ខេត្តកណ្តាល ៖ អគ្គិភ័យបានឆេះយ៉ាងសន្ធោសន្ធៅ លេបត្របាក់ឃ្លាំងរោងចក្រស្តុក សម្ភារៈជ័រ ធ្វើស័ង្កសី និងផ្ទះប្រជាពលរដ្ឋ អស់ចំនួន០៤ខ្នង បង្កការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ និងសមត្ថកិច្ច រួមទាំងរថយន្តពន្លត់អគ្គិភ័យជាច្រើនគ្រឿង ចុះទៅអន្តរាគមន៍បាញ់ពន្លត់ ។
ហេតុការណ៍នេះ បានកើតឡើងនៅវេលាម៉ោង០៩និង៥០នាទីព្រឹក ថ្ងៃទី១ ខែមេសា ឆ្នាំ២០២៥ ចំណុចភូមិថ្លើក ឃុំពើក ស្រុកអង្គស្នួល ខេត្តកណ្តាល ។
បន្ទាប់ពីកើតហេតុភ្លាមៗ កម្លាំងជំនាញចុះដល់កន្លែងកើតហេតុ ក្រោមការបញ្ជាដឹកនាំដោយលោក គួច ចំរើន អភិបាល នៃគណៈអភិបាលខេត្តកណ្តាល និងលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ។
ក្នុងហេតុការណ៍ករណីអគ្គីភ័យនេះ បានបណ្តាលឲ្យឆេះខូចខាតឃ្លាំងរោងចក្រ ចំនួន០៣ឃ្លាំង និងឆេះផ្ទះប្រជាពលរដ្ឋ ចំនួន០៤ខ្នង ខូចខាតទាំងស្រុង រួមមាន ៖
១/ ឃ្លាំងរោងចក្រ ខូឡាបូរេសិន តែកឃីជើង មេអៀរៀល ប្រូដាក់ ឯ.ក ស្តុកសម្ភារៈជ័រផ្លាស្ទិក ចំនួន ០១ឃ្លាំង ទំហំ ៣០ម៉ែត្រ គុណ ១០០ម៉ែត្រ ខូចខាតទាំងស្រុង ម្ចាស់ឈ្មោះ Wang guowang ភេទប្រុស អាយុ៥៥ឆ្នាំ ជនជាតិចិន ស្នាក់នៅ ភូមិថ្លើក ឃុំពើក ស្រុកអង្គស្នួល ខេត្តកណ្តាល ។
២/ខូចខាត ឃ្លាំងស្តុក សម្ភារៈធ្វើផ្ទះចល័ត ទំហំ ៣០ម៉ែត្រ គុណ ១០០ម៉ែត្រ ខូចខាតជញ្ជាំង មួយចំហៀង ស្មើនឹង២០% ម្ចាស់ ឈ្មោះ ចឹង ចុង ភេទប្រុស អាយុ៤៨ឆ្នាំ ជនជាតិចិន ស្នាក់នៅភូមិថ្លើក ឃុំពើក ស្រុកអង្គស្នួល ខេត្តកណ្តាល ។
៣/ខូចខាតឃ្លាំងស្តុក សម្ភារៈរបស់រោងចក្រ ខូឡាបូរេសិន ភែកឃីជើង មេអៀរៀល ប្រូដាក់ ឯ.ក ទំហំ ៣០ម៉ែត្រ គុណ ១០០ម៉ែត្រ ខូចខាទាំងស្រុង ម្ចាស់ឈ្មោះ Wang guowang ភេទប្រុស អាយុ៥៥ឆ្នាំ ជនជាតិចិន ស្នាក់នៅភូមិថ្លើក ឃុំពើក ស្រុកអង្គស្នួល ខេត្តកណ្តាល ។
មិនតែប៉ុណ្ណោះ អគ្គិភ័យខាងលើនេះ បានឆាបឆេះផ្ទះប្រជាពលរដ្ឋ ចំនួន០៤ខ្នង ខូចខាតទាំងស្រុង ៖
១/ម្ចាស់ផ្ទះឈ្មោះ វណ្ណ ស្រីតូច ភេទស្រី អាយុ២៦ឆ្នាំ ផ្ទះទាមធ្វើពីជញ្ជាំងថ្ម ប្រក់ស័ង្កសី ទំហំ ៦ម៉ែត្រ x ៦ម៉ែត្រ ខូចខាតទាំងស្រុង
២/ម្ចាស់ផ្ទះឈ្មោះ វណ្ណ ប៉ន ភេទស្រី អាយុ៤៦ឆ្នាំ ផ្ទះទាមធ្វើពីជញ្ជាំងថ្ម ប្រក់ស័ង្កសី ទំហំ ៤ម៉ែត្រ x ៦ម៉ែត្រ ខូចខាតនិង ផាស់អាប់០១គ្រឿង ខូចខាតទាំងស្រុង ។
