត្រាំចេញបញ្ជាតែមួយម៉ាត់ដឹងតែវាយប្រហារដូចព្យុះសង្ឃរាជាមិនខាន។
ចំណែកអ៊ីរ៉ង់ក៏ចង់បង្ហាញថាខ្លួនមិនមែនជាមនុស្សដប់គត់ ឬដំឡូងមូលនោះឡើយ។ សារព័ត៌មានរបស់រដ្ឋាភិបាលអ៊ីរ៉ង់ឈ្មោះតេអេរ៉ង់ ថាមស៍ (Tehran Times) ចុះផ្សាយថាកងទ័ពអ៊ីរ៉ង់បានបំពាក់ក្បាលគ្រាប់មីស៊ីល និងដាក់ពង្រាយប្រព័ន្ធការពារដែនអាកាសនៅតាមទីក្រុងតូចធំទាំងអស់ដើម្បីត្រៀមវាយបកវិញ។ តើសម្ព័ន្ធមិត្តរបស់អ៊ីរ៉ង់អាចនឹងលូកដៃដែរឬទេ? ជាពិសេសរុស្ស៊ីដែលកំពុងធ្វើសមយុទ្ធយោធារួមគ្នាត្រីភាគីជាមួយចិន និងអ៊ីរ៉ង់នៅឈូងសមុទ្រអូម៉ង់ (Gulf of Oman)។
ទំនាក់ទំនងរវាងត្រាំ និងពូទីនផ្អែមល្ហែមជាមួយគ្នាបានតែប៉ុន្មានខែប៉ុណ្ណោះ ឥឡូវនេះឮថាចាប់ផ្ដើមមានបញ្ហាជាបណ្ដើរៗហើយ។ ត្រាំបង្ហាញការមិនពេញចិត្តទាល់តែសោះ។ នៅពេលកំពុងចរចាគ្នាសុខៗ ពូទីនស្នើឱ្យបង្កើតរដ្ឋាភិបាលបណ្ដោះអាសន្ន និងបោះឆ្នោតឡើងវិញនៅអ៊ុយក្រែន។ ពូទីនច្រានចោលសំណើនៃបទឈប់បាញ់ និងបញ្ជូនលក្ខខណ្ឌត្រឡប់ទៅវិញ។ ពូទីនបន្តវាយប្រហារអ៊ុយក្រែនកាន់តែខ្លាំង។ ត្រាំទើបតែនិយាយថ្មីៗនេះថាលោកមានកំហឹងយ៉ាងខ្លាំងជាមួយពូទីន។
ត្រាំថាបើរុស្ស៊ីមិនព្រមចរចាឱ្យមានបទឈប់បាញ់ និងបើលោកដឹងថានោះជាកំហុសរុស្ស៊ី លោកនឹងដំឡើងពន្ធប្រេងរុស្ស៊ី។ ប្រទេសដែលទិញទំនិញរុស្ស៊ីក៏ត្រូវដំឡើងពន្ធដូចគ្នា។ អាមេរិក និងរុស្ស៊ីនៅមានសន្លឹកបៀរច្រើនទៀតសម្រាប់លេង។ គ្រាន់តែថានៅដំណាក់កាលដំបូងៗ រុស្ស៊ីគ្រាន់តែប្រើកូនចៅរបស់ខ្លួនដើម្បីបញ្ចេញសារនយោបាយដាស់តឿនលោកត្រាំសិន។
ប្រតិកម្មទៅនឹងសភាពការណ៍ដែលឡើងកម្ដៅកាន់តែខ្លាំងនេះ លោកអាលី ឡារីចានី (Ali Larijani) ដែលជាទីប្រឹក្សាអគ្គមគ្គុទ្ទេសក៍អ៊ីរ៉ង់ថ្លែងប្រាប់ទូរទស្សន៍របស់រដ្ឋថាអ៊ីរ៉ង់មិនចង់បានសេណារីយោនេះទេ។ ប៉ុន្តែអ៊ីរ៉ង់ក៏គ្មានជម្រើសដែរ។ បើអាមេរិកនៅតែជម្នះចិត្តទម្លាក់គ្រាប់បែកដោយផ្ទាល់ ឬតាមរយៈអ៊ីស្រាអែល ពេលនោះមានន័យថាអាមេរិកបង្ខំឱ្យអ៊ីរ៉ង់ជ្រើសរើសផ្លូវដើរផ្សេងមួយទៀតហើយ៕
ចែករំលែកព័តមាននេះ