៣/ម្ចាស់ផ្ទះឈ្មោះ វណ្ណ សុគន្ធា ភេទស្រី អាយុ៣៣ឆ្នាំ ផ្ទះទាមធ្វើពីថ្ម ជញ្ជាំងឈើ ប្រក់ស័ង្កសី ទំហំ ៤ម៉ែត្រ x ៤ម៉ែត្រ ខូចខាតទាំងស្រុង
៤/ម្ចាស់ផ្ទះឈ្មោះ វណ្ណ សុគន្ធ ភេទប្រុស អាយុ៣២ឆ្នាំ ផ្ទះទាមធ្វើពីជញ្ជាំងឈើ ប្រក់ស័ង្កសី ទំហំ ៥ម៉ែត្រ x ៧ម៉ែត្រ ខូចខាតទាំងស្រុង ។
សូមបញ្ជាក់ថា អគ្គិភ័យនេះ បានរលត់ទៅវិញ១០០% នៅវេលាម៉ោង១១និង៥០នាទីថ្ងៃត្រង់នាថ្ងៃដដែល ដោយប្រើប្រាស់រថយន្តពន្លត់អគ្គិភ័យ ចំនួន ៤៣គ្រឿង ប្រើប្រាស់ទឹកអស់ចំនួន ១១៣ឡាន ប្រើប្រាស់កម្លាំង សរុបចំនួន ៣៦៥នាក់ រួមមាន ៖ រថយន្តពន្លត់អគ្គីភ័យ អធិការដ្ឋាននគរបាលស្រុកអង្គស្នួល ចំនួន០២គ្រឿង ប្រើប្រាស់ទឹក ៥ឡាន, រថយន្តពន្លត់អគ្គីភ័យ ៩១១ ចំនួន០៣គ្រឿង ប្រើប្រាស់ទឹកអស់ ៩ឡាន, រថយន្តពន្លត់អគ្គីភ័យ តំបន់សេដ្ឋកិច្ចកាណាឌីយ៉ា ចំនួន០១គ្រឿង ប្រើប្រាស់ទឹក អស់៣ឡាន, រថយន្តពន្លត់អគ្គីភ័យ បូរីសង្ឃឹមថ្មី ចំនួន០២គ្រឿង ប្រើប្រាស់ទឹកអស់៦ឡាន, រថយន្តពន្លត់អគ្គីភ័យ ស្នងការដ្ឋាននគរបាលខេត្តកណ្ដាល ចំនួន០២គ្រឿង ប្រើប្រាស់ទឹកអស់ ៦ឡាន, រថយន្តពន្លត់អគ្គីភ័យ ៧១១ ចំនួន០៦គ្រឿង ប្រើប្រាស់ទឹក អស់១៨ឡាន, រថយន្តពន្លត់អគ្គីភ័យ អធិការដ្ឋាននគរបាលស្រុកកណ្ដាលស្ទឹង ចំនួន០១គ្រឿង ប្រើប្រាស់ទឹកអស់ ៣ឡាន, ថយន្តពន្លត់អគ្គីភ័យ ស្នងការដ្ឋាននគរបាលខេត្តកំពង់ស្ពឺ ចំនួន០៤គ្រឿង ប្រើប្រាស់ទឹកអស់ ១២ឡាន, រថយន្តពន្លត់អគ្គីភ័យ ១១៩ ចំនួន០៩គ្រឿង ប្រើប្រាស់ទឹកអស់ ១៨ឡាន, រថយន្តពន្លត់អគ្គីភ័យ អគ្គស្នងការនគរបាលជាតិ ចំនួន០៤គ្រឿង ប្រើប្រាស់ ទឹកអស់ ១៣ឡាន, រថយន្តពន្លត់អគ្គីភ័យ ក្រុមហ៊ុនខ្មែរប៊ូប៊េរីជីស ចំនួន០១គ្រឿង ប្រើប្រាស់ទឹកអស់ ៣ឡាន និងរថយន្តពន្លត់អគ្គីភ័យ ក្រសួងមហាផ្ទៃ០៨គ្រឿង ប្រើប្រាស់ទឹកអស់ ១៧ឡាន ។
ចំណែកមូលហេតុ សមត្ថកិច្ចបញ្ជាក់ថា គឺបណ្តាលមកពីផ្ទុះធុងហ្គាសចេញពីឃ្លាំងផ្ទុកសម្ភារៈជ័រ ផ្លាស្ទីក របស់ម្ចាស់ឈ្មោះ Wang guowang ភេទប្រុស អាយុ៥៥ឆ្នាំ ជនជាតិចិន តែទោះបីជាយ៉ាងណា ក្នុងហេតុការណ៍នេះ មិនបង្កឱ្យមានអ្នករងរបួស នោះទេ ៕

































ចែករំលែកព័តមាននេះ